Smalkaia warkka kau pain daukaia sip sa: bîla aisanka wala aisi uplika ra sin aisaia

¿Dîa muni daukaia sa? Jehova bui upla nani ai spiritka nitka lâka ba dukiara lukisa “ani nisanka” wina kabia sin (Ap.St 10:34, 35). Baku bamna, Jisas klir marikan “king lâka sturka yamni na tasba aiska ra smalkan kabia, kuntri sut baha ba” pain walbia dukiara (Mt. 24:14). Sakaraya dara aisanka ra win kan, upla bîla aisanka sut nisan nani bri ba wina, sturka yamni walan kabia ba (Sak. 8:23). Apastil Jan diara pranakira kaikanka ulban ba kat, ya nani pât wahwanka tara ba pura lubia kaka, upla “nisan sât sât wina, taika sât sât wina, bîla aisi sât sât” swaki sakan kabia ba tilara dingkan kabia (Par.M 7:9, 13, 14). Kaina ra aisan ba rait takbia ba mita, yawan smalki taukisa pliska ra upla kum bîla tringsar aisi ba wal prawbia kaka, yawan trai kaikaia sa Baibil sturka yamni ba smalkaia.