Stadikam nani ra ‘solkam pali yas’
1. Baibil stadi tatakra ra help munaia wisi dia nit sa ki?
1 Baibil stadi uplika kum aihtabi takbia help munaia dukyara, dis Baibil stadi yabi kaia baman apia sa. Apastil Pâl bui win ai luhpia paki main kaiki yapti kum baku, witin smalkan nani ra main kaiki asla pali kan. Bara wan stadika nani ba spirit laka ra pawbia dukyara, yawan sin witin nani ra ‘wan solka pali yabaia’ sa (1 Tes. 2:7-9, Lâ Raya Wauhkataya 1986).
2. Dia muni wan stadika ra rait luki marikaia sa, bara nahki muni baha daukisa?
2 Uplika pali ra lukaia. Baibil stadi tatakra kum dia lan taki ba alki dauki auya taim, ai kupia witin ra nikbaisa Baibil wi ba kat wapras uplika wina laiura takaia (1 Pi. 4:4). Ban kra ai pamalika sin witin wina laiura takbia (Mat. 10:34-36). Ai kupia sarka wira daskaia wisi, aitani sa yawan witin ra luki ba marikaia. Lan misiun uplika kum naku win: “Stadi yabi dan takram ningkara, plapi taki wapara. Sip kaka, minit kum pan takaski uplika wal aisas”. Stadikam ra nahki ta baikaia sapa aihwaki bas. Naha tanka ra, witin siknis takisa kaka, telepon bak winaia, apia kaka wih kaikaia sip sma? Aidrubanka nani ra witin wal iwi ai luhpia wal help munaia sip sma ki?
3. Nahki daukaia sip sma kangrigisan ba mita stadikam ra ta baikan kabia?
3 Kangrigisan mita ta baiki ba. Stadikam watla lamara smalki taukisma kaka, ai watla ra wih, man wal smalki tauki uplika ra kakaira takbia yabisma ki? Sip taim, smalki tataukra sat sat ra –kangrigisan almukka nani ra sin– man wal stadi yabaia wabia paiws. Bara stadi kum ta krikram wal baku, wan aidrubanka nani ra wabia dukyara paiwi bas. Baha ba sip munbia witin kangrigisan muihni-lakri nani wal pana taki, spirit taya nani baku sin kaikaia (Mark 10:29, 30; Hibru 10:24, 25).
4. Yawan upla ra rait luki karna wark takisa kaka, dia yamnika sakaia sip sa?
4 Aisa-yapti kum spirit laka ra ai luhpia ra pain ta baiki, luhpia ba Jehova ra tniwi, tanka kasak kat wapi kaikisa taim, rait lilia lukisa (3 Jan 4). Yawan sut wan stadika nani ra wan solka pali yabi si sip sa sim liliaka kaikaia.