Smalkaia dukyara ridi sna ki?

1. Smalkaia ridi apia sa lukanka briaia apia dukyara dia help wan munbia?

¹ Man naku mamkabi walisma kaka, sari takpara! Yawan aisubi takan taim, smalki tataukra lan kum baku aisubras kan. Pas kristianka nani tila wina kum kum ba “kul ra pawras kan, diara uya sin lan takras kan”. Ban sakuna, witin nani ba sturi yamni smasmalkra lankira bangwi kan. Dia muni? Kan Jisas tanka nina blikaia ba ra ai kupia aiska mangkan (W.n 4:​13, Lâ Raya Wauhkataya, 1986; 1 Pi. 2:​21).

2. Jisas smalkanka wina ani ba daukanka kum kum sa?

² Jisas nahki aisan ba. Ai smalkanka ba isi, kakaira, bara upla sut tanka bri kan. Makabi walanka, maprika lilka, bara ta krikaia bila ailal yus muni kan ba upla nani walaia brinka buki kan (Mat. 6:​26). Witin upla ra uba pali luki kan ba param marikan (Mat. 14:14). Purkara sin, Jisas nu kan Jehova mita witin ra bak sakan kan ai warkka daukbia dukyara, baha mita kasak bara karnika bri aisi kan (Luk 4:​18).

3. Smalkaia warkka pain daukbia wisi, Jehova nahki help wan munisa?

³ Jehova help wan munisa. Wan Smasmalkra Tara ba Ai Bila bara Ai asla takanka bak sturi yamni ba smalkaia dukyara dia nit ba lan wan daukisa (Ais. 54:13). Jehova bui Jisas aisan satka ba ulbi swin ba mita, aitani sa yawan laki kaiki, ai tnatka ba nina blikaia. Jehova mita Ai spiritka hulikira wankisa, bara kangrigisan aidrubanka nani bak wan smalkisa (Jan 14:26). Baha purkara, smalki tataukra lankira nani wina yawan lan takisa, kan help wan munisa kau pain smalkaia.

4. Dia muni sturi yamni ba upla ra smalkaia ridi sa wiaia sip sa ki?

⁴ Smalkaia ridi sa wiaia sip sa, kan ‘Gâd mita sika, yawan diara sut daukaia sip sa’ (2 Kor. 3:5). Jehova ra kasak luki, ai prisantka nani ba pain yus munisa kaka, yawan “pain lan kabia bara ridi sin pain daukan kabia, wark yamni satka nani sut daukaia dukyara” (2 Tim. 3:​17).