Insla ma ba pat pihwan sa, mahka krikaia pyua sika
1. Naiwa pyua ra dia warkka painkira daukisa ki?
1 Jisas Sameria mairka ra smalkan ningkara, ai disaipelka nani ra win: “Namkra nani buki insla nani bara kaiks, ma ba pat pihwan sa, mahka krikaia pyua sika” (Jan 4:35, 36). Spirit laka ra, insla ma krikaia pyua kum aula kan, bara Jisas pat kaiki kan naha warkka ba tasba aiska ra daukan kabia. Jisas ba insla ma krikaia warkka ba nanara heven wina ban ta baikisa (Mat. 28:19, 20). Dia wan marikisa naha warkka tnata lamara auya ba ra kau pawisa?
2. Dia wan marikisa tasba aiska ra insla ma krikaia warkka ba pawisa?
2 Tasba aiska ra insla ma krikaia pyua sa. Smalkaia warkka 2009 manka pyua ra, smalki tataukra nani numbika wina 3.2% pawanka kau takan. Kuntri kum kum ra smalkaia warkka daukaia adar apu kan, sakuna nanara 14% pawanka takan. Bara kati bani Baibil stadika 7.619.000 daukan, naha numbika ba kau tara sa smalki tataukra sut numbika ba wal, bara mani luan ra Baibil stadika nani yaban ba wal 500.000 pura kau pawan sa. Smalkaia warkka ba plis ailal ra pawi ba mita nit sa baha ra kau misan uplika nani blikaia. Baku sin, kuntri ailal ra tringsar bila aisi uplika nani ra smalkaia warkka ba pawisa. Naha pawanka nani sut wan marikisa Jehova smalkaia warkka ba, insla ma krikaia pyua tnata ra aihni munisa (Ais. 60:22). ‘Namsla ma nani krikaia’ dukyara pain lukisma ki?
3. Muihni lakri kum kum ba smalkaia warkka ba dukyara dia lukisa ki?
3 Insla ma krikaia pliska. Ban kra upla kum wibia: “Yang smalkisna pliska ba pawras sa”. Sam taim smalki pliska kum kum ba isti pawras sa plis wala nani ba wal, apia kaka pas taim pawi kan baku nanara kau pawras sa. Ban kra, Jehova Witniska kum kum lukbia insla ma krikaia warkka ba baha ra kau pawbia apia, bara nanara ai warkka sa upla wiria baman ra help munaia. Baha ba rait sa ki?
4. Smalkaia warkka ta baikaia dukyara dia lukanka pain bri kaia sa, bara dia muni?
4 Ta wina tnata ba kat, insla ma krikaia pyua warkka ba karna sa. Kaiks aihni pali wark takaia dukyara Jisas dia win ba: “Insla dakaia ma ba manis sa, sakuna wark uplika nani ba wiria sa. Baha mita, insla Dawanka ra makas, ai nasla dakaia wark uplika nani blikbia” (Mat. 9:37, 38). Jehova, insla Dawanka ba, witin baman daukaia sip sa ahkia bara anira ma nani ba pawbia (Jan 6:44; 1 Kor. 3:6-8). Bara yawan dia warkka daukaia sa ki? Baibil ba ansika wankisa: “Saumukka ma ba titan ra mangks, bara tutni ra sin mangks” (Smas. 11:4-6). Au, ma krikaia pyua dan taki ba tawan ris briaia pyua apu sa!
5. Wan walaia want apia pliska ra, dia muni takaskraskira smalkaia sa ki?
5 Ban ma kriki bas. Yawan smalki pliska ba kli kli smalkan kaka, bara upla nani wan walaia want apia kabia sin, yawan ban takaskraskira bara aihni muni smalkaia sa (2 Tim. 4:2). Tasba aiska ra turban laka uba bara sa tawan daukisa upla nani ba kaina pyua ra dia takbia ba dukyara ai lukanka nani bri ba bara ai daukanka nani sin sat wala lukbia. Baku sin, wahma tyara nani kau almuk takisa pyua ra ai nitka brisa trabil apukira iwaia bara ai sinska ra kupia kumi laka briaia. Yawan ban smalkisa kaka, ban kra upla wala kupia nikbia. Au, kainara wan smalkanka nani walras kan nani ba, ban kra nanara walaia sip sa. Bara ya ya wan walaia want apia kabia sin maisapahkaia nit sa (Isi. 2:4, 5; 3:19).
6. Yawan smalki pliska ba pawras sa kaka, dia help wan munbia takaskraskira smalkaia?
6 Yawan smalki pliska ba pawras sa kaka, dia help wan munbia takaskraskira smalkaia? Ban kra utla utla ra smalkaia baman watlika ra, tnatka wala nani ra sin daukaia sip sa. Sampla baku, telepon ku apia kaka diara atki pliska nani ra smalkaia sip sa. Apia kaka, upla nani wal dia aisaia bri kaia dukyara, wan aisanka nani raya daukaia sa. Baku sin, yawan smalki awarka nani ba chens munaia sip sa, tihmia saiwuya taim, apia kaka upla nani ris takisa pyua ra smalkaia. Apia kaka sturi yamni nani ba smalkaia dukyara bila aisanka raya kum lan takaia sip sa. Ban kra yawan taura smasmalkra baku smalkaia warkka ra kau daukaia sip sa. Apia kaka, insla dakaia wark uplika uya apu pliska nani ra yawan wih smalkaia sip sa. Insla ma dakaia warkka dukyara pain lukisa kaka, ban ridi kabia upla wala nani ra smalkaia.
7. Ahkia kat yawan ma krikaia warkka ba daukbia ki?
7 Insla mamangkra nani ba ma nani ba krikaia dukyara uya taim apu sa, baha mita insla ma nani ba krikaia pyua dan takbia kat witin nani ba ris bribia. Spirit laka ra insla ma krikaia warkka ba sim sat daukaia nit sa. Ahkia kat yawan ma krikaia warkka ba daukbia ki? ‘Tnata yua nani’ ra bara baha yua nani “tnata” aimakbia ba kat (Mat. 24:14; 28:20). Jehova Napakanka kau tara daukan baku, yawan sin naha warkka wan mihta ra mangkan ba dan daukaia want sa (Jan 4:34; 17:14). Bahamna, smalkaia warkka dukyara pain luki, lilia bara takaskraskira tnata ba kat ban smalkaia sa (Mat. 24:13). Insla ma krikaia pyua ba kau dan takras sa!
[Wahya 2 Lilkika ba]
Ta wina tnata ba kat, insla ma krikaia pyua warkka ba karna sa