Swis man ingnikam kau ingni takbia
1. Dia ba yawan upla nani ra marikaia sip sa?
1 Yu baiwuya wina tihmia saiwuya ba kat, yu ingnika pranakira ba Jehova ra mayunanka yabisa. Ban sakuna, ingni satka wala dukyara Jisas ai disaipelka nani ra aisi kan: “Raya kaia yabi ingnika” (Jn. 8:12). Naha ingnika bri kaia dukyara karna wark takaia sa. Jisas naha kupia kraukanka win: “Ingnikam upla sut mawanra ingwbia” (Mt. 5:16). Naha tasba spirit laka ra tihmu tilara iwi ba, wan ingnika ba marikaia sa, kan baha ingnika ba nit pali sa! Nahki muni Jisas baku wan ingnika ba marikaia sip sa?
2. Nahki muni Jisas ba marikan spirit tanka smalkaia ba diara tara kan?
2 Smalkaia warkka. Jisas ba tanka kasak smalkaia dukyara ai taimka, ai karnika, bara dia bri kan ba sut yus munan. Baku sin, naha warkka daukaia wisi utla utla ra, yabal nani ra, il nani purara bara ani anira upla nani pliki sakaia sip kan ba sin smalkan. Witin nu kan spirit yamnika upla ra smalkaia ba diara tara kan (Jn. 12:46). Bara upla nani kau pliki sakaia dukyara, Jisas ai disaipelka nani ra blikan “naha tasbaia ingnika” kaia (Mt. 5:14). Disaipelka nani ba ai ingnika ba param marikan ai daukanka pain nani bak bara ai lama uplika nani ra spirit tanka ba sin smalkan.
3. Yawan tanka kasak ba dukyara nahki kulkanka aiska yabaia sip sa?
3 Gâd uplika nani mapara ‘ingni luhpia nani baku taukaia ba’ diara kum tara sa, baha mita ani anira kabia upla nani ra smalkisa (Epe. 5:8). Ban kra wark pliska bara skul ra ris takisa pyua ra upla mawan ra Baibil, apia kaka ulbi sakanka kum aisi kaikbia ba sanska wankbia Baibil wina aisanka kum ta krikaia. Baku tnatka ra, wahma lupia kum Baibil stadika kum ta krikan bara skulka watla pânika nani mihta ra buk 12 swin!
4. Dia muni spirit laka ra ‘ingni kaia’ ba wan daukanka pain nani wal prakisa?
4 Wan daukanka pain. Spirit laka ra ingni kaia ba tanka sa wan daukanka pain nani ba marikaia (Epe. 5:9). Wark pliska ra, skul watla ra bara plis wala nani ra, wan daukanka pain marikbia kaka, sanska wankbia upla nani ra tanka kasak ba smalkaia (1 Pi. 2:12). Sampla baku, skul watla kum ra tuktan lupia kum 5 mani bri kan ba ai daukanka pain bri kan tawan, maestruka ba tuktika aisika bara yaptika ra win: “Yang naha sat tuktika diara tanka pain bara saura bri ba baku tuktan wala kau kaikras!” Kasak pali wiaia sip sa smalkaia warkka bara wan daukanka pain upla ra mariki ba “raya kaia yabi ingnika” bribia sanska yabisa, baku sin Gâd ra mayunanka yabisa.