¿Dîa sip sma ba kat Jehova wina lan takisma ki?

1. ¿Jehova ai napakanka nani ra smalkaia ba nahki kaikisa?

¹ Jehova wan ‘Smasmalkra Tara’ sa, baha mita Witin yawan ra wan smalkisa (Ais. 30:20). Witin ai Luhpia tawahkia ra pas smalkan (Jn. 8:28). Adam Gâd mapara buan ningkara, upla nani ba saurakira takan, sakuna Jehova latwan lâka wal ban smalki kan (Ais. 48:17, 18; 2 Ti. 3:14, 15).

2. ¿Dîa sât smalkanka ba tasba aiska ra daukisa?

² Naiwa piua ra, Jehova tasba aiska ra smalkaia warkka ba tâ brisa. Prapit Aiseya aisan baku upla manis plis nani sut wina ‘Jehova ilka tara ba ra aidrubisa’ (Ais. 2:2). ¿Dîa muni bahara wisa? ¡Jehova ai smalkanka nani bara ai lâka nani ba walaia dukiara! (Ais. 2:3.) Mani 2010 ra, Jehova Witniska nani ba 1.600.000.000 awar nani daukan upla nani ra tânka kasak ba smalkaia dukiara. Baku sin, wik bani spirit lâka ra upla nani ra smalkisa 105.000 kangrigisanka nani ra. Alba kasak yamnikira ba 500 bîla aisanka nani ra ulbi sakanka nani ba ridi daukan sa.

3. Jehova smalkanka nani wina, ¿dîa blisinka brin sa?

³ Yamnika nani bris. ¡Jehova smalkanka nani ba wina blisin manis brin sa! Yawan lan takan Gâd ai nina brisa bara yawan ra lukisa (Law. 83:18; 1 Pi. 5:6, 7) Baku sin lan takan makabi walanka nani upla nani dauki ba ansika yabaia: ¿Dîa muni yawan pruisa? ¿Rait aihwa liliaka lâka ba nahki sakaia sip sa? ¿Dîa dukiara wan paskan? Jehova ai lâka nani wankan sa yawan klin iwaia bara wan rayaka ra lilia lâka briaia (Jas. 1:8).

4. Jehova smalkanka nani yawan alki briaia ba, ¿ani nani sa bara dîa muni yawan dîa sip ba kat Witin wina lan takaia sa ki?

⁴ Jehova naha smalkanka nani ba ai uplika nani sut ra yabisa Witin warkka daukbia dukiara. Wahia nani 4 wina 6 ba kat takisa Jehova wan smalki ba natka nani ba. Jehova smalkanka nani wanki ba sut sip alki briras kaka, ¿yawan trai munisa alki briaia dîa sip nani ba? ¿Wahma tiara nani ra kupia bukisa Jehova smalkanka nani ba alki daukaia, apia kaka kupia bukisa skul tara nani dimaia? ¿Witin nani ra hilp munisa ai rayaka ra Jehova smalkanka nani pas pliska ra mangkaia? Yawan dîa sip ba kat Jehova wina lan takisa kaka, hilp wan munbia lilia iwaia bara raya ban kaia lâka ba briaia (Law. 119:105; Jn. 17:3).

Jehova wan smalki natka nani yawan alki briaia sip ba

Aisi kaikaia bara ulbaia skulka ba

• Dîa dukiara daukisa: Upla ra hilp munisa aisi kaikaia bara ulbaia, baku sip kabia Baibil stadika kum bribia bara upla wala nani ra smalkaia.

• Piu an bilara daukisa: Naha ba daukisa nitka bâra sa taim.

• Anira daukisa: Aidrubanka Watla kau lamara ba ra.

• Ya nani dimaia sip sa: Smalki tataukra sut bara lan takaia want uplika nani ba.

• Dîa daukaia sa dimaia dukiara: Kangrigisan almukka nani ba laki kaikisa ahkia daukaia, baku sin upla sut ra kupia bukisa dimaia.

Nahki Smalkaia ba Skulka

• Dîa dukiara daukisa: Smalki tataukra nani ra lan daukisa sturi yamni ba kau pain smalkaia.

• Piu an bilara daukisa: Ban dauki kabia.

• Anira daukisa: Aidrubanka Watla kau lamara ba ra.

• Ya nani dimaia sip sa: Smalki tataukra nani sut. Baku sin, upla wala nani aidrubanka nani ra wisa bara Jehova smalkanka nani ba ai rayaka ra alki dauki ba.

• Dîa daukaia sa dimaia dukiara: Nahki Smalkaia ba Skulka tâ bri uplika ba wal aisas.

Tringsar Bîla Lan Dauki Skulka

• Dîa dukiara daukisa: Smalki tataukra nani ra lan daukisa tringsar bîla nani ra smalkaia.

• Piu an bilara daukisa: Kati 4 apia kaka 5 bilara daukisa. Skulka nani ba satadi yua titan ra daukisa, awar kum apia kaka wâl.

• Anira daukisa: Asla Aidrubanka Watla ra kau lamara ba ra.

• Ya nani dimaia sip sa: Smalki tataukra nani tringsar bîla kum lan takaia want ba dimaia sip sa.

• Dîa daukaia sa dimaia dukiara: Betel apiska ba laki kaikisa ahkia daukaia.

Asla Aidrubanka Watla nani Mâkaia

• Dîa dukiara daukisa: Asla Aidrubanka Watla nani mâkaia dukiara sa. Naha ba skul kum apia sa, sakuna bahara wark taki nani ba diara manis lan takisa.

• Piu an bilara daukisa: Wark taki uplika nani mihta ra sa piu an bilara naha warkka daukaia.

• Anira daukisa: Wan Kuntrika Aiska ra Aidrubanka Watla Paski daknika ba laki kaikisa ahkia daukaia. Bahara wark taki nani ra paiwaia sip sa plis wala nani ra wih hilp munaia trabil tara kum takisa piua ra.

• Ya nani daukaia sip sa: Muihni lakri nani aihtabi takan bara kangrigisan daknika mita adarka yabisa kaka naha warkka daukaia sip sa. Witin nani lankira apia kaka lan âpu kabia sin daukaia sip sa.

• Dîa daukaia sa dimaia dukiara: Cuestionario sobre el trabajador voluntario en Salones del Reino (S-82-S) wauhkataya ba kangrigisan almukka nani ra makabaia sip sa bara ulbi banhkaia sa.

Tâura Smasmalkra nani Skulka

• Dîa dukiara daukisa: Tâura smasmalkra nani ra hilp munisa “swaki sakan sturka yamni aisi smalkaia” (2 Ti. 4:5).

• Piu an bilara daukisa: Wîk wâl bilara daukisa.

• Anira daukisa: Betel apiska ba laki kaikisa ahkia daukaia; naha ba Asla Aidrubanka Watla kum kau lamara ba ra daukisa.

• Ya nani dimaia sip sa: Ya nani tâura smasmalkra takan wina pat mani kum brisa kaka.

• Dîa daukaia sa dimaia dukiara: Tâura smasmalkra nani sut dimaia sip sa impaki pura kakaira ba mita paiwisa.

Betel ra Wark Taki nani Dukiara Skulka

• Dîa dukiara daukisa: Naha skulka ba Betel ra wark taki uplika raya nani ra hilp munisa ai warkka kau pain daukaia.

• Piu an bilara daukisa: Naha skulka ba wîk bani, awar kum, bara 16 wîk bilara daukisa.

• Anira daukisa: Betel apiska nani ra.

• Ya nani dimaia sip sa: Betel ra iwi nani bara Betel ra bal wilinkira piua wihka takaskbia nani ba sin (mani kum apia kaka kau).

• Dîa daukaia sa dimaia dukiara: Betel ra iwi uplika kaia sa.

Kangrigisan Almukka bara Hilp Mamunra Skulka

• Dîa dukiara daukisa: Naha skulka ba kangrigisan almuk bara hilp mamunra nani ra lan daukisa ai warkka kau pain daukaia (Ap.St 20:28). Naha skulka ba ahkia daukaia Tâ Bri Daknika laki kaikisa.

• Piu an bilara daukisa: Mani luan ba ra baha skulka ba yu kum pura bakriki bilara dauki kan kangrigisan almuka nani dukiara bara hilp mamunra nani dukiara yu kum baman dauki kan.

• Anira daukisa: Asla Aidrubanka Kau Tara Watla bara Aidrubanka Watla kau lamara ba ra.

• Ya nani dimaia sip sa: Kangrigisan almukka bara hilp mamunra nani sip kabia bâra kaia.

• Dîa daukaia sa dimaia dukiara: Impaki pura kakaira mita kangrigisan almukka bara hilp mamunra nani ra paiwisa.

Kangrigisan Almukka nani Skulkaa

• Dîa dukiara daukisa: Kangrigisan almukka nani ra hilp munisa ai warkka kau pain daukaia.

• Piu an bilara daukisa: Yu matsip bilara.

• Anira daukisa: Betel apiska ba wina laki kaikisa anira daukbia ba Asla Aidrubanka Kau Tara Watla bara Aidrubanka Watla kau lamara ba ra.

• Ya nani dimaia sip sa: Kangrigisan almukka nani.

• Dîa daukaia sa dimaia dukiara: Betel apiska wina kangrigisan almukka nani ra paiwisa.

Impaki Pura Kakaira bara ai Maritka nani Skulkab

• Dîa dukiara daukisa: Naha skulka ba impaki pura kakaira bara dakni tara pura kakaira ba ra hilp munisa kangrigisan nani ra sin hilp munaia. Baku sin “aisaia bara smalkaia warkka” karna daukaia hilp munisa (1 Tim. 5:17; 1 Pi. 5:2, 3).

• Piu an bilara daukisa: Kati wâl bilara daukisa.

• Anira daukisa: Betel apiska ba laki kaikisa anira daukaia.

• Ya nani dimaia sip sa: Impaki pura kakaira bara dakni tara pura kakaira bâra kaia sa.

• Dîa daukaia sa dimaia dukiara: Betel apiska impaki pura kakaira nani bara ai maritka nani ra paiwisa.

Kristian Waitna Mayas nani ba dukiara Skulkac

• Dîa dukiara daukisa: Kangrigisan almukka nani bara hilp mamunra nani mayas ba ra lan daukisa ai warkka kau pain daukaia. Naha skulka tnata mangkan nani ba ai kuntrika ra blikisa nitka tara bri ba pliska nani ra. Kum kum ba kuntri wala nani ra smalkaia blikisa.

• Piu an bilara daukisa: Kati wâl bilara daukisa.

• Anira daukisa: Betel apiska ba laki kaikisa ahkia daukaia; Asla Aidrubanka Kau Tara Watla bara Aidrubanka Watla kau lamara ba ra.

• Ya nani dimaia sip sa: Kristian waitna nani mayas bâra kaia sa, bara 23 wina 62 mani nani bri kaia sa, ai wîna tara pain kum bri kaia sa. Baku sin anira nitka tara bri ba ra waia wilin kaia nit sa (Mk. 10:29, 30). Witin nani ba mani wâl apia kaka kau ailal kangrigisan almukka apia kaka hilp mamunra baku kaia sa.

• Dîa daukaia sa dimaia dukiara: Naha skulka kuntrikam ra daukisa kaka, asla aidrubanka kum bâra kabia Yu Wâl Aidrubanka piua ra. Baha yua ra kau baha dukiara aisabia.

Marit nani dukiara Skulkad

• Dîa dukiara daukisa: Marit nani ra hilp munisa smalkaia warkka ba kau pain daukaia dukiara, baku Jehova asla takanka ba ra yus munaia sip sa. Naha skulka tnata mangkan nani ba ai kuntrika ra blikisa nitka tara bri ba pliska nani ra. Kum kum ba kuntri wala nani ra smalkaia blikisa.

• Piu an bilara daukisa: Kati wâl bilara daukisa.

• Anira daukisa: Naha pas daukan ba Miriki kuntrika ra, Watchtower skulka watla, naha ba Patterson (Nueva York) tawanka ra sa. Baha wina Betel apiska ba laki kaikisa anira daukaia; Asla Aidrubanka Kau Tara Watla bara Aidrubanka Watla kau lamara ba ra.

• Ya nani dimaia sip sa: Marit nani ba 25 wina 50 mani bri kaia sa, ai wîna tara pain kum bri kaia sa. Wilin kaia sa anira nitka tara bri pliska nani ra waia, bara Aiseya baku wiaia sa: “Yang nâra sni, yang ai blîks” (Ais. 6:8). Baku sin, witin nani ba marit takan wina mani wâl bri kaia sa, bara piu aiska smalkaia warkka ra mani wâl briaia sa.

• Dîa daukaia sa dimaia dukiara: Naha skulka kuntrikam ra daukisa kaka, asla aidrubanka kum bâra kabia Yu Kumi Aidrubanka piua ra. Baha yua ra kau baha dukiara aisabia.

Misan Uplika nani Skulka

• Dîa dukiara daukisa: Misan uplika nani ra lan daukisa piu aiska kuntri wala nani ra smalkaia warkka ba daukaia.

• Piu an bilara daukisa: Kati matsip bilara daukisa.

• Anira daukisa: Miriki kuntrika ra, Watchtower skulka watla, naha ba Patterson (Nueva York) tawanka ra sa.

• Ya nani dimaia sip sa: Marit nani ba aihtabi takan wina mani yumhpa bri kaia sa, bara 21 wina 38 mani ba kat bri kaia sa. Wauhkataya kum pas ulbi banhkaia sa bara inglis bîla sin aisi kaia sa. Witin nani ba marit takan wina mani wâl briaia, bara aikuki sin mani wâl smalkaia warkka ba bri kaia sa. Ai wîna tara mapara pain kaia sa. Smalki tataukra nani ba, Betel uplika nani ba, Kangrigisan Almukka nani bara Hilp Mamunra Skulka wina takan nani ba, baku sin Kristian Waitna Mayas nani ba dukiara Skulka dimi danh takan nani ba bara Marit nani dukiara Skulka wina takan nani ba sin dimaia sip sa.

• Dîa daukaia sa dimaia dukiara: Kuntri kum kum ra, naha skulka ba daukisa bara dimaia dukiara Yu Yumhpa Aidrubanka ra asla takanka kum daukisa. Naika piua ra kau baha dukiara aisabia. Kuntrikam ra naha asla takanka ba daukras sa kaka, Betel apiska ra ulbaia sip sma.

Betel Apiska nani Pura Kaiki bara ai Maritka nani dukiara Skulka

• Dîa dukiara daukisa: Naha skulka ba Betel apiska nani pura kaiki uplika nani ra hilp munisa ai warkka kau pain daukaia. Baku sin nahki kangrigisan nani ra taki trabilka nani tâ baikaia, impaki pura kakaira nani, smalkaia pliska nani, bîla lakaia warkka, ulbi sakanka nani warkka bara diara wala nani sin pura kaikaia dukiara (Lk. 12:48b).

• Piu an bilara daukisa: Kati wâl bilara daukisa.

• Anira daukisa: Miriki kuntrika ra, Watchtower skulka watla, naha ba Patterson (Nueva York) tawanka ra sa.

• Ya nani dimaia sip sa: Betel apiska nani pura kaiki uplika nani bâra kaia sa.

• Dîa daukaia sa dimaia dukiara: Kristian waitna Betel apiska nani ra pura kaiki ba bara ai maritka nani ba bâra kaia sa, Tâ Bri Daknika ba mita paiwisa baha skulka dimaia.

[Wahya mina ulbanka ba]