¿Smalkaia warkka bara wark wala nani daukbia dukiara Jehova witniska nani ba ai uplika nani ra nahki lan daukisa?

Jehova witniska nani ra kristian rayaka ra wark sât sât daukbia dukiara piua bani lan daukisa. Naha warkka nani tilara sa: Gâd Kingka lâka sturka yamni nani ba smalkaia bara upla nani ra lan dauki disaipil nani daukaia (Matiu 24:14; 28:19, 20). Wik bani wan asla aidrubanka nani ra bara aidrubanka tara nani mani bani dauki ba ra naha lan daukanka ba brisa. Baku sin kangrigisan bilara apia kaka Gâd asla takanka ra wark wala nani bri Jehova witniska nani ra, natka kau ailal ra lan daukisa bara naha skulka nani ba Baibil ra ai bapanka brisa.

Naha ulbi sakanka ra naha tânka nani dukiara laki kaikbia:

¿Smalkaia warkka bara wark wala nani daukbia dukiara Jehova witniska nani ba ai uplika nani ra nahki lan daukisa?

Kangrigisan asla aidrubanka nani. Wik bani yang nani Jehova witniska nani ba, dakni baku wan asla aidrubanka watla nani ra asla aidrubi banhwisna, bara naha daknika nani ra nina mâkisa kangrigisan nani. Pas asla aidrubanka ba wik bilara daukisa bara wala ba wik tnata ra. Upla sut balaia sip sa bara aima kumi ra sin kaliksan makabras sa.

Wik bilara asla aidrubanka ba . Naha aidrubanka ra lan takisa, nahki pain aisi kaikaia, upla sut mawanra aisanka nani yabia, upla nani ra smalkaia bara sibrin briraskira upla nani ra Baibil dukiara lan daukaia. Aidrubanka programika tilara sa: aisanka nani, makabi walanka nani, marikanka nani bara lilka nani. Naha sut hilp wan munisa lankira natka ra Gâd bîla ba wilin uplika nani ra smalkaia bara Baibil klaska nani sin yabia dukiara. Naha asla aidrubanka ra asla taki uplika nani sut ra hilp munisa Gâd ra ai kasakka lukan lâka bara latwan lâka bri ba kau dutki daukaia bara muihni lakri nani ra kau latwan kaikaia dukiara sin.
Wik tnata aidrubanka ba. Naha aidrubanka ba pîs wâl ra baiki sakan sa, pas pîska ra upla sut dukiara aisanka kum yabisa bara pîska wala ba stadi takaia dukaia La Atalaya a wauhkataya ba laki kaikisa. Stadika kumi bani ba tânka sât sât bara Baibil smalkanka nani dukiara aisisa, naha nani ba smalkaia warkka ra bara wan rayaka ra nahki yamni wan muni ba dukiara lan takisa.

Aidrubanka kau tara nani ba. Naha nani ba asla aidrubanka tara nani sa, mani bilara aima yumhpa daukisa bara kangrigisan ailal nani asla aidrubi banhwisa. Baibil smalkanka nani tila wina lal aisanka kum saki, aidrubanka aiska ra laki kaikisa. Naha aidrubanka tara ra aisanka nani, marikanka nani, upla rayaka ra takan sturka nani bara lilka nani sin kaikisa. Wan aidrubanka wala nani baku, naha aidrubanka tara ba piua lilia kum sa, kan Baibil smalkanka nani ba tihu ra laki kaikisa bara hilp wan munisa sturi yamni nani ba natka kau pain ra smalkaia dukiara. Upla sut ra yamni pali brisa bara kaliksan makabras sa.

Jehova witniska nani dukiara Baibil skulka nani

Jehova witniska kum kum ra, Baibil skulka tihu nani bribia dukiara paiwisa. ¿Dîa sât skulka nani sa? ¿Dîa lukanka wal daukisa bara piua an dukiara sa? ¿Ya nani waia sip sa?

Tâura Smasmalkra Skulka ba

Dîa lukanka wal daukisa: Naha skulka ba tâura smasmalkra b, wibia sa kaka piua aiska smalki tauki Jehova witniska nani dukiara sa, naha ra lan takisa nahki smalkaia warkka ra kau lankira takaia. Klaska kumi bani ra tânka sât sât dukiara laki kaikisa, marikanka nani daukisa, aisanka nani yabisa bara dîa lan takan ba dukiara pana pana aisisa.
Piua an ra daukisa: Yua 6 bilkara.
Ya nani waia sip sa: Tâura smasmalkra warkka dauki pat mani kum alkan uplika nani bara mani 5 bilara naha skulka ra kau waras tâura smasmalkra nani sin.

Tâura smasmalkra skulka ra stadi tatakra wâl ba marikanka kum daukisa bara wala nani ba witin nani ra aman walisa.

King Lâka Sturka Smalki nani Skulka

Dîa lukanka wal daukisa: Tâura smasmalkra lankira nani ra kau lan daukaia dukiara sa. Naha skulka ra stadi tatakra nani ba lan takisa nahki smalkaia warkka ba kau pain daukaia bara smasmalkra kau lankira takaia, baku sin Baibil tânka tihu nani laki kaikisa. Naha skulka wina takan muihni lakri manis ra paiwisa nitka bri pliska nani ra smalkaia warkka ba wih tâ baikbia dukiara. Bara dîa pliska ra blîkbia kra sin witin nani waia wilin kaia sa.
Piua an ra daukisa: Kati wâl bilkara.
Ya nani waia sip sa: Tâura smasmalkra nani naha skulka ra waia dukiara makabanka ulbi dingkan nani ba, naha kristian waitna bara mairin nani ba naha skulka ra waia dukiara makabanka ra dîa ulban ba ai rayaka wal asla kaia nit sa.

Kangrigisan Almukka nani dukiara Skulka ba

Dîa lukanka wal daukisa: Naha skulka ba kangrigisan almukka c nani ra hilp munisa ai warkka ba pain daukbia dukiara. Naha warkka tilara sa, muihni lakri nani ra smalkaia bara spirit lainka ra main kaikaia. Baku sin, naha skulka ba witin nani ra hilp munisa Gâd ra bara muihni lakri nani ra ai latwanka lâka bri ba kau dutki daukaia dukiara (1 Pita 5:2, 3).
Piua an ra daukisa: Yua 5 bilkara.
Ya nani waia sip sa: Bisi pali kangrigisan almukka baku mangkan kristian waitna nani bara 5 mani bilara kau naha skulka ra waras kangrigisan almukka nani sin.

Kangrigisan almukka nani dukiara skulka ra kristian waitna kum ba aisanka kum yabisa.

Impaki Pura Kakaira bara ai Maya Mairin nani dukiara Skulka ba

Dîa lukanka wal daukisa: Naha skulka ba impaki pura kakaira d nani ra ridi daukisa, witin nani kangrigisan nani pura kaiki warkka ba pain daukbia dukiara (1 Timoti 5:17). Naha skulka ba impaki pura kakaira bara ai maya mairin nani ra hilp munisa Baibil smalkanka nani ba kau pain ai tânka bribia dukiara.
Piua an ra daukisa: Kati kum bilkara.
Ya nani waia sip sa: Naha warkka dauki pat mani kum alkan impaki pura kakaira nani bara ai maya mairin nani, baha ningkara mani 5 bilara kli witin nani ra paiwisa.

Impaki pura kakaira bara ai maya mairin nani dukiara skulka ra stadi tatakra nani ba aman walisa.

Kangrigisan Almukka bara Hilp Mamunra nani dukiara Skulka ba

Dîa lukanka wal daukisa: Naha skulka ba kangrigisan almukka bara hilp mamunra e nani ra kangrigisan bilara ai warkka ba pain daukbia dukiara hilp munisa. Naha skulka ra laki kaikisa kangrigisan nitka nani bara trabil bri piua ra nahki hilpka lâka yabaia sip sa (2 Timoti 3:1). Naha skulka na mani bani lika daukras sa.
Piua an ra daukisa: Yua kumi bilara, kuna sam taim chens takaia sip sa.
Ya nani waia sip sa: Impaki pura kakaira, kangrigisan almukka nani bara hilp mamunra nani sin.

Kangrigisan almukka bara hilp mamunra nani dukiara skulka ra stadi tatakra nani sut aikuki lilka kum alkisa

Betel ra Wark taki nani dukiara Skulka ba

Dîa lukanka wal daukisa: Betel f ra wark taki muihni lakri nani ra hilp munisa ai warkka ba kau pain daukbia dukiara, baku sin hilp munisa Gâd ra bara muihni lakri nani ra latwan lâka bri ba kau dutki daukbia dukiara.
Piua an ra daukisa: Yua 5 bara bakriki bilkara.
Ya nani waia sip sa: Betel ra raya diman muihni lakri nani bara pat mani 5 bri kuna naha skulka ra kau waras nani sin.

Betel ra wark taki nani dukiara skulka ra stadi tatakra kum ba ai smasmalkrika bara stadi tatakra wala nani mawanra aisanka kum yabisa.

Galaad Skulka ba

Dîa lukanka wal daukisa: Naha skulka ra stadi tatakra nani ra lan daukisa Gâd bîla ra kau latwan kaikaia bara hilp munisa dîa lan taki ba ai rayaka ra alki daukbia dukiara (1 Tesalonaika 2:13). Naha skulka ra dimi muihni lakri nani ba, Gâd asla takanka bara smalkaia warkka mapara kau yuskira taki banhwisa. Naha wina taki muihni lakri nani ba, ai kuntrika apia kaka kuntri wala ra smalkaia warkka ba tâ baikaia apia kaka Betel apiska kum ra wark takaia blikisa.
Piua an ra daukisa: Kati 5 bilkara.
Ya nani waia sip sa: Naha tilara sa Jehova witniska kum kum piua aiska smalki tataukra warkka dauki ba, misan uplika nani, Betel ra wark taki nani bara impaki pura kakaira nani bara ai maya mairin nani. Naha skulka ra waia dukiara paiwanka ba Betel apiska tara wina blikisa. Naha skulka ba Watchtower skulka nani yabi pliska, Patterson (Nueva York) tawanka ra daukisa.

Galaad skulka ra smasmalkra kum ba ai stadi tatakra nani ra Jerusalem tempelka sirpi ra mâkan ba marikisa.

Apis Tara Pura Kaiki Daknika ra Wark Taki Kristian Waitna bara ai Maya Mairin nani dukiara Skulka ba

Dîa lukanka wal daukisa: Naha skulka ba apis tara pura kaiki daknika g ra wark taki nani ra hilp munisa apis tara pura kaikaia warkka ba pain daukbia dukiara bara baha kuntrika apia kaka kuntri wala nani ra, Jehova witniska nani warkka ba pura kaikaia dukiara sin.
Piua an ra daukisa: Kati wâl bilkara.
Ya nani waia sip sa: Tasba aiska ra Betel apiska kau tara ra, apis tara pura kaikaia daknika ra wark taki kristian waitna bara ai maya mairin nani ra paiwisa. Naha skulka ba Watchtower skulka nani yabi pliska, Patterson (Nueva York) tawanka ra daukisa.

Apis tara pura kaiki daknika ra wark taki nani dukiara skulka ra smasmalkra kum ba ai stadi tatakra nani mawan ra Baibil aisanka kum yabisa

¿Jehova witniska nani ra yabi skulka nani ba diaura ai bapanka bri sa?

Baibil ra, Jehova witniska nani mapara kau tânka tara bri bukka ba sika Baibil sa bara naha yus munisa ai skulka nani briaia dukiara. Yang nani kasak luki banhwisna Baibil ba Gâd wina balan bara ai smalkanka nani ba wan rayaka aiska ra hilp wan munaia sip sa (2 Timoti 3:16, 17).

¿Naha skulka nani briaia dukiara lalah aibapaia sa ki?

Apia. Skul nani sut ba mana luha sa bara prisant yabi ba wal daukisa (2 Korint 9:7).

a Wan Internet pliska jw.org ra Baibil, lilka nani bara Baibil stadi takaia dukiara hilpka nani pliki sakaia sip sma.

b Tâura smasmalkra nani ba, pat tahbi daukan lâka brin Jehova witniska nani sa. Witin nani ba smalkaia warkka ra, kati bani awar nani daukaia sa. Naha kristian waitna bara mairin nani ba, Baibil smalkanka nani ba ai rayaka ra alki dauki uplika nani sa bara wala nani ra ai daukanka nani wal tânka pain mariki banhwisa.

c Kangrigisan almukka nani ba spirit lainka ra pâwan kristian waitnika nani sa, witin nani ba dîa smalki ba sut Baibil ra ai bapanka brisa bara Gâd uplika nani ra hilp munisa, main kaikisa bara kupia bukisa. Witin nani ra ai warkka dauki mana aibapras sa.

d Impaki pura kakaira nani ba kangrigisan almukka kum sa, witin ba ai piua aiska yus munisa kangrigisan sât sât ra wih kaikaia dukiara. Baku sin baha kangrigisanka nani ra Baibil wina aisanka nani yabi, muihni lakri nani ra kupia bukisa bara baha wikka ra wih kaiki kangrigisanka aikuki smalkaia warkka ba tâ baiki sa.

e Hilp mamunra nani ba kangrigisan bilara muihni lakri nani dukiara wark sât sât daukisa. Witin nani hilpka ra tingki kangrigisan almukka nani ba sip sa muihni lakri nani ra spirit lainka ra main kaikaia bara smalkanka yabaia dukiara ai taimka aiska ba yus munaia.

f Tasba aiska ra Jehova witniska nani bri apiska nani ra Betel nina mâkisa, baha ra muihni lakri nani ba piua aiska wark taki banhwisa.

g Apis tara pura kaiki daknika ra, spirit lainka ra pâwan kristian waitna yumhpa apia kaka kau ailal bâra sa.

¿Naha skulka nani wina Jehova witniska nani ba dîa yamnika sakan sa?

“Upla nani wal aisaia sringka brisna ba mita, Baibil dukiara tringsar nani wal aisaia uba karna ai munisa, kuna wik bilara aidrubanka nani ra tingki, yang lan takri kupia karna lâka briaia bara lankira natka ra upla nani ra smalkaia. Baku sin hilp ai munan muihni lakri nani wal kau aisaia bara warkki uplika nani wal sin” (Natasha, Stech kuntrika wina).
“King lâka Sturka Smalki nani skulka ba hilp ai munan latwan lâka, umpira kaikan lâka, wihka bîla kaikanka lâka bara daukanka painkira wala nani sin pakaia. Baku sin lan takri nahki sip sna, pana kau pain kum kaia bara laimara iwi uplika nani ra sin kau yamni munaia, naha skulka ba Baibil smalkanka nani pliki sakaia bara upla nani ra smalki kupia alkaia hilp ai munan” (Stephen, Nigeria kuntrika wina).
“Kangrigisan Almukka nani dukiara Skulka ba hilp ai munan, bawan lâka ba pakaia, naha ba nit kapri warkki ba kau pain daukaia dukiara. Naha skulka ra walri aisanka nani ra tingki tâinka briri Jisas daukanka nani ba nahki kau pain nina blikaia sip sna” (Luca, Italia kuntrika wina).
“Kangrigisan Almukka bara Hilp Mamunra Skulka ra lan takri, dîa muni wala nani ra aman walaia wilin kaia, kupia pihni bara latwan lâka marikaia ba tânka tara brisa. Baku sin lan takri wala nani dukiara diara nani daukisna taim, latwan lâka ba kupi bukaia sa bara wark kum baku kaikaia apia sna” (Samuel, Reino Unido kuntrika wina).
“Galaad Skulka ba hilp wan munan Gâd bîla ba wan mawan kaikaia glaska kum baku yus munaia bara wan wîna kat laki kaikaia (Jems 1:22-25). Tânka bri banhri yang nani wan daukanka bara Jehova warkka dauki natka ra chens kum kum daukaia nit kan ba, baku sin lan taki banhri wan yamnika ra lukaia watlika ra wala nani yamnika ra lukaia sa bara wan daukanka bara wan aisanka nani sut latwan lâka mita tâ briaia sa” (Elnathan bara Princess, Filipinas kuntrika wina).