Smalkisa piua ra tânkira kaia sa
1. Smalkaia warkka ra, ¿dîa muni tânkira taukaia sa?
1 Naiwa piua ra, Gâd napakanka nani “upla saura nani bara tâskikira nani ba tilara” smalkaia warkka ba daukisa. Bara ‘sîp baku yul wail nani tilara sa’ (Mt. 10:16; Pil. 2:15). Plis ailal ra upla nani ba asla taki gabamint mapara buisa, warbanka nani daukisa, rau munan lâka bara upla ra taiban lâka ra plis wala ra brih wisa. Naha ba wan marikisa upla nani ba ‘kau saura takisa’ (2 Ti. 3:13). ¿Ani Baibil smalkanka ba hilp wan munbia smalkaia warkka ra tânkira taukaia? (Mt. 10:16.)
2. ¿Smalkisa taim ani piua ra pain kabia plis wala ra wih smalkaia?
2 Tânkira lâka marikaia. Sins Lâka 22:3 ba ra marikisa yawan trabil kum kaikuya taim mahka wabia kaka sins lâka marikisa. Baha mita, piu bani ra tânkira lâka wal taukaia sa. Plis kum ba trabil âpu baku sa, sakuna ban wina trabil kum takaia sip sa. Ban kra ban wina pulis ailal balaia sip sa bara upla ailal baha pliska ra aipaswaia, apia kaka upla kum wan wibia kau pain kabia man nani mahka wama. Dîa takbia sapa biki kaikaia watlika ra kau pain kabia mahka waia bara plis wala ra wih smalkaia (S.L 17:14; Jn. 8:59; 1 Tes. 4:11).
3. Smalkaia warkka ra Smasmalkra 4:9 dîa wi ba, ¿nahki alki daukbia ki?
3 Yakan taukaia apia. Smasmalkra 4:9 ra wisa: “Kau yamni sa wâl ba wihki kumi ba wal”. Ban kra nawas kat yakan smalkaia lan sa bara diara kumi sin wan takras sa. ¿Sakuna baha pliska ra yakan taukaia ba trabil âpu sa? Ban kra, baha pliska ra diara takras, sakuna pain apia kabia kristian waitna kum apia kaka kristian mairin kum plis kum kum ra yakan wabia bara tihmia ra smalki taukisa kaka yakan taukaia apia sa. Upla sut nu sa yawan pâna pain kum wal taukisa taim wan kan kahbaia sip sa (Smas. 4:10, 12). Yawan sut ba wan pânika wala smalki tauki ba dukiara lukaia bara mahka waia lukisa kaka, pain kabia upla kum ra maisa pakaia.
4. Smalkaia warkka ra trabil âpu kira smalkaia dukiara, ¿yawan kumi bani ba dîa daukaia sip sa?
4 Kangrigisan almukka nani ba wan ‘sulka nani main kaikisa’. Witin nani plis kum ra nahki taukaia ba wan wiaia sa (Hib. 13:17). Bawan lâka bri bîla wawalra sa kaka, Jehova wan warkka daukaia trai muni ba blisin munbia (Miq. 6:8; 1 Ko. 10:12). Bîla kaikisa smalki tataukra nani ba ai warkka ba pain daukbia, sakuna daukisa piua ra tânkira lâka wal taukbia.