Nu Takan Daukisa

◼ ¿Aidrubanka nani ra apia kaka smalkisa piua ra celular ba yus munaia dukiara dîa smalkanka nani bâra sa?

“Diara sut ai piua brisa.” (Smas. 3:1.) Celular nani ba upla ra hilp munisa upla wala nani wal aisaia bara maisa pakanka nani ulbi blikaia ani piua ra want ba. Sakuna piua kum kum ra yawan want apia sa celular nani ba ambuk wan munbia. Sampla baku, aidrubanka nani ba Jehova ra mayunaia piua sa, spirit lâka ra smalkanka nani brisa bara pana pana wan walka nani ra tâ baikisa (Kli.S 31:12; Law. 22:22; Ro. 1:11, 12). ¿Wan celularka nani ba daskaia sip sa bara aidrubanka wina takbia taim maisa pakanka nani brisa kaka laki kaikaia? Bara maisa pakanka kum nit ba bîla kaikisma bara celularkam ba angki swiaia nit sma, sip sma upla wala ra ambuk munras natka kum ra angki swiaia.

Sturi yamni ba dukiara diara sut daukisa (1 Ko. 9:23). Smalki tauki kabia taim piua kum kum ra pain kabia celular ba yus munbia. Sampla baku, smalkaia warkka tâ baiki uplika ba yus munaia sip sa muihni lakri wala nani ra plis wala ra smaki bâra winaia. Smalki tataukra kum kum ba celular ba yus munisa kau nu takan dauki uplika nani ra winaia apia kaka Baibil stadika nani uba laihura iwi nani ra winaia dukiara. Yawan celular kum brih taukisa kaka, aman kaikaia sa watla dawanka kum wal aisi kabia taim wan takaskbiara (2 Ko. 6:3). Smalki tataukra wala nani ra bîla kaiki kabia taim, wan pânika kum ra winaia apia kaka maisa pakanka nani bliki kaia watlika ra, ¿dîa muni smalkaia warkka ra wan sinska mangkras apia kaka aikuki smalki taki uplika nani dukiara lukaia?

Upla wala yamnika ra luks (1 Ko. 10:24; Pil. 2:4). Yawan piua kumi ra sin want apia sa wan kupia lukras kira smalkaia aidrubanka nani ra let waia, bara lukaia celular bâk muihni lakri nani ra winaia ani ra taukisa sapa nu takaia dukiara. Yawan let wisa taim, daknika kum pat asla daukan ba kli paskaia sa. Piua kum kum ra trabil wan mapara balbia bara let wan alkbia. Sakuna, yawan piua bani ra sun wabia kaka, Jehova dîa win ba dukiara, smalkaia warkka tâ bri ba, bara wan muihni lakri wala nani dukiara luki ba marikisa.