¿Naha wauhkataya ba ya aisi kaikaia ai brinka kabia ki?
1. ¿La Atalaya bara ¡Despertad! wauhkataya nani ba yawan aisi kaikisa taim, dîaura lukaia sa, bara dîa muni?
1 La Atalaya bara ¡Despertad! paskan sa tasba aiska ra upla nani dukiara. Baha mita, ulbanka lalka nani ba tânka manis dukiara aisisa. Yawan silp naha wauhkataya nani aisi kaikisa taim, ya nani ba aisi kaikaia ai brinka kabia dukiara lukaia sa. Baha wina, trai munaia sa baha uplika nani mihta ra swiaia.
2. ¿Ani ulbanka lalka nani ba upla kum kum want kabia aisi kaikaia?
2 ¿Wark pânikam kum wal tânka kum dukiara aisaram kan ba nanara La Atalaya wauhkataya ra sim tânka dukiara aisisa ki? ¿Baha wauhkataya ra ulbanka lalka kum bâra sa pamalikam kum ra hilp munaia sip ba? ¿Man kakairikam kum bâra sa ¡Despertad! ra takan kuntrika kum ra bakisan baku auya sa? ¿Ulbanka lalka kum bisnis pliska kum apia kaka gabamint apiska kum ra wark taki uplika nani mapara aisi kaikaia ai brinka kabia? Sampla baku, wauhkataya kum ba upla almuk nani dukiara aisisa kaka, sip sa upla almuk nani main kaiki pliska kum ra brisi yabaia. Baku sin, layar nani apiska nani ra apia kaka pulis nani ba want kabia aisi kaikaia lâ krikan lâka tânka nani dukiara.
3. Tânka mariks nahki muni wauhkataya ulbanka lalka kum upla nani aisi kaikaia ai brinka bri ba ra yabisa kaka yamnika manis sakisa.
3 Yamnika nani. Sudáfrica kuntrika ra, marit uplika wâl ¡Despertad! wauhkataya, Waupasa kati, 2011 manka, “Cómo criar hijos responsables” ulbanka lalka aisi kaikan ningkara, 25 skul watla ra smalki kan pliska ra telepon bâk winan. Naha skulka watla nani wina 22 ba wauhkataya nani ba brin bara tuktan nani ra yaban. Baha wina, marit uplika wala kum ba sim lukanka brin bara witin nani smalki pliska ra skul watla nani bâra kan ba ra wih wauhtaya nani sin yaban. Bara skul watla kum ra maistru nani ba aitani lukan baha wauhkataya ba yus munaia tuktan nani ra smalkaia dukiara. Baha wina, naha marit uplika wâl ba impaki pura kakaira ba ra win dîa daukan ba. Bara witin ba kangrigisan nani ra kupia bukan witin nani smalki pliska ra skul watla nani ra wih smalkaia. Baha wina, Jehova Witniska nani apiska kum bahara bri ba makabanka ailal brin naha wauhkataya ba kau ailal sâkbia dukiara. ¡Baha mita naha wauhkataya ba kau ailal paskan!
4. ¿Dîa muni naha wauhkataya ba upla sut ra yabaia sa?
4 Wan wauhkataya nani ba naiwa piua ra dîa taki ba tânka ba param marikisa, baku sin Baibil bara Gâd Kingka lâka dukiara aisisa. Naha wauhkataya nani baman “swaki sakan sturka ba” upla ra smalkisa (Ais. 52:7). Baku sin, yawan want sa upla sut ra yabaia. Baha mita, makabi walaia sip sma: “¿Naha wauhkataya ba ya aisi kaikaia ai brinka kabia ki?”.