Nu Takan Daukisa

◼ Smalki tataukra kum ba aihtabi takras kainara, ¿ani pitka kat aidrubanka nani ra waia sa bara smalkaia warkka ba daukaia sa?

Aihtabi takaia lâka ba upla kum mapara diara kau tara kaia sa. Kangrigisan almukka nani ba kau laki kaikras ba ra uplika ba Gâd dîa makabi ba dukiara tânka bri kaia sa. Baku sin, uplika ai rayaka ra mariki kaia sa dîa dauki ba Gâd kupia lâka sa.

Kristian nani ra blikisa aidrubanka nani ra waia. Baha mita, aihtabi takras smalki tataukra kum ba aidrubanka nani ra waia sa (Hib. 10:24, 25). Kau aihtabi takras smalki tataukra kum ba aidrubanka nani ra ai mihta buki aisanka sirpi nani yabaia sip sa. Baku sin, Nahki Smalkaia ba Skulka ra ai nina mangkaia sip sa; naha ba aihtabi takaia dukiara lika apia sa.

Kristian nani ba sturi yamni smalkaia bara disaipil nani daukaia adarka brisa. Baha mita, kau aihtabi takras kaina ra smalki tataukra ba naha warkka dauki kaia sa (Mt. 24:14; 28:19, 20). Aihtabi takras kainara, ¿smalki tataukra kum ba kati an piua ra smalkaia warkka daukaia sa? Param sa, piua aitani kum luaia sa. Baku naha smalki tataukra ba marikbia witin ai kupia aiska smalkaia warkka kati bani daukaia ridi sa (Law. 78:37). Sakuna smalkaia tâ krikbia piua wina piu wihka luaia nit apia sa, ban kra kati kum kum baman bara naha ba aihtabi takaia sip sa. ¿Smalkaia warkka ra kati bani an daukaia sa? Naha dukiara lâ kum âpu sa. Kangrigisan almukka nani ba laki kaikaia sa smalki tataukra nani kumi bani ba sât wala sa bara tânkira kaia sa (Lk. 21:1-4).

Kangrigisan almukka nani (kangrigisan ra uya âpu sa kaka, hilp mamunra nani ba) aihtabi takaia uplika kum bribia taim, witin nani ai auya tikaia apia sa upla bani ba sât wala sa, bara tânkira lâka ni laki kaikbia baha uplika ba aihtabi takaia ridi sapa. Kangrigisan almukka nani ba bîla kaikisa aihtabi takras smalki tataukra ba rait aihwa Jehova Witnis kum kaia want sa. Baku sin, Jehova asla takanka tilara kaia ai brinka sa bara smalkaia warkka daukaia wilin sa. Kangrigisan almukka nani ba naha smalki tataukra raya ba wala nani kau piua wihka aihtabi takan ba wal praki kaikaia apia sa. Sakuna kangrigisan almukka nani ba smalki tataukra ba aihtabi takaia dukiara ridi apia sa kaikbia kaka, uplika ra latwan lâka ni Baibil dîa wi ba marikaia sa bara spirit lâka ra hilpka nit ba yabaia.