Upla ra hilp muns Gâd bîla walaia
1. ¿“Man Kingkam lâka balbia” Aidrubanka Kau Tara ba ra, dîa wauhkataya nani sakan, bara dîa muni naha nani ba uba painkira sa?
1 “Man Kingkam lâka balbia” Aidrubanka Kau Tara ba ra, wauhkataya wâl yaban: Gâd bîla wals bara ban kaia ra iwma bara Gâd bîla wals, naha ba bîla kunhku ra sa. Naha wauhkataya nani ba ulbanka wiria baman brisa, baha mita isti bara isi natka ra ulbi lakaia sip sa. Gâd bîla wals bara ban kaia ra iwma wauhkataya ba 431 bîla aisanka ra ulbi lakan sa.
2. ¿Ya nani naha wauhkataya wina yamnika sakaia sip sa?
2 ¿Ya nani naha wauhkataya wina yamnika sakaia sip sa? Kaisa sampla kum kum kaikaia tasba aiska ra taki ba:
• Smalki tataukra kum ba utla dawanka kum wal aisisa, ban kra pas trip smalkisa apia kaka kli wih kaikisa. Bara witin kaikisa uplika ba wauhtaya aisi kaikaia lan âpu, apia kaka uya pain aisi kaikras.
• Smalki tataukra ba upla kum ra smalkisa, bara naha uplika bîla aisanka ra ulbi sakanka kum kum bâra sa, apia kaka âpu sa. Ban kra smalkaia pliska ra upla nani ba ai bîla aisanka ra wauhkataya aisi kaikaia lan âpu sa.
• Smalki tataukra kum ba bîlas uplika nani ra smalkisa bara sain bîla yus munisa.
• Aisa yapti kum ai luhpia ra tânka kasak ba smalkisa bara tuktika ba wauhtaya aisi kaiki lan âpu sa.
3. ¿Gâd bîla wals wauhkataya ra dîa kaikaia sip sma?
3 Naha wauhkataya ra dîa kaikma. Gâd bîla wals wauhkataya ba ulbanka wiria baman brisa. Sitnika kat aisisa bara tiks kum wahia mununhtara takisa. ¿Dîa muni? Luki kaiks upla kum wauhkataya kum maikisa, sakuna naha wauhkataya ba tringsar bîla kum ra ulban sa, ban kra letrika nani sin sât wala sa. ¿Lilkika painkira bri kabia sin, aisi kaikaia want kama? Apia. Sim baku, upla nani wauhtaya aisi kaiki lan âpu ba wauhtaya kum uba ulbanka manis brisa taim, aisi kaikaia ai brinka apia sa. Baha mita naha wauhkataya wahia kumi bani lilkika painkira bâra sa, bara hilp wan munisa lilkika tânka kum aisi lilkika wala dukiara aisaia.
4. ¿Gâd bîla wals bara ban kaia ra iwma wauhkataya ra dîa kaikaia sip sma?
4 Gâd bîla wals bara ban kaia ra iwma bara Gâd bîla wals wauhkataya sim lilkika nani brisa. Naha nani ba paskan sa upla wauhkataya aisi kaikaia lan âpu nani, apia kaka aisi kaikaia lan taki nani ba dukiara. Stadika tâ bri uplika ba naha wauhkataya ba sin yus munaia sip sa stadi tatakra Gâd bîla wals wauhkataya ba yus muni kabia sin. Lisin bani wahia wâl brisa. Wahia purara makabi walanka kum bâra sa bara ansika sin yabisa. Lilkika nani, tikska nani bâra sa. Wahia ailal ra bakska kum bâra sa, Baibil tikska nani tânka marikisa, bara stadi tatakra ba dîa sip ba kat laki kaikaia sip sa.
5. ¿Ahkia bara nahki naha wauhkataya nani ba upla ra yabaia sip sa?
5 Nahki yus munaia sa. Utla utla ra smalki tauki kabia taim, naha wauhkataya nani wina kum yabaia sip sa, sanska bâra sa kaka. Bara naha wauhkataya nani baha kati ra yabaia adar yabras kabia sin, upla mihta ra swiaia sip sa (“Nahki upla mihta ra swiaia” bakska ba kaiks). Baku sin, upla ra kli wih kaikma taim yabaia, apia kaka uplika ra wiaia sip sma diara kum marikaia want sma bara wauhkataya ba yabaia.
6. ¿Naha wauhkataya nani wal nahki stadika kum tâ krikaia sip sa?
6 Gâd bîla wals wauhkataya ba makabi walanka nani âpu sa. Baha mita, stadi tatakra ba wal makabi wali ansika yabaia dukiara stadi takaia apia sa. Baku sin, Smalkisa bukka dauki ba baku sin apia sa. Upla aihkika ba laik sa sturka nani walaia. Baha mita, lilkika nani ba Baibil wina sakan ba yus munaia sip sa. Lilkika kumi bani tânka ba mariks. Lilia lâka wal dauks. Stadi tatakra ba dîa mai wi ba wals. Tikska nani wahia mina ra taki ba aisi kaiks bara witin dîa wi ba dukiara aisas. Stadi tatakra ba ra makabi wals bara dîa smalkisma ba tânka brisa sapa nu takaia trai muns. Gâd bîla wals bara ban kaia ra iwma wauhkataya ba aikuki aisi kaiks, tikska nani ba sin, bara lilkika kumi bani tânka ba laki kaiks.
7. ¿Nahki Baibil stadi tatakra nani ra hilp munaia sip sa?
7 Stadi tatakra ra hilp muns. Ban kra, dîa smalkisma ba mita stadi tatakra ba want kabia Jehova tânka ba silp aisi kaikaia (Mt. 5:3; Jn. 17:3). Gâd bîla wals wauhkataya wal Baibil stadi takisma kaka, piu lubia ningkara, stadi tatakra ba ra wiaia sip sma wauhtaya aisi kaikaia lan daukaia sip sma. Bara witin wal Gâd bîla wals bara ban kaia ra iwma wauhkataya ba laki kaikaia. Ani wauhkataya yus munbia sin, stadi tatakra ba naha wauhkataya nani ba laki kaiki danh takbia taim, aihtabi takaia sip apia kabia. Baha wina Smalkisa bukka ba stadi takbia, apia kaka ulbi sakanka pain kum yus munaia. Kan naha ba witin ra hilp munbia Baibil tânka kau pain briaia.
8. ¿Dîa muni naha wauhkataya nani dukiara tingki lukisa?
8 Upla nani ba Gâd karnika sut bri ba bîla walaia sa, raya ban kaia lâka briaia dukiara (Ais. 55:3). Jehova kupia lâka sa “upla sut ba swaki sakan kabia”. Upla wauhtaya aisi kaiki lan âpu nani ba sin, Witin bîla walaia sa (1 Tim. 2:3, 4). ¡Yawan uba tingki lukisa naha wauhkataya painkira nani dukiara, kan hilp wan munbia upla ra smalkaia Gâd bîla walaia!
[Wahya 3 Lilkika ba]
Nahki upla mihta ra swiaia
Utla dawanka ra wahia 2 bara 3 ba mariks. Baha wina wis: “¿Tasba kum nahara mariki ba baku ra iwaia want sma? [Ansika maikbia swis.] Baibil ba pramis munisa [apia kaka, naha bukka holikira pramis munisa] Gâd ba tisku pali tasba painkira kum daukbia, bahara upla umpira nani bara siknis nani ba sin âpu kabia. Kaiks bahara iwaia dukiara dîa daukaia ba [Aiseya 55:3 aisi kaiks, naha ba wahia 3 purara takisa]. Naha ba wan wisa ‘bal’ bara Gâd ‘bîla wals’. Sakuna, ¿nahki Gâd bîla walisa?”. Wahia 4 bara 5 ba ra ansika ba uplika wal laki kaiks. Witin ba taim âpu sa kaka, wauhkataya yas bara ahkia kli balma yua ba wis baha makabi walanka laki kaikaia dukiara.