Baibil stadika nani ba pain tâ briaia
1. Smalki tataukra bani Baibil stadika nani tâ bri ba, ¿dîa warkka tara daukaia brisa?
1 Upla kumi sin Jehova ra mayunaia sip apia sa Witin mita “brih balbia lika” (Jn. 6:44). Baku kabia sin, wan warkka sa upla ra hilp munaia ai Aisika purara ba lamara balaia (Je. 4:8). Naha daukaia dukiara pain ridi takaia sa. Baiki sakanka bara makabi walanka ansika aisi kaikaia baman aitani apia sa, stadi tatakra ba smalkanka nani pain ai tânka briaia bara spirit lâka ra pâwbia dukiara.
2. Baibil stadika pain kum tâ briaia dukiara, ¿dîa daukaia sip sa?
2 Baibil stadika pain daukaia dukiara, smalki tataukra ba ai stadi tatakra nani ra naha daukaia hilp munaia sa: 1) Baibil dîa smalki ba pain ai tânka briaia, 2) Baibil dîa smalki ba ai kupia ra briaia, bara 3) Baibil dîa smalki ba ai rayaka ra alki daukaia (Jn. 3:16; 17:3; Je. 2:26). Kati ailal luaia sip sa upla kum naha kupia kraukanka yumhpa ba alki daukbia dukiara. Stadi tatakra mapara naha kupia kraukanka kumi bani ba pâwanka kum tânka sa silp Jehova wal ai pânika lâka briaia bara Jehova ra ai rayaka yabaia.
3. ¿Dîa muni smalki tataukra pain nani ba upla dîa luki ba makabi walanka sât nani ba yus munisa?
3 ¿Stadi tatakra ba dîa lukisa? Wan Baibil stadi tatakra nani ba dîa lan takan ba ai tânka brisa bara ai kupia ra alki brin sapa nu takaia dukiara, trai muns man uya aisaia apia bara witin nani ra kupia buks dîa luki ba silp aisabia (Je. 1:19). ¿Ulbanka lalka stadi takan ba dukiara stadi tatakra ba pain ai tânka brin Baibil dîa smalki ba dukiara? ¿Witin sip sa baha ulbanka lalka ba tânka marikaia? ¿Witin nahki ai dara walisa dîa lan takan ba dukiara? ¿Witin lukisa Baibil dîa smalki ba yawan daukaia sip sa? (1 Tes. 2:13.) ¿Witin ai tânka brisa dîa lan taki ba ai rayaka ra sins munaia sa? (Kol. 3:10.) Naha makabi walanka nu takaia dukiara, yawan tânkira lâka yus muni witin nani dîa luki ba tânka bribia, bara aman pali wals (Mt. 16:13-16).
4. Stadi tatakra ba Baibil smalkanka kum kum pain ai tânka briaia apia kaka ai rayaka ra daukaia karna munisa kaka, ¿yawan dîa daukaia sa?
4 Upla nani daukanka natka bara lukanka nani ba aisubi takan wina brin ba mita, piua wihka lubia smalkanka raya kum ai sinska ra briaia (2 Ko. 10:5). Bara wan stadi tatakra nani ba dîa witin lan takan ba isti briras apia kaka ai rayaka ra sin alki daukras kaka, wihka bîla kaikanka lâka marikaia sa bara taimka yabia ani kat Gâd Bîla bara spirit holikira stadi tatakra kupia ra dimi ai warkka daukbia (1 Ko. 3:6, 7; Hib. 4:12). Stadi tatakra ba Baibil tânka kum alkaia bara daukaia karna munisa kaka, kau pain sa ulbanka lalka sins munaia. Wihka bîla kaikanka bara latwan lâka ni Baibil dîa smalki ba stadi tatakra nani ra lan daukbia kaka piua lubia ba ra, witin nu takbia ai rayaka sins munaia sa.