¡Jehova ra mayunaia dukiara lawana raya nani!
1 Watch Tower Bible and Tract Society of Pennsylvania ba mani bani aidrubanka kum daukisa, bara bisi pali daukan ba lika Waupasa kati 4, 2014 manka ra. Baha ra maisa pakan Jehova ra aiwanaia lawana bukka yus muni ba wira sins munbia. ¡Rait pali naha sturi raya ba uba lilia takan! Wali nani ra kupia kraukan nahki naha King lawanka nani ba wan kupia ra kulkanka tara brisa wan mayunanka ra (Law. 96:2).
2 Ban kra man luki sma, ¿dîa muni lawana bukka ba sins munisa? Diara ailal tâwan. Pas ba, yawan Baibil smalkanka nani nahki tânka bri ba kau param takisa mita, lawana letrika kum kum ba wapnika mangkaia sa (S.L 4:18). Diara wala ba sika, ulbanka aihkika lawana bukka ra taki ba Traducción del Nuevo Mundo Baibilka almuk ba wina sakan. Naha lawana bukka letrika nani ba sins munaia sa Baibil raya laki kaikan ba wal sim sât kabia dukiara. Lawana bukka letrika nani laki kaikaia wark tara kabia ba mita, sanska brih lawana raya kum kum paski dingkbia.
3 ¿Yawan bîla kaikaia sa naha bukka raya takbia ba kat lawana raya paskan ba aiwanaia dukiara? Apia. Uba lilia maisam pakisa kati nani aula ba ra, lawana raya dakni kum Internet wan pliska pali, jw.org bâra sunan kabia. Naha pliska ra lawana raya kum mangkbia taim, Gâd Warkka Daukaia Aidrubanka ra lawana lâs aiwani pîska ra takbia bara naku wibia “lawana raya”.
4 Lawana raya ba nahki lan takaia. Naha lawana raya kum lan takaia isi apia sa. Ban sakuna, lawana âiulbra baku yawan aidrubanka nani ra lawana aiwani kaia want sa sâp kaia lika apia (Law. 30:12). Bara lawana raya nani ba lan takaia dukiara naha hilpka nina blîks.
Lawanka grabar munan ba aima ailal wali bas, naha ba jw.org pliska wina briaia sip sa. Tiunka kau walma ba ra, kau isi kabia mampara lawanka lan takaia.
Letrika nani stadi taks, bara trai muns lan takaia.
Tiunka mangki letrika brisma wal aiwans. Ani kat pain lan takma ba kat swis.
Pamali Mayunra piua ra minit kum kum praptis muns pamalikam lawanka pain kakaira takbia ba kat.
5 Kati aula nani ra, Gâd Warkka Daukaia Aidrubanka ra lawana raya kum wal danh takbia taim, Kangrigisan ba piano ra grabar munan ba tiunka ba pas walbia. Baha wina, wali nani ba piano ra grabar munan ba tiunka wal aiwanbia, lawana wala nani wal dauki ba baku.
6 Aidrubanka nani ra aiwani sa taim, letrika tânka ra lukisa kaka, lilia bara asla wan dara walbia sut bîla baikra kumi baku Jehova ra mayuni. Baha mita, aidrubanka nani ra lawana kum mangkisa piua ra aitani apia sa wan natka baku bui tauki kaia.
7 Diara wala ba mita yawan naha lawanka holi kulkanka yabi ba sika. Aidrubanka tara nani ra, titan bara tutni pîska tâ krikras kaina ra lawana tiunka kum mangkisa. Mani bîla ra aima wâl, muihni lakri nani tasba aiska wina silp ai lalahka yus muni Patterson, (Nueva York) apiska ra balisa miusik painkira nani paskisa wan mayunanka lâka ra yus munbia dukiara. Baha mita, aisasara ba wan pliska ra iwi miusik painkira nani orquesta ra paskan ba walaia wan paiwbia taim, yawan bîla wali daukaia sa. Naha bîla walbia kaka, wan kupia ridi takisa aisanka nani aula ba ra lukaia (Esd. 7:10).
8 Naha aidrubanka danh takaia dukiara, lawanka raya kum nina, “¡Que venga el Reino establecido por Dios!” aiwanbia. Naha lawana ba, bisi pali mani bani aidrubanka ra marikan, bara King lâka tâ krikan ba wina 100 mani alki ba dukiara tânka aisisa.
9 Param sa naha lawana raya nani ba “Diara yamni nani” kum sa Jehova wina (Mt. 12:35a). ¡Kaisa naha lawana raya nani ba lan takaia bara wan kupia aiska ni aiwanaia, Jehova ra kulkanka bara mayunanka briaia aitani ba yabi! (Law. 147:1.)