Wan taimka pain yus munbia smalkaia warkka dukiara
Jehova Witniska nani 2014 manka ra smalkaia warkka ra awar nani 1.945.487.604 daukan. Naha ba marikisa yawan wilin sa takaskraskira Jehova dukia daukaia (Law. 110:3; 1 Ko. 15:58). Yawan kau “piu wiria baman brisa” bamna, upla wal kau aisaia trai munbia smalkaia warkka daukisa piua ra (1 Ko. 7:29).
Kau smalkaia dukiara wilin kaia sa wan taimka sins munaia. Sampla baku, an taim smalkaia taki sa piua ra awar kum pitka baku upla wal aisaras luisa kaka, ¿dîa daukaia sip sa upla nani wal kau aisaia dukiara? Smalkaia pliska bani ba nitka sât sât brisa, sakuna naha hilpka nani ba wan tâ baikbia piua ba kau pain yus munaia bara bahki wark takbia apia (1 Ko. 9:26).
Utla utla ra smalkaia natka. Mani ailal wina, smalki tataukra nani ba titan taim utla utla ra smalkaia warkka tâ krikisa. Sakuna upla manis ba kakna taim ai warkka ra wisa. Baha mita, ¿dîa muni tutni apia kaka saiwan ra smalkaia warkka ba daukras? Baha awarka nani ra upla ba pat ai watla ra sa bara kau pain ai dara walisa. Baku sin, titan pîska ra yabal ra apia kaka bisnis pliska nani ra smalkbia kaka kau pain daukaia sip sa.
Upla ailal bâra pliska ra. Tibil apia kaka truk lupia ba upla ailal lui ba pliska kum ra mangkaia sa, sakuna naha ba kangrigisan bani smalkisa pliska ra kaia sa (Gâd Warkka Dauki wauhkataya, Pastara kati 2013, wahia 5 ba kaiks). Sakuna ban wina pliska bâk upla uya luras sa kaka, Kangrigisan Warkka Kamitika ba wibia tibil ba apia kaka trukka lupia ba plis wala ra mangkaia upla ailal bâra pliska kum ra.
Upla ra kli wih kaikaia bara Baibil stadika nani. Yua kum bilka ra awar kum kum ra smalkaia natka dauki ba uya pain takras. ¿Sip sa ki baha awarka nani ra upla nani ra kli wih kaikaia, apia kaka Baibil stadika nani daukaia? Sampla baku, satadi titan ra, utla utla ra smalkaia natka ba kau pain sa kaka, Baibil stadika nani ba tutni ra apia kaka saiwan ra daukaia sip sa. Baku sin, truk ra upla nani ra kli wih kaikisa kaka, pain kabia truk bani ra upla wiria baman wabia baku smalkaia warkka ra kau daukaia sip sa.
Smalki taki wisa taim piu an tauki kan ba yawan kulkaia sip sa, kuna kau lilia wan dara walbia wan warkka pain daukan kaka. Smalkaia warkka natka kum ba awar kum ra pain takras sa kaka, trai munbia awar wala ra smalkaia. Kaisa Jehova “insla Dawanka” ra makabaia hilp wan munbia wan taimka kau pain yus munaia smalki taukisa taim (Mt. 9:38).