Blain nani ra sin smalkisa
1. ¿Nahki natka ra Jisas bui blain nani ra umpira kaikan?
1 Jisas pruaia yua lamara kan. Bamna Jeriko tawanka wina taki auya kan ba ra, upla blain umpira wâl kisbi witin ra nan winan: “¡Dawan, Debit Luhpia, yang nani ra umpira ai kaiks!” Jisas ba pât wahwaia ba dukiara luki kan, bara blain nani winanka walan na ra, takaskan bara witin nani ra rakan (Mt. 20:29-34). ¿Yawan nahki sip sa Jisas tnata lukaia blain nani ra umpira kaikan ba wina?
2. ¿Nahki yawan ridi takisa blain wal upla ailal tilara aisabia kaka?
2 Hilp munaia ridi bas. Upla blain wal prawma kaka, ban kra upla ailal tilara, man ya sma pas wima bara witin ra wis hilp munaia sip sma ba. Sam taim upla bâra sa blain nani ra saura munisa, baha mita blain uplika ba pas tâura wan walaia want apia kabia sapa. Baku kabia sin, kupiam wina witinka ra hilp munaia want sma ba marikma kaka, witin wilin kabia hilpkam briaia. Naha sin nu bas, blain sikniska ba sât sât bâra sa, baha mita hilp munaia natka yama ba, piu sut ra sim dukia kabia apia. Hilpkam yama ningkara, ban kra aitani kabia wiaia man Baibil smalkaia warkka kum ra taukisma ba. Lawana 146:8 apia kaka Aiseya 35:5, 6 aisi kaikaia wilin taks. Man sin sip sma hilp munaia jw.org walaia dukia nani alahbi yabaia dukiara. Witin Braille yus munisa kaka, makabi wals Braille ulbi sakanka kum brin daukisa sapa Baibil hilpka sakaia bara kau lan takaia sin. Witin computadora ba programa kum aisi kaiki yabi ba bri sa kaka, jw.org wina RTF (Rich Text Format) ulbi sakanka nani alahbi briaia sip sa bara baha wal uba lilia takbia. Naha dukia wâl na jw.org wina alahbi ba, Ispail bîla ra apia kaka bîla wala tasba ra kau aisi ba ra baman takisa. (“Upla blain hilp munisa taim. . .” bakska ba kaiks).
3. ¿Upla blain nani ra nahki pliki sakaia sip sa?
3 Upla blain nani plikaia. Yawan utla utla ra smalki ba ra upla blain nani wal uya aisaras sa, kan witin nani pain ai dara walras sa upla tringsar ai watla ra bal pliki ba wal aisaia. Bamna kau pain takisa upla blain kum pat kaikisma ba plikaia bara witin kat wih smalkaia (Mt. 10:11). ¿Warkkam pliska ra apia kaka skul watla ra upla blain kum wal kakaira sma ki? Wilin taks wih aisaia. Smalkisma pliska ra blain nani skulka kum bâra sa kaka, skulka bukka nani dukiara Braille ulbi sakanka nani yabaia sip sma wis. ¿Upla kum kaikisma ki ai pamalika tila ra blain bri ba? ¿Smalkisma pliska ra blain nani ra hilp munaia asla takanka bâra sa ki apia kaka blain nani watla kum bâra sa ki? Blain pamalika kum ra, asla takanka main kaiki uplika, apia kaka blain watla tâ uplika ra wis Jehova Witniska nani ba uba lukisa blain nani ra hilp munaia, bara Braille ulbi sakanka nani apia kaka walaia dukia ulbi sakanka nani sin sal yabaia sip sa. Witin ra mariks Baibil pramiska ba blain sikniska Gâd danh rakbia wi ba. Baku sin want kama jw.org lilkika nina “No sé qué haría sin ella,” ba marikaia. Baha ra waitna blain sturka kum Braille Baibilka wina diara manis lan takan ba dukiara aisisa. Man balram tânka klir wiram na ra, kau isi kabia blain uplika bani wal aisaia.
4. Janet daukanka ba wina yawan, ¿dîa lisinka lan takisa?
4 Kristian mairin kum blain kan ba nina Janet blain asla takanka watla kum ra wan. Witin tiara lupia kum wal aisaia tâ krikan. Janet ba wahmika ra win, “Jisas ba upla blain nani rakan bara baku upla blain nani ra dîa takbia ba marikan.” Aikuki Param Marikanka 21:3, 4 laki kaikan, bara Janet ba tiarika ra tânka win nahki blain lâka ba Gâd Kingka lâka ra danh âpu kabia ba. Tiarika pain ai dara wali si naku win: “Rayaki aiska ra naiwa kat baha lukanka walisna upla blain wala wina. Upla blain apia manis ba lukisa blain nani ba apia kaka ai damika nani ba diara saura kum daukan ba mita blain takan sa.” Janet ba tiarika ra correo kum ra, Internet dairiksanka kum Baibil Smalkisa bukka ra bliki ba yaban, bara nanara wik bani aikuki Baibil stadi takisa.
5. Jisas upla blain nani rakan baku yawan sip daukras kabia sin, uplika ra luki hilp munbia kaka, ¿dîa yamnika takaia sip sa?
5 Param sa, Jisas daukan baku yawan upla blain nani rakaia sip apia sa, sakuna ya nani naha tasba gâdka ba mita sinska nakra ba blain daukan ba ra hilp munaia sip sa, naha tila ra sin upla blain nani dimisa. ¿Nahki? Gâd Bîla tânka kasak ba smalki (2 Ko. 4:4). Jeriko lamara Jisas waitna wâl blain kan ba rakan “witin nani ra umpira kaikan bamna” (Mt. 20:34). Upla blain nani dukiara baha sim lukanka bribia kaka, Jehova dukiara lan daukaia sanska painkira bribia, kan Witin baman sip sa blain lâka ba ban kaia ra âpu daukaia.