Disaipil nani daukaia ridi bas
1. ¿Upla nani ba nahki ai rayaka swaki sakaia sip sa?
1 Mani 2014 ra smalkaia warkka pâwanka nani maisa pakan ba marikisa Gâd uplika nani ba kasak trai munisa King Lâka sturka takaskras kira bara liliakira wal daukisa (Mt. 24:14). Bara utla utla smalki, wauhtaya nani saki upla ra yabi tauki ba, apia kaka paiwanka nani bara Kangrigisan smalki pliska ra upla manis bâra smalkaia natka sut ba mita yawan sip sa Baibil smalkanka nani ba upla ra kau lan daukaia. Sakuna baha uplika nani ai rayaka swaki sâkbia dukiara, yawan hilp munaia sa Jisas disaipilka takaia Baibil tânka kasak ba lan dauki (1 Ti. 2:4).
2. ¿Dîa makabi walanka silp daukbia Baibil stadika nani tâ krikaia ridi kaia dukiara?
2 Piu bani ridi kaia Baibil stadika kum tâ krikaia. Upla kum ba kau nu takan daukisa kaka, ¿trai muni sma ai nina bara ai dairiksanka briaia isti pali kli wih kaikaia bara Baibil stadika kum briaia sip ba wiaia dukiara? ¿Upla nani ra pat marikram sa Baibil stadika kum nahki daukisa pas trip wih kaikram taim? ¿Wauhkataya nani brihwi yabi uplika nani ra pat Baibil stadika kum briaia sip ba dukiara aisaram ki? ¿Dîa muni Baibil stadi takaia sa? bara ¿Baibil stadika nani ba nahki dauki banhwisna? lilkika nani ba, ¿pat marikram sa aikuki wark taki uplika ra apia kaka skul pânika nani ra, wan lamara iwi uplika ra, wan taya nani bara wan kakaira wala nani ra? Tibil apia kaka truk lupia kum wal ulbi sakanka nani marikisa taim, upla kum Baibil stadi takaia ulbi sakanka kum brin kaka, ¿trai muni sma uplika ra wiaia Baibil stadika kum mana luha briaia sip sa?
3. Upla nani ra tânka kasak ba pain smalkaia dukiara, ¿dîa nit sa?
3 Jehova bara Jisas hilpka. Jisas disaipil nani daukaia blikan taim, naha bîla yus munan “was”. Baku natka ra Jisas marikan yawan ba trai munaia sa bara wilin takaia sa. Sakuna yakan naha warkka daukbia wiras kan, witin pramis munan aikuki wal wark takbia (Mt. 28:19, 20). Baha purkara sin, Jehova ai spiritka holikira baman wankras sa, nit hilpka nani brisa bara lan wan daukisa tânka kasak ba upla nani ra smalkbia dukiara (Sak. 4:6; 2 Ko. 4:7). Jehova ra makabia sip sa naha warkka kulkanka tara bri ba daukaia brinka bara karnika wankbia (Pil. 2:13).
4. ¿Dîa muni ridi kaia sa disaipil nani daukaia?
4 Sturi yamni nani ba smalkaia ba lilia wan daukisa. Sakuna upla kum ra tânka kasak ba lan dauki bara aikuki “raya kaia ra auya durka” ra impakbia kaka, wan liliaka lâka ba kau tara kabia (Mt. 7:14; 1 Tes. 2:19, 20). Bara diara kum kau tara ba sika, disaipil daukaia sanska plikbia kaka, Jehova yamni wan kaikbia, kan Witin “brin daukras upla kumi kra tanis tiwbia, kuna upla sut ai daukanka saura wina ai kupia lakbia” (2 Pi. 3:9).