Baibil stadika ta krikaia ridi kaia
1. Matyu 28:19, 20 ra Jisas yaban adarka daukaia ba, dia tanka brisa ki?
1 Jisas yawan ra ‘smalkaia bara disaipil nani daukaia’ adarka wankan sa (Mat. 28:19, 20).Yawan want sa pyu bani Baibil stadika ta krikaia, wik tnata yua bak sakan ra baman lika apia. Kaisa yus bri tanka kum kum laki kaikaia.
2. Ya nani ra Baibil stadika kum yabaia want sma wiaia sip sa?
2 Baibil stadika kum yabaia want sma wis. Yawan Baibil stadika kum yabaia want sa wibia ba ra kau sanska nani bri kabia stadika kum ta krikaia (Smas. 11:6). Upla kum ra pat wiram sa Baibil stadika kum yabaia want sma? Miriki Kuntrika ra kangrigisan kum trai kaikan kati kum bila ra upla sut ra baku wiaia. Lilia pali taki bangwan 42 Baibil stadi tatakra raya nani ta krikan taim! Baha mita, lukaia apia sa upla ba pat nu sa yawan Baibil kulka nani yabi ba. Upla kum ra kli wih kaikma taim dia muni wiras witin wal stadi takaia want sma? Bara, apia mai wibia kaka aihka lukpara, kan ban wih kaiki kaia sip sma, bara bankra yu kum au mai wibia. Natka wala ba sika lamam ra iwi uplika nani ra, tamya nani ra, man wal wark taki nani ra, apia kaka man wal kul dimi nani ra makabi walaia, man wal Baibil stadi takaia ai brinka sapa. Bara pat Baibil stadi taki nani ba, ai panika, apia kaka ai taya uplika kum brisa Baibil stadika kum brin daukisa sapa?
3. Baibil stadika kum ta krikaia dukyara ani helpka tara kum brisa bara ahkia sin yus munaia sip sa ki?
3 Helpka tara na yus muns. Baibil stadika ta krikaia dukyara help tara kum bri ba sika wauhkataya sirpi ba Tanka Kasak Ba Nu Takan mai Daukisa ki? Upla nani ba wauhkataya wala briaia want apia kabia sin trai munisa yabaia. Naha wal bisnis dauki pliska nani ra, yabal nani ra, wauhkataya ulbi bak; baku sin upla ra kli wih kaikma taim yus munaia sip sa, bara watla kum ra upla apu kaka sin. Impaki auma taim, markit ra, apia kaka wark takaia auma taim brih waia sip sma ki? Las wahya ra tanka marikisa nahki Baibil stadika kum ta krikaia. Baha ra Smalkisa bukka takisa.
4. Baibil stadika ta krikaia wisi wauhtaya sirpi Tanka Kasak Ba nahki yus munaia sip sa ki?
4 Nahki yus munaia sip sa? Wauhkataya sirpi ba upla mihta ra swibia ningkara, pas wahya makabi walanka nani ba mariks, bara sin wis: “Ani ba kau nu takaia want sma?”. Baha wina, wauhkataya ra ansika taki ba witin wal laki kaiks, bara las wahya ba Baibil stadika kum briaia want aisi ba dukyara kaiks apia kaka tanka sin mariks. Smalkisa bukka wina mariks ani piska ra kau nu takaia sip sa. Baha wina bukka ba yas bara wal aisi wapnika mangks ahkia kli balaisma yua.
5. Dia muni ban ridi kaia sa Baibil stadika nani ta krikaia?
5 Yawan smalki tauki pliska ra kau upla ailal pali ai brinka sa lan takaia Baibil dia pali smalki ba. Uba lilia wan daukisa upla wala nani ra help munaia raya bankaia laka ba briaia. Bara yawan Baibil stadika ta krikaia ban ridi sa kaka, baha liliaka ba bri kabia (Mat. 7:13, 14).