KRISTIAN RAYAKA KAT IWAIA
Pal ba Gâd ra tingki win bara kli ai karnika brin
Pal ba aula kan taim, Rom kangrigisan muihni bara lakri nani ba nu takan, Pal wal prawaia wisi witin nani tilara kum kum ba 64 kilometro baku impakan (40 milla). Muihni nani ba Pal ra latwan kaiki sakripais dauki banhwan taim, ¿Pal ba nahki ai dara walan ki? Witin nani ra kaikan taim, Gâd ra tingki win bara ai karnika kli brin (Ap.St 28:15). Piu bani Pal mita kangrigisan nani ra kupia buki kan, sakuna nanara witin nit kan upla wala mita ai kupia bukbia, silak ra kan ba mita (2Ko 13:10).
Naiwa piua ra, impaki pura kakaira nani ba kangrigisan nani wih kaikisa muihni bara lakri kupia bukaia dukiara. Gâd uplika nani sut ra taki ba baku, sam taim witin nani sin swapisa, wari takisa apia kaka sari takisa. Impaki pura kakaira bara ai maya ra kupia bukaia dukiara, ¿yawan dîa daukaia sip sa? Witin nani kupia bukbia kaka, kangrigisan nani ra wih kaikbia taim, pana pana hilp takaia sip kabia (Ro 1:11, 12).
Smalkaia taki waia aidrubanka ra kaia. Impaki pura kakaira ba lilia takisa kaikaia nahki yawan sakripais daukisa baha wikka painkira tâ baikaia dukiara (1Tes 1:2, 3; 2:20). Impaki pura kakaira balbia katka ra, tâ baiki smasmalkra takaia trai muns. ¿Sip sma impaki pura kakaira wal apia kaka ai maya wal smalkaia? Baku sin makabaia sip sma yulam kahbia Baibil stadika kum yabaia. Witin nani ba laik sa smalki tataukra nani sut wal smalkaia, bisi wina smalki nani wal apia kaka smalki uya lan âpu nani wal sin.
Wan watla ra paiwaia. ¿Wan watla ra yapaia, apia kaka plun piaia paiwaia sip sa ki? Naha wal yawan marikisa kasak witin nani ra latwan kaiki ba. Baku sin, witin nani ba diara kau pain nani ba wan makabras (Lk 10:38-42).
Witin kupia kraukanka nani wanki ba alki daukaia sa. Impaki pura kakaira ba latwan lâka wal hilp wan munisa Jehova warkka ba kau pain daukbia dukiara. Sam taim smalkanka karna kum wankaia sip sa (1Ko 5:1-5). Yawan bîla wawalra bara praut takras alki daukbia kaka, ai warkka ba liliakira daukbia (Hib 13:17).
Latwan kaikisma ba mariks. Impaki pura kakaira bara ai maya ra wis nahki witin nani warkka ba man ra yamni mai munan sa. Man pali bui witin ra wis apia kaka ulbi wis, ban kra wauhtaya painkira kum wal (Kol 3:15).