Videos nani yus munaia Baibil stadi tatakra nani ra smalkaia dukiara

Videos nani ba hilp wan munisa isti diara kum ra wan sinska mangkaia, diara kum wan tânka briaia bara dîa lan taki ba wan kupia kraukaia. Jehova, wan Smasmalkra Kau Tara ba, lilka yus munan diara tânka tara nani marikaia dukiara (Bla.St 15:5; Jir 18:1-6). Jisas sin yus munan, Smasmalkra Tara ba (Mt 18:2-6; 22:19-21). Naha sât hilpka nani las mani nani luan wina yus muni aula ba sika videos nani. ¿Naha nani ba Baibil stadi tatakra nani ra smalkaia dukiara yawan yus munisa ki?

Naiwa piua ra, videos 10 nani hilpka wal ¡Gâd sturka yamni nani ba!, wauhkataya lisinka nani ba tânka marikaia sip sa. Aima ailal ra, video lalka ba lisin kum ra makabi walanka nani bâra ba wal wilkanka brisa. Naha wauhkataya Internet wan pliska ra kaikisa taim, ulbanka sirpi kum wan maisa pakisa ahkia video kum yus munaia sa. Baku sin, videos wala nani bâra sa, bara smalkaia hilpka nani tilara Baibil stadika yabaia wauhkataya nani yus muni ba dukiara aisisa.

¿Baibil stadi tatakra mapara karna sa ki Baibil smalkanka kum stadi muni ba tânka briaia, apia kaka pât nani tilara sa? Hilp munaia dukiara jw.org®, apia kaka JW Broadcasting® wina video kum pliks. Ban kra witin wal laki kaikaia sip sma.

Kati bani videos raya nani sakisa. Kaikma taim, nahki upla wala ra smalkaia dukiara luki bas.