KRISTIAN RAYAKA KAT IWAIA

¡Man lilia bas ban kaia ra!: tânka kasak smalkaia dukiara hilpka raya nani

¡Baibil stadika yabaia dukiara buk raya kum bara wauhkataya tara raya kum briaia ba nahki painkira sa! Yawan Jehova ra bik takisa disaipil kau ailal daukaia dukiara yawan dîa dauki ba witin blisin munbia (Mt 28:18-20; 1Ko 3:6-9). ¿Baha hilpka raya nani yawan nahki yus munaia sip sa?

Man lilia bas bukka apia kaka wauhkataya tara yus muni Baibil stadika yabia taim, pana pana aisabia. Baha mita wan smalkaia tnatka ba wira chens munaia nit sa. Baibil stadika kum ridi dauki bara tâ bribia taim, naha tânka nani ba dauks:a

Ulbanka ba aisi kaiki makabi walanka nani ba laki kaiks.
Baibil tikska nani “aisi kaikma” wi ba aisi kaiks, bara stadi tatakra ra hilp muns dîa smalki ba pain tânka briaia.
Lilka nani ba mangks bara ulbi sakanka ra taki makabi walanka nani dauks.
Aima bani smalkanka kum aiska danh daukaia trai muns.

Smalki taukisa taim, uplika ba kau nu takan daukisa kaka, pas ba wauhkataya tara ba witin ra yas (Wahia 16 bakska “Pas trip upla wal aisisa taim, Man lilia bas wauhkataya tara ba nahki ai mihta ra swiaia” ba kaiks). Wauhkataya tara stadi takaia danh taki, witin kau stadi takaia want sa kaka, bukka smalkanka 04 wina stadi takaia sip sa. Upla kum wan ulbi sakanka wala wal pat Baibil stadi takisa kaka, Man lilia bas bukka ra tawaia sip sa. Man mihtam ra sa ani smalkanka wina tâ krikaia ba.

Sim maritka ba “Man lilia bas” wauhkataya yus munisa sim wahmika ra ai watla kat Baibil stadika yabaia dukiara.

MAN BAIBIL STADI TAKI LILIA BAS LILKIKA BA KAIKBIA NINGKARA, NAHA MAKABI WALANKA NANI LAKI KAIKS:

¿Stadi tatakra nani ba buk raya wal dîa lan takbia?
¿Stadi tatakra raya nani ra dîa muni naha lilkika marikaia sa?
¿Stadi tatakra ra dîa trai munaia kupia buki kaia sip sa? (Wahia 16 bakska “Lukanka tara nani ba bara pîska bani stadi tatakra dîa trai munbia ba” kaiks).

a ULBANKA: Stadi yabisma taim “Kau pliki kaiks” pîska laki kaikaia, apia kaka laki kaikras ba man mihtam ra sa. Kuna stadi yabaia ridi takisma piua ra, baha pîska sin ridi taks. Baku tnatka ra man nu takaia sip sma ani ba stadi tatakrikam ra nit sa, bara baha ba witin mapara hilpka tara kabia. Man lilia bas bukka bara wauhkataya tara digital dukia nani ba wan blikisa lilka bara ulbi sakanka wala nani ra.

LUKANKA TARA NANI BA BARA PÎSKA BANI STADI TATAKRA DÎA TRAI MUNBIA BA
	SMALKANKA NANI	LUKANKA TARA BA	STADI TATAKRA DÎA TRAI MUNBIA BA
1	01-12	Laki kaikaia Baibil ba nahki hilp wan munaia sip sa bara ya Baibil ulbi paskaia adar yaban ba ra nahki kakaira takaia sip sa.	Stadi tatakra kupia buks Baibil aisi kaikaia, stadika dukiara ridi takaia bara aidrubanka nani ra waia.
2	13-33	Kaikaia Jehova dîa daukan sa yawan sut dukiara bara dîa sât mayunanka witin pain kaikisa.	Stadi tatakra kupia buks upla wala nani ra tânka kasak dukiara aisaia bara smalki tataukra takaia.
3	34-47	Lan takaia Jehova dîa makabisa witin ra mayuni uplika nani ra.	Stadi tatakra kupia buks Jehova ra ai rayaka yabaia bara tahbi daukan lâka briaia.
4	48-60	Luki kaikaia yawan nahki sip sa Gâd ra piua bani latwan kaiki kaia.	Stadi tatakra ra smalks dîa pain bara dîa saura ba tânka briaia bara spirit lainka ra kau pâwi kaia.