KRISTIAN RAYAKA KAT IWAIA
Lawi daukanka ba Jehova latwanka lâka marikisa
Lawi daukaia ba tânka sa smalkaia bara lan daukaia, sakuna baha tilara sa wapni mangkaia bara klala yabaia ba sin. Jehova lawi wan daukisa dîa makabi ba kat yawan witin ra mayunbia dukiara (Ro 12:1; Hib 12:10, 11). Sam taim lawi daukanka ba latwan yabisa. Sakuna yawan baha alkisa kaka, Gâd nakra ra kasak kabia bara witin blisin wan munbia (S.L 10:7). ¿Lawi daukanka yabi uplika bara lawi daukanka bri uplika wâl sut ba diaura ai kupia kraukaia sa?
Lawi daukanka yabi uplika ba. Kangrigisan almukka nani, aisa yapti nani bara wala nani ba Jehova nina bliki, latwan lâka bara kupia yamni wal lawi daukaia trai munisa (Jir 46:28). Karna lawi daukbia kra sin ai nitka kat yabaia sa bara latwan lâka wal yabaia sa (Tai 1:13).
Lawi daukanka bri uplika ba. Dîa sât lawi daukanka wankbia kra sin, yawan baha alkaia sa bara smalkanka ba mahka praptis munaia sa (S.L 3:11, 12). Yawan sut ba mistik tatakra nani sa, baha mita tnatka kum kum ra wapni ra wan mangkbia nit sa. Yawan Baibil aisi kaikisa taim apia kaka aidrubanka nani ra smalkanka nani walisa taim, wapnika mangkanka briaia sip sa. Apia kaka sam taim lâ bapaia daknika kum mita lawi wan daukaia nit kabia. Yawan lawi daukanka ba alki, wan rayaka chens munbia kaka, raya ban kaia lâka ba bribia (S.L 10:17).
JEHOVA ANI UPLIKA LATWAN KAIKI BA RA LAWI DAUKISA LILKIKA BA KAIKBIA NINGKARA, NAHA MAKABI WALANKA NANI LAKI KAIKS:
¿Canon ba dîa sât pamalika ra pâwan, kuna ningkara dîa takan?
¿Witin Jehova wina dîa sât wapnika mangkanka latwankira brin?
Yawan Jehova wapnika mangkanka ba latwan kaikaia lan takpi.
¿Canon ra dîa takan ba wina yawan dîa lan takisa?