KRISTIAN RAYAKA KAT IWAIA
¿Siknis kum apia kaka aksidint kum takras kaina ra ridi sma ki?
¿Dîa muni ridi kaia sa? Yawan sut sip sa bîla kaikras kira siknis kum apia kaka aksidint kum tâka aspital ra waia. Yawan daktar nani hilpka briaia want sa kaka, nit sa kaina wina diara kum kum wahbi sakaia, bara baha dukiara hilpka nani bri ba yus munaia. Baku wan rayaka ra bara tala dukiara Jehova lâka nani ra rispik lâka marikisa (Ap.St 15:28, 29).
¿Nahki ridi takaia sip sma?
Tânka nani pain laki kaiki, bara puram suni, DPA wauhkataya ba ulbi bris.a Tahbi daukan smalki tataukra nani ba, ulbi sakanka yabi hilp mamunra ra naha wauhkataya makabaia sip sa, bara aisa yapti nani ba Tarjeta de identidad (ic) ai luhpia nani dukiara makabaia sip sa.
Kwihra nani ba sip sa kangrigisan almukka nani ra makabaia Información para mujeres embarazadas (S-401) wauhkataya ba. Kwihra piua ra, bara luhpa baikaia piua ra wahbi sakanka nani pain briaia dukiara naha ba hilp wan munisa.
Siknis kum apia kaka aksidint kum tâka aspital ra mai dingkisa kaka, bara daktar nani tala yus munaia dukiara mai aisisa kaka, kaina wina kangrigisan almukka nani ra maisa paks. Baku sin aspital uplika nani ra wis, Jehova witniska kum bali mai kaiki kabia man wahbi sakram ba.
¿Kangrigisan almukka nani ba nahki hilp mai munaia sip sa ki? Witin nani hilp mai munaia sip sa DPA wauhkataya ulbi brima dukiara, kuna man silp wahbi sakaia sma aspital ra daktar nani dîa mai daukbia ba dukiara. Kangrigisan almukka nani man sirka ra baha sip daukras (Ro 14:12; Gal 6:5). Man aspital ra daktar nani tala yus munaia nit sma mai wisa kaka, bara kangrigisan almukka nani ra maisa pakma taim, witin nani isti pali Aspital wal Asla Daukaia Daknika (CEH) wal aisabia.
¿CEH ba nahki hilp wan munaia sip sa ki? Naha daknika kristian waitnika nani ra lan daukisa, daktar nani, bara lâ lainka ra wark taki uplika nani ra yawan kristian baku dîa wahbi saki ba tânka marikaia dukiara. Witin nani mai kaiki daktar nani ra tala man ra mai dingkbia apia dukiara tnatka wala nani bâra ba marikaia sip sa. Bara nit sa kaka, daktar wala tâm baikaia wilin nani ba pliki sakaia sip sa.
¿TALA YUS MUNAIA BA DUKIARA DÎA BA PAIN LAKI KAIKAIA SA? LILKIKA BA KAIKBIA NINGKARA, NAHA MAKABI WALANKA LAKI KAIKS:
Siknis kum apia kaka aksidint kum tâka, aspital ra tala yus munaia nit sma mai wibia taim ba ra luki, ¿man dîa dukia nani daukaia sip sma ridi kaia dukiara?
a Man lilia bas bukka smalkanka 39 ba, tala yus munaia dukiara wahbi sakanka nani pain briaia dukiara hilp mai munaia sip sa.