Pamalikam kau lilia kabia dukiara man hilp munaia sip sma

Jehova want sa pamali nani ba lilia lâka ra iwbia (Law 127:3-5; Smas 9:9; 11:9). Kuna sam taim, yawan trabil ailal brisa, apia kaka mistik kum daukan ba mita, pamali bilara lilia lâka ba tikaia sip sa. ¿Pamali uplika kumi bani ba utla ra lilia lâka bâra kaia dukiara dîa daukaia sip sa?

Maya waitna pain kum ba ai maya mairin ra kulkanka yabisa (1Pi 3:7). Ai swapnika nani bri ba nu ba mita, mistik luha kabia bîla kaikras sa. Baku sin, aikuki taim luisa, bara pamali dukiara witin dîa dauki ba ra ai tingkika lâka marikisa (Kol 3:15). Ai latwanka lâka ba marikisa bara bîla yamni nani sin wisa (S.L 31:28, 31).

Maya mairin pain kum ba ai maya waitna ra ban tâ baikisa (S.L 31:12). Ai maya waitna ra bawisa bara witin wal asla wark takaia wilin sa (Kol 3:18). Latwan lâka wal aisisa bara upla wala nani ra witin dukiara pain aisisa (S.L 31:26).

Aisa yapti pain nani ba ai luhpia nani wal taim luisa (Kli S 6:6, 7). Ai latwanka lâka marikisa (Mt 3:17). Ahkia bara nahki wapnika mangkaia nu sa, kuna daukisa taim latwan lâka ni daukisa (Epe 6:4).

Luhpa pain nani ba ai aisa yapti nani bîla wali kulkanka yabisa (S.L 23:22). Aisa yapti nani ra wisa nahki ai dara wali ba bara dîa luki ba. Wapnika mangkisa taim bîla wawalra sa, bara rispik lâka mariki banhwisa (S.L 19:20).

NAHKI WAN PAMALIKA BA LILIA KAIA SIP SA LILKIKA BA KAIKBIA NINGKARA, NAHA MAKABI WALANKA LAKI KAIKS:

• ¿Utla ra lilia lâka bâra kabia dukiara pamali uplika kumi bani ba dîa daukan ki?