¿Upla nani ra ya mita swaki sâkbia? | ¿Baibil dîa wisa?

Kuntri nani Asla takanka naku maisa pakan:

• 2023 manka, octubre kati yua 7 wina yua 23 kat, Gaza bara Israel war aiklabanka tâka, upla 6,400 nani pruan, bara 15,200 nani ra insauhkan sa. Bara naha uplika nani aihkika ba suldawa nani apia kan. Upla milian milian nani ba naha war aiklabanka tâka ai pliska wina plapan sa.

• 2023 manka, septiembre kati yua 24 kat, Rusia bara Ucrania war aiklabanka tâka, Ucrania kuntrika ra upla 9,701 nani pruan sa, bara 17,748 nani ra insauhkan sa.

¿War aiklabanka tâka panis wahwi nani ra Baibil ba dîa sât bîla kaikanka yabisa?

Bîla kaikanka kum briaia sip sa

Baibil ba wisa, Gâd “war nani âpu daukan [kabia] tasba aiska ra” (Lawana Nani 46:9). Gâd, ai Kingka lâka yus muni, naha tasba gabamintka nani sut ra sauhki tikbia (Daniel 2:44). Gâd Kingka lâka ba tasba aiska ra âuyapah lâka bri balbia.

Gâd Kingka lâka Kingka Jisas dîa daukbia ba kaiks:

• “Witin bui swaki sâkbia baha umpira nani makabi ba bara diara luha nani upla bui hilp munras nani ba. Bawikira nani ra ai kupia swapni bribia, bara umpira nani rayaka ba swaki sakan kabia. Witin nani ai rayaka ba mana tara sa, baha mita taibi, saura muni nani ba mihta wina swaki sakan kabia” (Lawana Nani 72:12-14).

Gâd ai Kingka lâka bâk, war aiklabanka bara rau munan lâka tâka pât wahwanka nani bâra ba sut âpu daukbia.

• “Witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa” (Param Marikanka 21:4).

Tisku Gâd Kingka lâka ba naha tasba trabilka nani ba sut wapnika mangkbia. Baibil prapit dahra aisan kan, wan piua ra, “war nani dukiara bara war trabilka nani dukiara sin aisi kabia walma” (Matiu 24:6). Naha sât trabilka, bara tasba ra diara wala nani aihka taki ba wan marikisa, yawan “tnata yua nani ra” iwi ba (2 Timoti 3:1).