Pana dia ansika yama?

1. Diara kum wan makabi waluya taim, dia muni Jisas nahki daukan tanka yawan plikaia sa ki?

¹ Jisas ra diara makabi walan taim witin nahki ai ansika pain yaban ba dukyara, naiwa pyua kat sin upla ba ta iwisa. Smalkaia warkka ba ra diara kum wan makabi walbia taim, Jisas nahki daukan ba aman luki kaikaia aitani sa (1 Pi. 2:​21).

2. Ansika pain kum yabaia wisi, dia help wan munaia sip sa ki?

² Pas pali aman wals. Jisas aman luki kan upla ba dia tawan diara makabi wali kan sapa. Sam taim nit pali sa upla dia rait nu takaia want ba kaikaia wisi pana makabi walanka kum daukaia. Upla kum kum wan wisa: “Man Jisas ra kasak lukisma?”. Sakuna rait pali diakan man krismis kulkras sma tanka nu takaia want sa. Uplika ba dia rait nu takan dauki ba param kaikma kaka, uplika wal tanka kau pain aisi laki kaikma (Luk 10:​25-​37).

3. Baibil wi ba kat ansika kum yabaia wisi, yawan dia helpka brisa?

³ Baibil yus muni aisas. Pyu aihkika ra kau pain sa swiaia Baibil pali ba upla ra ansa munbia (2 Tim. 3:​16, 17; Hibru 4:​12). Razonamiento bukka ba sip sa ansika kasak plikisma ba kat aisaia help tara maikaia. Uplika ba Baibil ra kasak lukras kabia kra sin, man sip sma aman aisi Gâd Bila dia wi ba marikaia. Upla kupia buks ai taimka saki dia dia Baibil ra sins laka kat aisi ba aman laki kaikbia. Jisas tanka mangkan ba kat daukma sa kaka, ansikam nani ba “gûl apilka nani, silba watlika kum ra kahban baku”, prana, pain, bara manakira kabia (Sins.l 25:11 Tasba Raya Lakanka ba).

4. Ahkia taim lika kau pain sa yawan ansika kum yabras kaia?

⁴ Aima bani ansika kum yabaia sma ki? Ansika kum nu apu sma kaka, swiram bripara. Man sip sma dis wiaia: “Ansika ba yang nu apu sna, kuna tanka ba pliki saki kli balaia lika sip sna.” Mamkabi wali ba ra rait luki bauan laka marikisma ba sip sa uplika kupia nikbi kli witin ra wih kaikma mai paiwaia. Wan mapara bui uplika kum, dis ya kau lan sa kaikaia wisi mamkabi walbia sa kaka, Jisas baku kau pain sa yari ra aisaia apia (Luk 20:​1-8). Bara tanka kasak ba rait nu takan daukras uplika kum bui dis man wal blahwaia mai tuskisa kaka, aman aisi kau pain sa bila dakbi kupia yamni bri uplika nani ba plikaia dukyara taimkam yus munma (Mat. 7:6).

5. Upla ansika yabaia dukyara Jisas dia marikan?

⁵ Jisas pain nu kan “diara kasak ba upla nani ra wiaia” warkka daukaia dukyara, Jehova helpka ba nit pali kan. Bara kupia yamni bri uplika ra ansika kum yabaia ba, baha warkka tila kum sa (Jan 18:37). Rait diara tara kum sa, Jisas daukan baku, yawan sin ‘raya ban kaia laka briaia aitani bangwi’ nani ra ansika yabaia! (W.n 13:48.)