Sîbripara!

1. Nahki tnatka ra upla wala dukyara dia sip ba kat daukisa ki?

¹ Jehova Witniska nani ba Gâd Kingka laka sturka smalkisa, baha tnatka ra upla wala nani yamnika dukya­ra dia sip ba kat daukisa (Sins.l 3:27). Smalkaia warkka ba diara kau tara sa, bara upla nani ra sanska yabisa Gâd Gabamintka mununhtara kaia. Baku sin, Gâd Kingka laka sturka aisaia sip sa, ban wina smalkaia, wauhtaya nani yabaia, bara Baibil stadika kum ta krikaia.

2. Dia muni sam taim Baibil stadika kum ta briaia wan srînhka brisa?

² Sam taim wan srînhka brisa Baibil stadika kum ta krikaia. Ban kra, muihni lakri kum kum stadika kum sip ta briras, kan uba wark brisa. Naha ulbanka nani ba help wan munbia Baibil stadika kum ta briaia srînhka bri ba tikaia (Mat. 28:19; W.n 20:20).

3. Dia muni yawan Baibil wina smalkaia sip sa ki?

³ Sîbrisma kaka. Ban kra skul tara dimras kan, apia kaka sip apia baku wan dara walisa, baha mita Baibil stadika kum ta briras. Patitara kristianka nani ba sin “wauhkataya uya lan takras kan.” Sakuna, dia witin nani ra kupia bukan upla wala nani ra wih smalkaia? Witin nani ba “Jisas wal tauki kan” (W.n 4:13). Smasmalkra kau tara, Jisas wina lan takan, bara ai smalkan­ka nani yawan dukya­ra Baibil ra ulban sa. Baha mita yawan skul tara uya dimras kuna, spirit laka ra dia lan taki ba kau kulkan­ka tara brisa (Ais. 50:4; 2 Kor. 3:5).

4. Emus samplika ba wina dia lan takisa ki?

⁴ Pyu kum kum ra, Jeho­va dahra aisasara nani ra yus munan, king nani, apia kaka upla kulkan­ka tara bri kan nani ra smalkaia. Sampla baku, Emus pamalika ba umpira kan. Witin win: “Yang sika dahra Aisasara apia, bara sin lukras sna baku kaia. Yang lika sepad, daiwan nani aihwaki kakaira sna, kwah dusa unta ra pawi nani ba ma nani wahbi taukisna ba wina rayaki brisna” (Emus 7:14). Sakuna Emus ba Jehova smalkanka nani prîst Amasia ra wih wiaia sîbrin apu kan (Emus 7:​16, 17). Yawan wan kupia kraukaia sa Gâd warkka daukisa, bara witin wan smalkbia nahki daukaia (2 Tim. 3:17).

5. Uba wark bri kabia sin, dia muni Baibil stadika kum ta krikaia trai munaia sa ki?

⁵ Taim apu sna. Uba wark bri kabia sin, taim sakaia sip sa wik bani smalkaia dukya­ra. Baibil stadika kum ta briaia ba diara lilia kum sa, baku sin Jeho­va Bila karnika ba upla rayaka chens munisa taim, uba lilia wan daukisa (Hibru 4:12). Jeho­va wan sakripaiska nani ba blis munisa, kan Witin want sa, ‘upla sut ba, kasak tanka ba kakaira taki bangwbia’ (1 Tim. 2:4). Bara insal nani ba sin lilia ai dara walisa upla kum ai saurka wina ai kupia laki spirit laka ra pawisa pyua ra (Luk 15:10).

6. Dia muni diara tara kum sa Gâd kupia laka daukaia?

⁶ Gâd want sa “upla sut ba swaki sakan kabia, kasak tanka ba sin witin nani kakaira taki bangwbia” (1 Tim. 2:4). Diara tara kum sa Jehova kupia laka daukaia, bara Baibil stadika kum sîbrin apukira ta krikaia!