Kau smalkaia dukiara wauhkataya sirpi nani ba yus muns
1. Jehova Witniska nani ba, ¿nahki wauhkataya sirpi nani ba yus munan sa?
1 Piu wihka wina Jehova Witniska nani ba wauhtaya sirpi nani ba yus munisa sturi yamni ba smalkaia dukiara. Bara 1880 manka ra, C. T. Russell bara ai pânika nani naha wauhkataya sirpi nani ba paskaia tâ krikan, baku Watch Tower wauhkataya, aisi kaiki uplika nani ba sip kan wauhkataya sirpi nani upla mihta ra swiaia. Naha wauhkataya sirpi nani ba kulkanka tara bri kan. Baha mita, 1884 manka ra kristian waitna Russell ba wauhkataya nani mana luha ulbi saki yakabaia dukiara adarka brin. Bara naha wauhkataya tract nina ba (“wauhkataya sirpi nani”) pîska kum sa Zion’s Watch Tower Tract Society nina tilara naiwa piua ra Watch Tower Bible and Tract Society of Pennsylvania mâkisa. Bara 1918 manka ra Baibil Stadi Tatakra nani ba 300 milian pura wauhkataya sirpi nani upla ra yaban. Bara naiwa piua ra sin, wauhkataya sirpi nani ba ban yus tara brisa.
2. ¿Wauhkataya sirpi nani ba dîa muni yus tara brisa?
2 Dîa muni yus tara brisa. Wauhkataya sirpi nani ba maplika ailal brisa bara upla nani ba kaikisa taim, aisi kaikaia want sa. Ulbanka nani ba painkira sa bara tânka nani ba bîla kunhku ra smalkisa. Upla nani ba wilin sa wauhkataya nani bara buk kum aisi kaikaia watlika ra wauhkataya sirpi nani wal takaskaia. Baku sin, smalki tataukra raya nani bara tuktan nani sin upla mihta ra swiaia sip sa. Bara wauhkataya nani ba sirpi ba mita plis sut ra brih waia sip sa.
3. Wauhkataya sirpi nani yus tara bri ba dukiara, rayakam ra takan sturka kum, apia kaka wan ulbi sakanka nani ra takan ba dukiara aisas.
3 Upla manis wauhkataya sirpi kum wina tânka kasak ba nu takan. Sampla baku, Haití kuntrika ra mairin kum wauhkataya sirpi kum yabal ra prawi kan sakan, bara aisi kaikan taim win: “¡Naha sika tânka kasak ba!”. Baha wina, Aidrubanka Watla kum ra wan, Baibil stadika kum brin, bara aihtabi takan. Gâd Bîla ba wauhkataya sirpi kum ra ulbi sakan ba mita tingki lukaia sa.
4. ¿Dîa daukaia trai munbia wauhkataya sirpi nani ba upla ra swiaia piua balbia taim?
4 Utla utla ra smalkisa piua ra. Wauhkataya sirpi nani ba yus tara bri ba mita, Yahbra kati wina piu kum kum ra baha nani wal wark taki kabia. Wauhkataya sirpi kum yabaia baman watlika ra naha nani ba upla nani wal aisaia dukiara yus munaia sa. Uplika ba pas yua ba apia kaka kli wih kaikram taim, kau nu takaia ai brinka sa kaka, tânka marikbia nahki Baibil stadika kum briaia sip sa Smalkisa bukka wal apia kaka ulbi sakanka wala wal. ¿Wauhkataya sirpi nani ba nahki upla mihta ra swiaia? Sâtka ailal bâra ba mita ani yus munbia ba pain kakaira takaia sa.
5. Utla utla ra smalkisa taim, ¿nahki wauhkataya sirpi ba upla mihta ra swibia ki?
5 Upla ra nahki aisabia ba dukiara laki kaikaia sa ani wauhkataya sirpi ba yus munbia bara ani pliska ra smalkbia ba. Pas ba, uplika ra wauhkataya sirpi ba yabaia sip sa. Uplika ba ulbanka lalka ba kaiki aisi kaikaia want kabia. Natka wala ba sika wauhkataya sirpi nani sât sât brisma ba mariks bara uplika ba kum wahbi sâkbia. Smalkisa pliska ra upla nani ba ai durka kwâkras sa kaka, uplika kaikbia dukiara pain alki bris bara uplika ra makabi wals dur untika bâk dingkaia sip sma sapa bara dîa luki ba dukiara aisabia. Ulbanka lalka ba makabi walanka kum sa kaka, uplika ra ansika maikbia wis, apia kaka makabi walanka wala daukaia sip sma. Bara baku natka ra uplika wal kau aisaia sip kabia. Baha wina, wauhkataya sirpi ba wina pis kum aisi kaikaia sip sa. Baku uplika ba makabi walanka nani taki ba ansika yabaia sip sa bara dîa luki ba aisaia sanska brisa. Kau pain sa Baibil wina tiks nani ba aisi kaikaia. Uplika wal aisaia danh takma taim, ahkia yua bara awarka kli wih kaikaia wama ba wis. Kangrigisan ba utla kum ra upla âpu sa taim, wauhtaya sirpi kum swisa kaka, pain kabia upla wala nani kaikbia apia pliska kum ra mangkbia.
6. ¿Yabal ra smalkisa piua ra wauhkataya sirpi nani ba nahki yus munbia ki?
6 Yabal nani ra smalkisa taim. ¿Yabal ra smalkaia dukiara, wauhkataya sirpi nani ba pat yus munram sa? Upla nani wapi auya ba isti tauki ba mita, ai brinka apia sa yawan wal takaski sturi aisaia. Baha mita, yawan sip nu takras sa uplika ba rait pali nu takan daukisa sapa. Uplika ba wauhkataya lâs nani ba aisi kaikbia sapa nu âpu ba mita, pain kabia wauhtaya sirpi kum yabaia. Wauhkataya ba sirpi bara tânka kunhku ra ulban ba mita, ban kra uplika ba taim bri kaka, aisi kaikbia. Sakuna uplika ba takaski aisabia kaka, wauhkataya sirpi tânka sut marikaia sip sa.
7. Sampla kum kum mariks nahki wauhkataya sirpi nani ba upla mihta ra swibia ban wina smalkisa piua ra.
7 Ban wina upla ra smalkisa taim. Wauhkataya sirpi nani wal smalkaia ba kau isi sa. Kristian waitna kum ba ai watla wina taki auya taim, ai pakitka ra kum kum brih wisa. Bara upla kum wal aisuya taim, ban kra diara atki pliska dawanka kum wal wauhtaya sirpi kum yabisa aisi kaikbia dukiara. Marit kum Miriki kuntrika (Nueva York) ra wan taim, wauhkataya tara Naciones ba brih wan bara wauhkataya sirpi nani bîla sât sât ra brih wan, kan baha pliska ra upla sât sât ra kaikaia sip kan. Witin nani upla sut ra bîla sât wala aisi kan ba, apia kaka diara wahwi tauki kan uplika bara parki ra iwi, apia kaka plun pi kan uplika nani ra naha wauhkataya sirpi ai bîla aisanka ba kat yabi kan.
8. ¿Dîa tânka ra wauhkataya sirpi nani ba saumuk mâ nani baku sa?
8 ‘Saumukkam ba mangks.’ Wauhkataya sirpi nani ba saumuk mâ nani baku sa. Mamangkra nani ba saumuk ba yakabisa, kan witin nani ba nu âpu sa ani pliska ra mâ takbia ba. Baha mita, Smasmalkra 11:6 wisa: “Saumukkam mâ ba titan ra mangks, bara tutni ra sin mangks, kan man kaikras ani ba yamni takaia ba, tâura, apia ningkara mangkram ba wal, apia kaka wâlsut pâwan kabia”. Baha mita, sins lâka bîla nani ba ban upla ra smalkaia sa. Kan wauhkataya sirpi nani ba tânka pain nani brisa (S.L 15:7).
[Wahya 3 Lilkika ba]
Wauhkataya sirpi nani ba yus tara bri ba mita, Yahbra kati wina piu kum kum ra baha nani wal wark taki kabia.