PÎSKA 13

King pain bara King saura nani

Israel uplika nani nisan wâl ra baiki sakan. King aihkika ba Jehova mapara buan. Babilon uplika nani ba Jerusalem ba sauhki tikan

SALAMAN Jehova mapara buan ningkara, Israel kingka lâka ba nisan wâl ra baiki sakan. Jehova naha dukiara kaina manis aisan kan. Rehoboam, uba lâ karna bri kan ba mita, Israel kiamka 10 yahbra tani ra iwi kan ba silp ai gabamintka mangkan. Bara kiamka wâl waupasa tani ra iwi kan ba Debit kingka lâka tâ baikan. Baha mita, Juda kingka lâka mangkan.

Israel kingka nani ba Jehova bîla walras bara kasak lukras kan. Baha mita, kupia kumi lâka bara âuyapah lâka ba danh takan. Sakuna, king lâka kau saura kan ba sika Israel gabamintka yahbra tani ra iwi kan ba. Kan ai kingka nani ba rilidian kuninkira nani tâ baiki kan. Gâd ai prapitka nani blikan, sampla baku, Elías bara Eliseo —naha nani ba upla pruan kum kum bukan— sakuna witin nani bîla walras kan. Baha wina, Gâd swin Asiria uplika nani ba Israel uplika nani ra sauhki tikbia.

Mani 100 luan ba ra, Juda kingka waupasa tani ra iwi kan ba sin Gâd mita klala yaban. Jehova prapitka nani ba naha kingka nani ra maisa pakan bara hilp munaia trai munan. Sampla baku, king Josías aitani lukan aidul nani ba sauhki tikaia bara tempel ba kli paskan. Baha paski kan piua ra, Moses Lâka ba sakan. Josías liliakira taki aidul mapara buan.

Sari sa wiaia, sakuna king wala nani ba Josías baku apia kan. Baha mita, Jehova swin Babilon uplika nani Juda tasbaya ra war aiklabi pura lubia. Jerusalem sauhki tikan bara swaki takan nani ba alba baku Babilon ra brih wan. Gâd win 70 mani Israel uplika nani ba Babilon tasbaya ra iwbia, sakuna baha wina kli ai tasbaya ra iwbia. Sakuna Juda tasbaya ba upla âpu takaskbia.

Gâd mita pramis munan Kingka ba —Misaya— balbia ba kat, Debit kingka lâka ba upla kumi sin bribia apia. Debit kiamka wina takan kingka nani ai daukanka nani wal marikan upla nani ba king aimakaia ai raitka âpu sa. Misaya baman baha daukaia sip sa. Baha mita, Jehova lâs kingka ra win ai kraunka ba sâkbia bara ya rait pali bribia uplika ra yabia (Isikiel 21:26, 27).

(1 King Nani bara 2 King Nani, 2 Kronikas 10 wina 36 bara Jirimaya 25:8-11 wina sakan sa.)

JONA

Israel kingka lâka ba dakwi takan taim, Gâd prapit Jona ra wark kum yaban: Ninibi tawanka ra waia. Naha pliska ba laihura kan bara uplika nani rau mamunra kan ba mita sauhki tikan kabia. Sakuna Jona sîa bri kan. Baha mita, duri tara kum ra aimaki plis wala ra wan. Witin baha pliska ra kau waras kan ba ra, Gâd daukan inska tarka tara kum Jona ra langkbia. Sakuna inskika ba Jona ra ikras kan. Jona inska biara wina Jehova ra ai pura sunan bara Gâd daukan inskika ba Jona ra kabu un ra aikabi sâkbia. Jona naha sainka kaikan ningkara, Ninibi tawanka ra wan bara Gâd adarka daukan.

Jona Gâd bîla walan, sakuna daukanka wala âpu kan: upla nani ra umpira kaikras kan. Ninibi uplika nani Gâd bîla walan mita, Witin padin munan. Sakuna Jona ai kupia baikan. Baha mita, Jehova sain wala kum daukan. Naha bâk Gâd Jona ra smalkan upla nani ra umpira kaikaia. ¿Dîa sainka kan? Jona bukka aisi kaikma kaka, silp nu takaia sip kama.