Yamni yus muns Smalkisa bukka paskan natka nani bri ba

Baibil stadi tatakra kum ba Baibil rait pali dîa smalki ba lan taki bara alki daukisa taim, witin pâwi kabia bara spirit mâ sâkbia (Law. 1:1-3). Smalkisa bukka ulban natka nani bri ba pain yus munbia kaka, wan stadi tatakra nani ra sip sa hilp munaia pâwbia dukiara.

Tâ kriki makabi walanka nani. Sapta bani makabi walanka wal tâ krikisa, naha nani stadika bilara ansa munisa. Naha makabi walanka nani sip sa yus munaia stadi tatakra ba laki kaikanka aula ba luki kabia dukiara. Apia kaka, sip sa witin ra wiaia makabi walanka bani, wiria ansa munbia. Witin mistik ansa munisa kaka, nit apia sa baha minitka ra wapni mangkaia. Dîa witin ansa muni ba wal, man ra hilp munbia luki kaikaia ani dukia witin nit kabia pain laki kaikaia bara kau marikaia sin (S.L 16:23; 18:13).

Ulbanka tâka. Stadi tatakra ba sapta bîla ra dîa stadi muni ba pain kaikisa kaka, man sip sma kupia bukaia ulbanka tâka ra ani tânka kau kaikaia want ba witin silp pliki kaikbia. Kli stadika wala bribia taim, sip sma minit kum kum witin wal laki kaikaia dîa silp stadi munan ba pain ai tânka brin sapa. Ban sakuna, diara kum witin ra yamni munaisa kaka, aitani sa stadika bîla ra taim kunhku ra ulbanka tâka wina diara kaikaia, apia kaka pis kumi baman aisi kaikaia bara makabi walanka nani man kaina manis ridi daukram ba, daukaia.

Baibil dîa smalki ba bakska. Kupia kraukanka bakska sapta bani brisa lâs ra, tâura tâ kriki makabi walanka nani dukiara ansika brisa. Naha natka wal, man sip sma nu takaia stadi tatakra ba ai tânka brin bara sip sa sapa witin silp tânka pali ba marikaia. Ulbanka bîla bani aikuki aisi kaiks wan bîla baikra ra, baku sin ani tikska baha ulbanka tâ baiki ba sin. Baha wina, stadi tatakra ra wiria wis witin silp baha ulbanka bîla tânka marikbia dîa muni diara kasak sa (Ap. St. 17:2, 3).