PÎSKA 24

Pal kangrigisan nani ra ulban

Pal kristian nani ra karna daukaia dukiara wauhtaya ulbi blikan

KANGRIGISAN raya ba Gâd kupia lâka daukaia warkka ba tâ baikaia kan. Sakuna kristian nani ba nina bliki rau sauhkan lâka wahwi kan, kangrigisan uplika nani wina bara kristian apia kan uplika nani wina sin. ¿Nahki muni ban kasak lâka ra kan? Grik Ulbanka nani ra wauhkataya ulbi blikan 21 bâra sa. Naha ba kristian nani ra karnika bara kupia kraukanka yaban.

Pal ba wauhtaya 14 ulbi blikan. Roman wauhkataya wina Hibru Nani ba kat ulban. Pal mita ulban yaura bliki kan: upla kum ra apia kaka kangrigisan kum ra. Kaisa kaikaia dîa dukiara Pal ba ulban.

Daukanka pain briaia bara rug lâka wina sait ra kaia. Ya rug lâka ra kauhan, apia kaka marit lâka wina sait ra rug lâka dauki ba bara ai kupia lakras kaka, “Gâd king aimaki tasbaya ai dukia bribia apia” (Galesha 5:19-21; 1 Korint 6:9-11). Gâd napakanka nani ba nisan wala uplika nani ra latwan kaikaia sa (Roman 2:11; Epesus 4:1-6). Kristian nani ba dîa bri ba wina upla wala nani ra yabaia sa, bara kau pali ba muihni lakri nani ra (2 Korint 9:7). Apastil Pal ba kristian nani ra win ai kupia kwâki Jehova ra ai pura sunbia: “Piu bani puram suni banhwi bas” (1 Tesalonaika 5:17; 2 Tesalonaika 3:1; Pilipai 4:6, 7). Baku sin, Gâd witin nani pura sunra ba walbia dukiara, kasak lukan lâka wal daukaia sa (Hibru Nani 11:6).

¿Pal ba pamali nani dukiara dîa ulban? Maya waitna nani ba ai maya mairin ra latwan kaikaia sa. Baku sin, maya mairin ba ai maya waitna ra rispik munaia sa. Gâd makabisa luhpa nani ba ai aisa yapti bîla walbia. Bara aisa yapti ba Baibil ra dîa wi ba kat smalkaia sa (Epesus 5:22–6:4; Kolosi 3:18-21).

Naha pliska nani ra Pal wauhtaya nani ulban

Gâd lukanka ba. Moses Lâka ba Israel uplika nani ra main kaikan Misaya balan piua ba kat. Sakuna kristian nani ba Moses Lâka ba nina blikaia apia sa (Galesha 3:24). Pal ba Hibru kristianka nani ra ulban taim —witin nani Ju uplika kan— dîa muni Gâd Lâka yaban tânka marikan. Baku sin, Pal ba marikan Gâd lukanka ra Kraist dîa warkka daukisa. Pal win diara manis Moses Lâka ra taki kan ba maprika bîla ra aisan. Sampla baku, daiwan nani iki sakripais daukaia ba Jisas sakripaiska tânka kan. Naha sakripaiska bâk wan saurka nani sut swih tikan kabia (Hibru Nani 10:1-4). Baha mita, Jisas pruanka bâk Jehova Moses Lâka ba almuk daukan. Naha Lâka kau nina blikaia apia kan (Kolosi 2:13-17; Hibru Nani 8:13).

Kangrigisan ba asla daukan. Waitna nani kangrigisan ra wark nani dauki ba ai daukanka nani pain bri kaia sa, bara spirit lâka ra sin dutki kaia sa (1 Timoti 3:1-10, 12, 13; Taitus 1:5-9). Baku sin, Gâd napakanka sut aidrubanka nani ra wisa, bahara spirit lâka ra diara manis lan takisa bara pana pana ai kupia bukisa (1 Korint 14:26, 31; Hibru Nani 10:24, 25).

Pal ba 2 Timoti ulban piua ra, Rom tawanka ra kan. Bahara silak watla ra mangkan bara Pal bîla kaiki kan wihta nani mawanra buaia. Kristian kum kum baman sibrin âpu Pal ra wih kaikan. Pal nu kan pruaia lamara kan. Baha mita, ulban: “Aiklabanka pain ba yang aiklabri, yabal ba aiska tnata kat plapri, kasak lukan lâka ba ban alki bri kapri” (2 Timoti 4:7). Ban kra piu wiria luan ningkara Pal ra ikan. Baha wauhkataya nani kristian rait aihwa nani ra naiwa piua kat hilp munisa.

(Roman, 1 Korint, 2 Korint, Galesha, Epesus, Pilipai, Kolosi, 1 Tesalonaika, 2 Tesalonaika, 1 Timoti, 2 Timoti, Taitus, Pilimon bara Hibru Nani wina sakan sa.)

¿PRAMIS MUNAN BALAIA KIAMKA BA YA SA KI?

Adam Iv wal saurka lâka daukan ningkara, Gâd ba piuta ra, maprika tânka ra win: ‘Man kiamkam ba mairin kiamka ba wal sin ai waihla kabia; witin bui man lamla ra insauhkbia, bara man pana witin ai mina plakura ra insauhkma’ (Blasi Sturka 3:15). Param Marikanka 12:9 ra marikisa “piuta almuk ba” sika Dibil. Bara pramis munan balaia Kiamka ba mita piuta lal ra insauhkbia tânka ba yukukan ra kan. Sakuna Baibil ba naha tânka ba mani ailal bilara tawa tawa marikan.

Adam Iv wal saurka daukan mani 2.000 luan ba ra, Jehova win Pri sasakra ba Ebraham kiamka wina takbia (Blasi Sturka 22:17, 18). Mani ailal luan ningkara, apastil Pal ba tânka marikan pramis munan balaia kiamka ra upla kau tara ba Misaya kan, wibia sa kaka, Jisas (Galesha 3:16). Kraist pruanka ba maprika tânka ra Blasi Sturka 3:15 ra marikan. Jisas ba “mina plakura” ra insauhkbia. Jisas pruan taim, naha ba aimakan. Sakuna, Gâd ba Jisas ra kli bukan bara “spiritka mapara lika kli raya takan” (1 Pita 3:18).

Gâd sin aitani lukan pramis munan balaia kiamka ba tilara upla wala nani sin bâra kabia, 144.000 upla nani Jisas wal heven ra king aimakbia (Galesha 3:29; Param Marikanka 14:1). Naha uplika nani prubia ningkara, spirit uplika baku heven ra kli bukan kabia bara Jisas wal king aimakbia (Roman 8:16, 17).

Heven ra Jisas ba King kum kabia. Baha mita Dibil kiamka ba sauhki tikbia. Naha ba sika lasa nani bara upla nani Sitan ra tâ baiki ba tânka sa (Jan 8:44; Epesus 6:12). Jisas Kingka lâka ba kupia kumi lâka bara lilia lâka naha tasba ra brih balbia. Baha wina, Jisas piuta “lal ba” insauhkbia, wibia sa kaka, sauhki tikbia (Hibru Nani 2:14).