LISIN 2

Tnatkam ba kat aisas

2 Korint 2:17

BÎLA PRAHNI RA: Tnatkam ba kat aisas bara kupiam wina sin. Baku lika, smalkanka bara upla dukiara dîa lukisma ba latan marikma.

Gâd ra puram suns bara pain ridi taks. Jehova hilpka makas dîa aisama ba sinskam ra mangki briaia dukiara, bara upla ailal mawanra aisaia sringka briaia apia. Dîa tânka nani marikma ba klir nu kaia sma. Dîa ulban ba kat baman aisi kaikpara. Man nahki tânka brisma ba aisas.

Baibil apia kaka ulbi sakanka wala wina aisi kaikma kaka, trai kaiks sturka ba pain kakaira takaia, baku lika aisi kaikma taim, kakahwma apia. Ulbanka ra upla dîa bîla nani win ba aisi kaikma kaka, nahki ai dara wali kan ba kat aisas, sakuna pura praki aisapara.
Kupiam wina aisas. Luki bas upla nani ba smalkanka ba walaia nit sa, bara witin nani ra man sinskam mangki bris. Baku tnatka ra, wînam aiska, mihtam bara mamwan nahki daukisma ba wal kupiam param bara yamni lâka marikma.

Wan tnatka kat aisaia ba bîla aihka aisaia tânka apia sa. Smalkanka ba kulkanka pain bribia dukiara, pain aisi kaiks bara skul nani ra lan dauki ba baku aisi kaiks.
Mai wali uplika nani ra kaiks. Tawankam ra upla nakra ra wihka kaikaia ba saura apia sa kaka, baha daukaia sip sma. Aisanka kum yabisma piua ra, upla sut ra kaikaia watlikara, pas ba upla kumi ra kaiks, ningkara wala nani ra.