¿Jehova Witniska nani ra kakaira sma? Ban kra lamamra iwi uplika kum, man wal wark taki uplika apia kaka skul pânika kum ba Jehova Witniska sa. Ban kra Jehova Witniska nani ba Baibil tânka mai smalkan sa. Sakuna, ¿Jehova Witniska nani ba dîa sât uplika sa bara dîa muni upla nani ra smalkisa?

Jehova Witniska nani ba sin upla wala nani baku sa. Witin nani ba kiamka sât sât wina sa bara ai iwanka natka ba sât wala sin brisa. Tila wina kum kum ba rilidian wala bri kan. Baku sin, Jehova Witniska kum kum ba Gâd ra kasak lukras kan. Sakuna, witin nani sut ba Baibil smalkanka nani ba aman laki kaikan (Apastil Nani Sturka 17:11). Jehova Witniska nani ba Baibil wina dîa lan takan ba ra kasak lukisa, bara kumi bani silp laki kaikan Jehova Gâd ra baman mayunaia.

Baibil stadi taki ba wina yamnika sakan. Upla wala nani baku, Jehova Witniska nani ba trabil brisa bara ai mistikka nani sin. Sakuna, yu bani ai rayaka ra Baibil dîa smalki ba alki daukaia trai munisa. Baha ba ai rayaka ra hilp munan sa kau pain iwaia (Lawana 128:1, 2). Baha mita, witin nani Baibil wina dîa lan takan ba upla wala nani ra smalkisa.

Daukanka pain brisa. Naha daukanka nani ba, Baibil wina lan takan ba, Jehova Witniska nani ra hilp munisa upla wala nani wal asla lâka ra iwaia. Baku sin, witin nani ba diara implikras bara bawan lâka brisa. Naha daukanka nani bri ba mita ai wîna tara mapara pain sa, ai tawanka ra hilp munisa bara ai pamalika nani ba lilia iwisa. Baku sin, witin nani ba rug lâka ba wina sait ra sa. Jehova Witniska nani ba kasak lukisa: “Gâd mapara upla sâtka kumi upla sât wala ba wal aihka apia sa”. Witin nani ba ai uplika nani ra ai muihni lakri baku kaikisa. Baha mita, nisan wala uplika nani ra misbara kaikras bara pulitik tilara sin dimras. Jehova Witniska nani ba upla wala nani baku sa, sakuna ai daukanka nani ba lika sât wala sa (Apastil Nani Sturka 4:13; 10:34, 35).

• ¿Jehova Witniska nani ba nahki natka ra upla wala nani baku sa?

• ¿Jehova Witniska nani ba dîa daukanka pain nani Baibil wina lan takan sa?

Upla ailal lukisa Jehova Witniska nani ba rilidian raya kum sa. Sakuna, 2.700 mani luan ba ra, Gâd uplika nani ba Baibil ra “witnis” nina mâkan (Aiseya 43:10-12). Mani 1931 piua ba kat, yawan ba Baibil Stadi Tatakra nani nina bri kan. Baha mita, ¿ani wina Jehova Witniska nani nina ba brin?

Naha nina wan Gâdka dukiara aisisa. Patitara piua ra, Baibil ra Jehova nina ba, aima 7.000 prais taki kan. Baibil ailal nani ra Gâd nina ba diki sakan sa baha sirka ra Dawan apia kaka, Gâd ulban sa. Sakuna Gâd, Witin dukiara aisi win ai nina kum brisa, Jehova. ‘Dawan Gâd ba Moses kat aisi, win: Yang sika Jehova’ (Impakan Sturka 6:2, wahia mina ba kaiks). Naha tânka ra, Jehova Gâd sât wala sa gâd bahki nani ba wal. Yawan uba lilia wan dara walisa Jehova Witniska nani wan nina mâki ba.

Naha nina wan warkka dukiara aisisa. Patitara piua ra, upla kasakkira manis ba, sampla baku Abel, Jehova ra kasak luki Witin nina bri kan. Mani ailal luan ningkara, Ebraham, Sara, Moses, Debit bara upla wala nani sin “witnis ailal kutbi kir wan bri” uplika nani tilara kan (Hibru Nani 11:4–12:1). Upla kum wihta nani mawanra upla wala dukiara pain aisabi ba baku, yawan Gâd tânka dukiara upla nani ra aisaia want sa.

Yawan Jisas samplika ba nina blikisa. Baibil ra Jisas ba ‘kasakkira bara witnis kasak’ nina mâkisa (Param Marikanka 3:14). Jisas mita ‘Gâd nina ba upla ra smalkan’ bara ‘Gâd tânka kasak ba’ upla ra aisan (Jan 17:26; 18:37). Baha mita, Jisas nina blablikra nani ba Gâd nina ba brisa bara upla wala nani ra smalkisa. Jehova Witniska nani ba naha daukaia trai munisa.

• ¿Dîa muni Baibil Stadi Tatakra nani ba Jehova Witniska nani nina brin?

• ¿Jehova ai witniska nani ba ahkia piua wina brisa?

• ¿Jehova Witniska kau tara ba ya sa ki?

Baibil ba kaina manis win, Jisas prubia ningkara, smasmalkra kuninkira nani kangrigisan tila wina takbia bara tânka kasak ba tâski daukbia (Apastil Nani Sturka 20:29, 30). Piu luan ningkara, Baibil dîa win ba rait takan. Kristian kuninkira nani ba Jisas smalkanka nani wihki rilidian wala smalkanka nani ba wal asla daukan. Baha natka ra, Kristian lâka kuninkira ba takan (2 Timoti 4:3, 4). ¿Yawan nahki nu sa rait pali Baibil dîa smalki ba tânka brisa sapa?

Piu luan ba ra Jehova tânka kasak ba marikan. Witin win las yua nani ra ‘upla sinskira nani ba lika tânka kasak ba bri kabia’ (Daniel 12:9, 10). Mani 1870 ra, dakni sirpi kum tânka kasak ba pliki kan, baku sin ai tânka brin rilidian nani ba Baibil wina dîa smalki kan ba rait apia kan. Sakuna, naha dakni sirpi ba Baibil smalkanka tânka briaia pliki kan, bara Jehova Gâd witin nani ra hilp munan tânka kasak ba lan takaia.

Baibil ba pain laki kaikan. Stadi Tatakra nani ba, Baibil laki kaiki kan baku, yawan sin laki kaikisa. Witin nani Baibil tânka ba kumi bani laki kaiki kan. Baibil tânka kum uba tihu kan kaka, tiks wala ra wih tânka ba pliki kan. Bara baha daknika uplika nani sut sim lukanka bri kan piua ra, wauhtaya nani ra ulbi bri kan. Witin nani ba Baibil tikska nani ba tiks wala wala wal praki muni ai tânka bri banhwi kan. Gâd nina ba, ai Kingka lâka ba, Gâd naha tasba dukiara dîa luki ba, upla pruan nani anira sa, bara upla pruan nani dukiara dîa bîla kaikanka bâra sa, baha tânka nani sut kli witin nani lan takan. Baku sin, naha sut lan takan ba witin nani ra hilp munan rilidian smalkanka bara daukanka saura nani wina sait ra kaia (Jan 8:31, 32).

Mani 1879 ra, Baibil Stadi Tatakra nani lan takan tânka kasak ba upla sut ra tasba aiska ra smalkaia kan. Baha manka ra, La Atalaya. Anunciando el Reino de Jehová wauhkataya ba ulbi sakan. Naiwa piua ra sin naha wauhkataya baku, ulbi sakanka, 700 bîla aisanka nani ra sakisa bara 239 kuntrika nani ra smalkisa. ¡Rait pali tânka kasak ba kau ailal takan sa!

• Jisas pruan ningkara, ¿Baibil tânka kasak ba ra dîa takan?

• ¿Dîa hilp wan munan kli tânka kasak ba lan takaia?

Mani ailal bilara, Jehova Witniska nani ba Baibil sât sât yus muni, ulbi sakan bara upla ra yaban. Sakuna, baha wina witin nani laki kaikan Baibil raya kum paskaia. Naha ba upla ra hilp munbia ‘tânka kasak ba’ lan takaia, kan naha sika Gâd kupia lâka ba (1 Timoti 2:3, 4). Baha mita, 1950 manka ra Traducción del Nuevo Mundo Baibilka wina pîska kum kum ulbi sakan Inglis bîla ra. Naha Baibilka ba 120 bîla pura, sitnika kat lakan sa.a

Baibil kum tânka isi ra ulbi sakaia nit kan. Upla bîla aisanka nani ba chens takisa. Baibil ulbanka aihkika ba upla sut pain ai tânka briras. Ban kra bîla aisanka uba almuk nani yus munisa. Baku sin, Baibil tânka pliki kakaira nani ba patitara Baibil ulbi sakanka nani ba naiwa piua ra brisa, bara naha Baibilka nani ba kau klir aisisa. Baha mita, naha nani ba hilp munan Hibru, Arameo bara Grik bîla ba kau pain tânka briaia.

Baibil kum Gâd dîa wi ba kat aisabia nit kan. Baibil lakan uplika nani ba ai lukanka nani wina lakaia watlika ra, patitara wauhkataya nani ra dîa taki kan ba kat laki ulban. Sakuna, Baibil aihkika ra Gâd nina ba, Jehova, mâkras.

Baibil kum Gâd nina ba marikbia nit kan (2 Samuil 23:2). Traducción del Nuevo Mundo Baibilka ra Gâd nina ba aima 7.000 baku ulbi mangkan sa, naha wahia mâyara mariki ba baku (Lawana 83:18). Mani ailal bilara dîa laki kaikan ba wal Baibil kum pain ba paskan sa, bara naha ba Gâd lukanka nani rait pali marikisa. Baibil kum brisma kaka, kupiam bukisa yu bani aisi kaikma, kan naha sika Jehova Bîla sa (Jasua 1:8; Lawana 1:2, 3).

• ¿Dîa muni Baibil ulbi sakanka raya kum nit kan?

• Upla kum Gâd kupia lâka lan takaia want sa kaka, ¿dîa daukaia sa?