Nu Takan Daukisa

◼ Teleponku Kangrigisan Aidrubanka nani lakisa taim, dia muni aman kaiki yus munaia sa?

Kangrigisan ailal, aidrubanka nani ba telepon bak yaban lakisa. Naha na ban kra siknis taka, apia kaka diara kum pura luan bara ai mihta ra apia kan taka aidrubanka ra pat pat sip waras muni nani ba dukyara sa. Naha tnatka latwan laka ni rait nitka bri nani ra yabaia ba aman kaiki bara tankira laka ni yus munaia sa. Baha mita kangrigisan almukka nani baha pura kaiki ba, pain yus muni sa sapa aman kaikaia sa, kan “diara sut ba painkira bara wapni kat sin dauki” kabia dukyara sa (1 Kor. 14:40).

Kangrigisan almukka nani ba laki kaikaia sa smalki tataukra kum siknis ban swiras, ai wîna tara pain apia nani ra, bara diara sam tawan sip ai watla wina takras muni bara, kau helpka yabaia sa. Baku sin smalki tataukra kum kra apia kaka pawi auya stadi tatakra kum kra pyu wiria siknis takuya, bara sip wapi taukras utla kat kaia nit sa, baha nani ra sin sip sa telepon tnatka yus muni ba yamnika briaia. Bara ya ya teleponku aidrubanka wali ba, baha nani ra sin kulkaia sa aidrubanka ra kan baku. Sakuna kangrigisan ba rait nit bri uplika ra yabaia wisi telepon lainka uya apu sa kaka, tnatka wala plikaia sip sa, aidrubanka sut ba CD apia kaka kaset nani ra sip sa suni briaia bara yarka walbia.

Wel, pat nu sa yamnika nani ba sim kumi baku kabia apia asla aidrubanka nani ra kaiki ba wal. Muihni-lakri wal pana laka pali bri yaba sip daukisa “pana pana help munaia”. Raya bangwi nani ba, aidrubanka nani kulkanka tara bri ba kaikbia bara kumi sin dakbaia want apia kabia. Aidrubanka ra kaia ba, kau latwan laka marikanka nani brisa, kangrigisan almukka nani ba kumi banira help wan munaia sip sa. Bara pamali baku asla wan sakan ba tilara latwan laka kasak ba kaikaia sip sa. Kristian mairin almuk kum, aidrubanka wina taki aula kan bara ya sapa witin ra klubi alkan bara, lilia man naku win: “Naha ba telepon bak sip daukras!”. Kau pain sip wiras kan! (Rom 1:​11,12.)

Pyarkika Ana witin ban tempel ra wi kan baku, naiwa sin wan muihni-lakri kau almuk nani sip sa taim, apia kaka pain ai dara walisa taim, pat pat aidrubanka nani ra kaikisa (Luk 2:​36, 37). Nit taim teleponku aidrubanka nani walisa sakuna aidrubanka ra waia watlika ra tnatka wala isi kum baku kaikras sa. Baha mita yawan aima bani witin nani ra tnata luki liliakira trai munaia sa aidrubanka kum tanis dakbaia apia. Baku wan Gâdka tara Jehova pali bara mayuni kabia (Lawana 95:​1-3, 6; 122:1).