Еремија

23 „Тешко на пастирите што ги упропастуваат и ги растеруваат овците кои се од моето пасиште!“+ — вели Јехова.

2 Затоа, вака вели Јехова, Богот на Израел, против пастирите што го пасат мојот народ: „Вие ги растеравте моите овци, ги расеавте, не се грижевте за нив“.+

„Еве, јас ќе се погрижам за вас поради вашите зли дела“,+ вели Јехова.

3 „Од сите земји по кои ги расеав, јас ќе го соберам остатокот од своите овци+ и ќе ги вратам на нивното пасиште,+ и ќе бидат плодни, и ќе се намножат.+ 4 И ќе им подигнам пастири што ќе ги пасат,+ и од ништо повеќе нема да се бојат, ниту да се плашат,+ и ниту една нема да се изгуби“, вели Јехова.

5 „Еве, доаѓаат денови“, вели Јехова, „кога на Давид ќе му подигнам праведна фиданка.+ Царот ќе почне да царува+ и ќе постапува разборито, ќе го прави она што е исправно и праведно во земјата.+ 6 Во негови денови, Јуда ќе се спаси,+ Израел ќе живее во сигурност.+ А ова е името со кое ќе се нарекува: Јехова Е Нашата Праведност.“+

7 „Затоа, еве, доаѓаат денови“, вели Јехова, „кога нема повеќе да се вели: ‚Како што е жив Јехова, кој ги изведе синовите на Израел од египетската земја‘,+ 8 туку: ‚Како што е жив Јехова, кој го изведе и го доведе потомството на домот на Израел од северната земја и од сите земји‘ по кои ги расеав, и ќе живеат на своја земја.“+

9 Поради пророците, срцето ми е скршено во мене. Сите коски ми се тресат. Станав како пијан човек,+ како човек совладан од вино, поради Јехова и поради неговите свети зборови. 10 Зашто, земјата е полна со прељубници.+ Земјата тагува+ поради клетвата, се исушија пасиштата во пустелијата.+ Зло е она што го прават, неправедно ја користат својата моќ.

11 „Зашто, и пророкот и свештеникот се извалкаа.+ И во својот дом ја наоѓам нивната злоба“,+ вели Јехова. 12 „Затоа нивниот пат ќе им стане како лизгава земја+ во мрак, каде што ќе бидат турнати, и ќе паднат.“+

„Зашто, врз нив ќе донесам неволја, ќе дојде година во која ќе се пресметам со нив“,+ вели Јехова. 13 „Кај пророците на Самарија+ видов срамотни дела. Пророкуваат како пророците на Ваал+ и го заведуваат мојот народ, Израел.+ 14 Кај пророците на Ерусалим видов грозни работи.+ Вршат прељуба+ и кажуваат лага.*+ Ги поддржуваат злосторниците, па ниту еден од нив не се одвраќа+ од својата злоба. Сите тие ми станаа како Содом,+ а неговите жители како Гомор.“+

15 Затоа, вака вели Јехова над војските против пророците: „Еве, ќе ги нахранам со пелин и ќе ги напојам со затруена вода.+ Зашто, од ерусалимските пророци се шири отпадништво+ по целата земја“.

16 Вака вели Јехова над војските: „Не слушајте ги зборовите на пророците што ви пророкуваат!+ Тие ве наведуваат на суетност.+ Ви кажуваат виденија од своето срце,+ а не од устата на Јехова.+ 17 Постојано им зборуваат на оние што ме презираат: ‚Јехова рече: „Ќе имате мир“ ‘.+ И на секој што се поведува по своето тврдокорно срце*+ му велат: ‚Нема да ве снајде никаква неволја‘.+ 18 Зашто, кој беше меѓу блиските пријатели+ на Јехова, па можел да ја види и да ја чуе неговата реч?+ Кој ѝ обрнал внимание на неговата реч за да ја чуе?+ 19 Гледај, ќе дојдат Јеховиниот виор, лутина, голема бура.+ Ќе се спуштат вратоломно врз главата на злите.+ 20 Јехова нема да го одврати својот гнев додека не ги изврши+ и не ги исполни намерите на своето срце.+ Во последните денови ќе размислувате за тоа и појасно ќе го разберете.+

21 Јас не ги испратив тие пророци, а тие сепак трчаат. Не им зборував, а тие сепак пророкуваат.+ 22 Но, да беа меѓу моите блиски пријатели,+ тогаш ќе му овозможеа на мојот народ да ги чуе моите зборови и ќе го поттикнеа да се врати од својот зол пат и да се одврати од своите зли дела“.+

23 „Зар сум јас Бог само одблизу“, вели Јехова, „зар не сум Бог и оддалеку?“+

24 „Може ли човек да се скрие на скришно место, а јас да не го видам?“+ — вели Јехова.

„Не ги исполнувам ли јас небесата и земјата?“+ — вели Јехова. 25 „Слушам што зборуваат пророците кои пророкуваат лага во мое име+ кога велат: ‚Ми се сони! Ми се сони!‘+ 26 До кога ќе биде тоа во срцето на пророците што пророкуваат лага и пророкуваат измами од своето срце?+ 27 Мислат дека со своите сонови, кои си ги раскажуваат еден на друг, ќе го наведат мојот народ да го заборави моето име,+ како што нивните татковци го заборавија моето име поради Ваал.+ 28 Пророкот што сонил сон нека го раскаже, но оној во кого е мојата реч нека ја објавува мојата реч вистинито!“+

„Што има заедничко сламата со житото?“+ — вели Јехова.

29 „Зар мојата реч не е како оган“,+ вели Јехова, „и не е ли како ковачки чекан што раздробува карпа?“+

30 „Затоа, еве, доаѓам против пророците“,+ вели Јехова, „што ги крадат моите зборови еден од друг.“+

31 „Еве, доаѓам против пророците“, вели Јехова, „што кажуваат свои зборови, а велат: ‚Дојде Божјата реч!‘ “+

32 „Еве, доаѓам против пророците што сонуваат лажни сонови,“ вели Јехова, „па ги раскажуваат и го заведуваат мојот народ со своите лаги+ и со своето фалбаџиство.“+

„Но јас не ги испратив, ниту нешто им заповедав. Затоа не се од никаква корист за овој народ“,+ вели Јехова.

33 „А кога овој народ или некој пророк или свештеник ќе те праша: ‚Кое е Јеховиното бреме?‘+ — одговори му: ‚„Вие сте бреме, и тоа големо!+ Ќе ве оставам“,+ вели Јехова‘. 34 Ако некој пророк или свештеник или народот рече: ‚Бреме на Јехова!‘ — ќе го казнам тој човек и неговиот дом.+ 35 Вие вака му велите секој на својот ближен и секој на својот брат: ‚Што одговори Јехова? Што рече Јехова?‘+ 36 Но да не сте го спомнале повеќе+ Јеховиното бреме,+ зашто бремето на секого е неговиот збор,+ а вие ги извртувате зборовите на живиот Бог,+ на Јехова над војските, нашиот Бог!

37 Вака кажи му на пророкот: ‚Што ти одговори Јехова? Што рече Јехова?+ 38 Бидејќи вие велите: „Јеховиното бреме!“ — Јехова вели вака: „Вие велите: ‚Оваа реч е бреме на Јехова‘, иако ви порачував: ‚Не велете: „Бреме на Јехова!“ ‘ 39 Затоа, внимавајте, доаѓам кај вас! И нема повеќе ни малку да ми е грижа за вас,+ ќе ве отфрлам од пред своето лице вас и градот што ви го дадов вам и на вашите татковци.+ 40 И врз вас ќе фрлам вечен срам и вечно понижување, кое нема да се заборави.“ ‘ “+