Лекција 2
Кој е Бог?
Кој е вистинскиот Бог и кое е неговото име? (1, 2)
Каков вид тело има тој? (3)
Кои се неговите извонредни особини? (4)
Треба ли да користиме ликови и симболи додека го обожаваме? (5)
Кои се два начина на кои можеме да научиме за Бог? (6)
1. Луѓето обожаваат многу работи. Но Библијата ни кажува дека има само еден ВИСТИНИТ Бог. Тој создал сѐ што е на небото и на Земјата. Затоа што ни дал живот, тој е Единствениот кого треба да го обожаваме (1. Коринтјаните 8:5, 6; Откровение 4:11).
2. Бог има многу титули, но само едно име. Тоа име е ЈЕХОВА. Во повеќето Библии, Божјето име било отстрането и заменето со титулите ГОСПОД или БОГ. Но кога Библијата била напишана, името Јехова се појавило во неа околу 7.000 пати! (2. Мојсеева 17:15; Осија 12:5).
3. Јехова има тело, но тоа не е како нашето. „Бог е Дух“, вели Библијата (Јован 4:24). Духот е облик на живот кој е многу повисок од нашиот. Ниеден човек никогаш не го видел Бог. Јехова живее на небото, но може да ги види сите работи (Псалм 10:4, 5; Јован 1:18). Но, што е светиот дух? Тоа не е личност како Бог. Поточно речено, тоа е Божјата активна сила (Псалм 103:30).
4. Библијата ни ја открива Јеховината личност. Таа покажува дека неговите извонредни особини се љубов, правда, мудрост и моќ (5. Мојсеева 32:4; Јов 12:13; Исаија 40:26; 1. Јованово 4:8). Библијата ни кажува дека тој исто така е милосрден, љубезен, простува, дарежлив е и стрплив. Ние, како послушни деца, треба да се трудиме да го имитираме (Ефесјаните 5:1, 2).
5. Дали треба да се клањаме или да се молиме на ликови, слики или симболи во нашето обожавање? Не! (2. Мојсеева 20:4, 5). Јехова вели дека мора да го обожаваме само него. Тој нема да ја сподели својата слава со никој или со ништо друго. Ликовите немаат никаква моќ да ни помогнат (Псалм 113:12—16; Исаија 42:8).
6. Како можеме подобро да го запознаеме Бог? Еден начин е преку набљудување на работите што ги создал и преку длабоко размислување за она што ни го кажуваат тие. Божјите дела на создавање ни покажуваат дека тој има голема моќ и мудрост. Неговата љубов ја гледаме во сѐ што тој создал (Псалм 18:1—6; Римјаните 1:20). Друг начин како можеме да научиме за Бог е ако ја проучуваме Библијата. Во неа тој ни кажува многу повеќе за тоа каков Бог е тој. Тој исто така ни кажува за неговата намера и за тоа што сака ние да правиме (Амос 3:7; 2. Тимотеј 3:16, 17).
[Слики на страница 5]
За Бог учиме од творештвото и од Библијата