Дали некогаш си запалил гора?

СЕ РАЗБИРА НЕ — ќе речеш. Но, почекај! Можеби си запалил. Слушни ги зборовите на ученикот Јаков: „А така и јазикот е мал орган, но големи работи зборува. Ете, мал оган, а колку голема гора запалува?“ (Јаков 3:5).

Јазикот е важен орган при зборувањето, но колку само бил злоупотребуван! Луѓето го користат својот јазик да лажат и да клеветат. Со него остро ги критизираат другите, им го нарушуваат угледот и ги измамуваат. Демагозите го користат својот јазик да поттикнат револуција. Адолф Хитлер го употребил својот јазик да мобилизира цела нација за војна — навистина ‚запалена гора‘!

Дури и оние кои имаат добронамерни мотиви можат да предизвикаат малечки ‚запалени гори‘. Си рекол ли некогаш нешто, а веднаш после тоа си зажалил поради тоа што си го кажал? Ако да, тогаш разбираш што мислел Јаков кога рекол: „А јазикот никој не може да го скроти“ (Јаков 3:8).

Меѓутоа, можеме да се обидеме да го употребуваме нашиот јазик за добро. Како и псалмистот, и ние можеме одлучно да кажеме: „Ќе пазам на патиштата мои, за да не згрешам со јазикот свој“ (Псалми 38:1). Наместо остро да ги критикуваме другите, можеме да се обидеме да ги изградуваме. Наместо да ги клеветиме луѓето, можеме да зборуваме добро за нив. Наместо да лажеме и измамуваме, можеме да ја зборуваме вистината и да поучуваме. Кога сме мотивирани од добро срце, јазикот може да зборува прекрасни зацелувачки зборови. Исус го употребил својот јазик на прекрасен начин да го поучи човештвото за спасение.

Навистина, „смртта и животот му се потчинети на јазикот“ (Соломонови изреки 18:22). Дали твојот јазик е смртоносен или е животоспасувачки! Дали ‚запалува гори‘ или ги гасне? Псалмистот му се молел на Бог: „Јазикот мој нека ги разгласи Твоите зборови, зашто сите Твои заповеди се праведни“ (Псалми 118:172). Ако и ние негуваме ваков став како псалмистот, можеме да го употребуваме нашиот јазик за добро.

[Извор на слика на страница 32]

Фотографија на U.S Forest Service