Објаснета книгата Даниел!

КОНГРЕСНИТЕ делегати беа желни да го добијат својот примерок од новата книга од 320 страници Обрни внимание на Даниеловото пророштво! Какво беше нивното мислење за книгата? Разгледај што рекоа некои од нив.

„Како и на повеќето тинејџери, и мене ми е тешко да уживам во проучувањето на древната историја. Затоа, кога го добив мојот личен примерок од новата книга Обрни внимание на Даниеловото пророштво! не бев толку возбудена да ја прочитам, но пробав. Леле, па јас сум имала погрешен став! Ова е една од најдобрите книги кои сум ги сретнала досега. Таа вистински те обзема! Повеќе не мислам дека читам некој извештај што се случил пред илјадници години. За првпат имам чувство дека можам да се ставам на местото на Даниел. Можам вистински да си претставам како би изгледало да те земат од семејството, да те испратат во некоја странска земја и твојот интегритет секогаш одново да биде испитуван. Многу ви благодарам за оваа книга“ (Ања).

„Она што најмногу ми помага е непогрешливата порака дека Јехова има апсолутна контрола над работите кои се поврзани со неговиот народ. Преку визиите и соништата на Даниел и на другите кои тој ги протолкувал, јасно се гледа дека нашиот Бог нема никогаш да дозволи настаните да течат помалку или повеќе надвор од она што тој го предвидел. Ова ја зајакнува нашата надеж во пророчките слики кои се наоѓаат во Библијата во врска со новиот свет што тој ќе го создаде“ (Честер).

„Ми се допадна како го оживеавте Даниел. Подобро се запознав со него преку начинот на кој ги подвлековте неговите грижи и интереси. Можев подобро да разберам зошто тој бил толку пожелен за Јехова. Во текот на сите свои испити и прогонства, не бил загрижен за себеси. Негова најголема грижа бил Јехова и Неговото прекрасно име. Ви благодарам што ги истакнавте овие точки“ (Џои).

„Ова беше токму она што го чекавме! Никогаш порано не било покажано колку книгата Даниел всушност се применува на секого од нас. Откако прочитав голем дел од новата книга уште вечерта кога ја добив, едноставно морав да застанам и во молитва да му се заблагодарам на Јехова“ (Марк).

„Не очекувавме таа да има толкав ефект врз нашите деца. Тие имаат пет и три години . . . Иако приказните за Даниел, Ананија, Мисаил и Азарија отсекогаш биле меѓу нивните најомилени во Моја книга со библиски приказни, сепак, изнесувањето во книгата Даниеловото пророштво влијаеше врз нив на начин на кој не очекувавме. Иако се толку мали, изгледа дека тие можат да се поистоветат со овие праведни млади луѓе. Колку убави примери за имитирање имаат нашите деца! Каква само баснословна алатка ни дадовте! Ви благодариме, многу ви благодариме!“ (Бетел).

„Имав чувство дека се наоѓам токму со младите еврејски момчиња додека ги поднесуваа испитите на нивната вера, и тоа ме охрабри да ја преиспитам мојата вера. Рамката за повторување ‚Што забележа?‘ ја всадува содржината на поглавјето во срцето. Уште еднаш ви благодарам за ова ново ремек-дело“ (Лидија).