Срдечно си поканет

ПОСЛЕДНАТА вечера, што Господ Исус Христос ја вовел пред околу 2.000 години, има повеќе отколку само чисто историско значење. Таа имала силно влијание врз луѓето уште откако била воведена. Поттикнати од тоа што го прочитале во извештаите од евангелијата во врска со она што се случило таа ноќ, мнозина се обиделе на различни начини да ја комеморираат Господовата вечера.

Сево ова е разбирливо, зашто и самиот Исус Христос наредил неговите следбеници да го одбележуваат тој настан и да го прават тоа редовно. Тој конкретно им рекол: „Правете го ова за мој спомен“ (Лука 22:19; 1. Коринќаните 11:23—25).

Се разбира, за да биде одбележувањето навистина наградувачко искуство, мора да се има точно разбирање за неговото значење, што се наоѓа во Божјата реч, Библијата. Освен тоа, важно е да се знае што има Библијата да каже за тоа кога и како треба да се прославува овој настан.

Од послушност кон заповедта на Исус, Јеховините сведоци низ целиот свет ќе се соберат во среда навечер, на 16 април 2003, за да ја комеморираат смртта на Исус. Тоа ќе биде прилика да го испитаат Писмото и да ја обноват својата вера и љубов кон Господ Исус Христос, кој рекол: „Бог толку многу го љубеше светот што го даде својот единороден Син за секој кој практикува вера во него, да не биде уништен, туку да има вечен живот“ (Јован 3:16). Срдечно си поканет да се состанеш со нив таа вечер за да можеш и ти да ја зајакнеш својата вера и љубов кон Исус Христос и кон небесниот Татко, Јехова Бог.