Пишувањето — неговата улога во стариот Израел

ДАЛИ си прочитал некој дел од Илијадата или од Одисејата, двете големи епски поеми од древна Грција? Се смета дека тие биле напишани во деветтиот или осмиот век пр.н.е. Што може да се забележи ако се споредат овие книжевни дела со Библијата, која почнала да се пишува многу векови порано? Во The Jewish Bible and the Christian Bible стои: „Во Библијата најмалку 429 пати се зборува за пишување и за пишани документи. Ова е значајно ако земеме предвид дека во Илијадата само еднаш се зборува за пишување, а во Одисејата ниту еднаш“.

Во The Oxford Encyclopedia of Archaeology in the Near East се објаснува дека „во древниот Израел пишувањето било составен дел од религијата“. На пример, сојузот на Законот, односно Мојсеевиот закон, бил запишан, а потоа редовно се читал јавно пред сите мажи, жени и деца. Исто така, луѓето го читале и го проучувале Законот и како група и насамо. Ален Милард, кој е редовен професор на Универзитетот во Ливерпул (Англија), откако проучил некои аспекти од Законот, заклучил: „Очигледно е дека писателите на Библијата претпоставувале дека Израелците, општо земено, знаат да читаат и да пишуваат“ (5. Мојсеева 31:9-13; Исус Навин 1:8; Неемија 8:13-15; Псалм 1:2).

Апостол Павле објаснува како христијаните треба да гледаат на светите списи: „Сѐ што беше некогаш напишано, напишано е за наша поука, за преку својата истрајност и преку утехата од Писмата да имаме надеж“. Дали ти лично покажуваш ценење за Библијата со тоа што редовно ја читаш? (Римјаните 15:4).