Надминување на трагедијата со помош на Јеховина сила

ОД ДОПИСНИКОТ НА РАЗБУДЕТЕ СЕ! ВО ШПАНИЈА

ВО февруари оваа година, многумина од собранието Баилен на Јеховините сведоци во Шпанија, заедно уживаа во еден прекрасен ден на блиските планини Сиера Невада. Но, само 5 километри од дома, еден автомобил кој доаѓаше кон нив, премина на лентата по која се движеше нивниот автобус, предизвикувајќи директен судар. Настана експлозија и автобусот беше проголтан во пламен. Некои патници можеа да излезат навреме, но многумина во задниот дел од автобусот беа совладани од димот и умреа.

Вкупно 26 Сведоци ги изгубија своите животи, вклучувајќи четири полновремени слуги и неколку деца — речиси четвртина од собранието Баилен. Кралот на Шпанија, Хуан Карлос, ги изразил чувствата на повеќето Шпанци кога во својата телеграма до градоначалникот на Баилен напишал: „Многу сме шокирани од трагичната несреќа. Бидете уверени во нашето искрено сочувство. Ве молиме, пренесете им ги на семејствата на жртвите нашите најдлабоки сочувства и поддршка во овие болни моменти“.

Едно прашање во мислите на некои од илјадниците кои присуствуваа на погребната служба беше: Зошто се случуваат такви трагедии? Јасно е дека несреќите предизвикани од „времето и непредвидениот настан“ (НС) можат да го погодат Јеховиниот народ исто како и секој друг (Проповедник 9:11, 12). Меѓутоа, Јехова ветува дека наскоро на таквите трагедии ќе им дојде крајот (Откровение 21:4, 5).

Многу членови на семејството на подружницата на Јеховините сведоци во Шпанија и илјадници Сведоци од други делови на земјата допатуваа во Баилен за да им дадат утеха и поддршка на локалните браќа. Луѓето од Баилен, како и локалните и регионалните власти, исто така ја споделија жалоста на семејствата Сведоци. Многумина посматрачи беа импресионирани од издржливоста на ужалените Сведоци.

„Ги познавам Сведоците многу години“, забележал Антонио Гомез, градоначалникот на Баилен, „и иако јас лично сум агностик, ѝ се восхитувам на вашата вера. Кога се случи несреќата, веднаш помислив дека вашата религиозна и човечка поврзаност ќе ви овозможи да ја надминете трагедијата подобро од другите групи. Видов како целиот град им даде поддршка на ужалените семејства. Можеби пред тоа луѓето имаа погрешни сфаќања за она што го застапувате, но радосен сум што можам да речам дека тие исчезнаа. Вие имате внатрешна сила која тешко би ја разбрал некој кој не е Сведок.“

Хосе Борел, министер за општествени градежни работи кој присуствуваше на погребот како претставник на владата на Шпанија, признал: „Што можете да им речете на оние кои практично го изгубиле целото свое семејство со еден удар? Ништо што тие самите не би можеле да го најдат во својата вера . . . Вие имате прекрасна вера“.

,Утешувајте се еден со друг‘

Што ‚нашле во својата вера‘? Над сѐ, нашле утеха од Јехова, „Бог на секоја утеха, Кој нѐ утешува при секоја наша мака“ (2. Коринтјаните 1:3, 4). И покрај нивната жалост, тие пронашле сила да се утешуваат еден со друг, земајќи ги при срце Павловите зборови до солунјаните: „Утешувајте се и изградувајте се еден со друг“ (1. Солунјаните 5:11, НС).

Трогателно искуство беше да се види како христијански браќа и сестри, од кои некои изгубија дури и осум роднини, посетуваат други ужалени членови на собранието. „Кога се видовме, заплакавме. Но, низ солзите се потсетивме на надежта во воскресение и се чувствувавме утешени“, објаснил Франсиско Саез, претседавачкиот надгледник, кој самиот ги изгубил своите единствени две деца.

„Не ја запоставивме нашата проповедничка активност и вложивме посебен напор да ги посетиме роднините на починатите кои не се Сведоци, користејќи ја брошурата Кога ќе умре некој што го сакаш.“ Франсиско продолжил: „Јас лично сакав да проповедам бидејќи знаев дека проповедајќи им на другите ќе се чувствувам подобро. И сосема сигурно, иако одев плачејќи, дома се враќав утешен“.

Луѓето од Баилен многу поволно реагираа на ова дело на сведочење. Една недела после несреќата, Енкарна, која ја оплакувала загубата на своите две ќерки и четири внуци, посетила една госпоѓа со која неодамна започнала библиска студија. Енкарна ѝ давала библиска утеха на оваа жена, чиј сопруг умрел четири месеци пред тоа. „Сега треба да се тешиме една со друга“, рекла таа додека продолжиле да ја разгледуваат брошурата Кога ќе умре некој што го сакаш.

Веднаш следеше и поддршка од братството ширум светот. „Целото собрание се чувствува толку охрабрено од илјадниците писма и телеграми што ги добивме“, објаснил Франсиско Капиља, собранискиот секретар. „Поштата мора секој ден да испраќа комбе директно до нашата куќа за да ги испорача сите. Многу сме благодарни за грижата полна со љубов од нашите браќа.“

Надеж од трагедијата

Дали од таква трагедија може да произлезе нешто добро? „На умните срцето им е во куќата, каде што плачат“, напишал древниот цар Соломон (Проповедник 7:4). Во согласност со ова начело, трагедијата во Баилен поттикна некои луѓе да размислат посериозно за својот однос со Бог. Фаустино, еден сопруг неверник кој во несреќата изгубил две од своите шест деца, ѝ рекол на својата сопруга Долорес: „Имам да ти кажам една добра вест. Ќе почнам да ја проучувам Библијата, бидејќи сакам да ги видам моите деца во новиот свет“.

Иако нашите браќа и сестри во Баилен нема брзо да ја надминат својата жалост, тие ги тешат другите, а исто така добиваат утеха и самите тие. Јехова ги зајакнува со својот дух и со поддршката од многумина браќа и сестри кои се полни со љубов. Нашите молитви и понатаму одат во нивна корист кон нашиот небесен Татко.

[Слики на страница 26]

Четири од оние што загинаа