Добредојдовте на обласниот конгрес „Учители на Божјата реч“!

МИЛИОНИ ЌЕ ПРИСУСТВУВААТ на стотици локации во целиот свет. Веројатно еден од овие тридневни собири — од петок до недела — ќе се одржи во некој град во близина на Вашиот дом.

На повеќето места, програмата ќе започнува со музика секој ден во 9.30. По уводното предавање во петок ќе следат говорите на библиските теми „Поучувањето за Царството донесува добар плод“, „Поттикнати од ‚величествените Божји работи‘“ и „Најди радост во Јеховината праведност“. Утринската сесија ќе заврши со клучното предавање „Целосно опремени како учители на Божјата реч“.

По првиот говор попладне, „Исчистени како народ за добри дела“, ќе следи триделниот циклус „Да се поучуваме себеси додека ги поучуваме другите“. Тој ќе нагласи колку е важно човек да го практикува она што го проповеда во поглед на моралот, личната библиска студија и потребата да се спротивставуваме на напорите на Ѓаволот да нѐ измами. Ќе следи говорот „Гади се од светското зло на порнографија“. Потоа, програмата за тој ден ќе заврши со една дискусија за 60. поглавје на Исаија, со наслов „Јехова го разубавува својот народ со светлина“.

Предавањата во сабота, „Да најдеме освежување под Христовиот јарем“, „Имитирај го Големиот Учител“ и „Дали си спремен да им служиш на другите?“ ќе се сосредоточат на потребата да се следи Христовиот пример. Во сабота ќе има и два циклуса што ќе траат по еден час. Тие се со наслов „Министрите преку кои другите стануваат верници“ и „Извлечи поцелосна корист од теократското образование“. Во утринскиот циклус ќе чуеме предлози за тоа како да се прават ученици, а попладневната програма ќе истакне начини на кои можеме да извлечеме поцелосна корист од библиската студија и од присуството на христијанските состаноци. Утринската програма ќе заврши со една дискусија за крштавањето, а по неа ќе имаат прилика да се крстат оние што се квалификуваат за крштавање. Многумина со нетрпение ќе очекуваат да го чујат завршниот говор во сабота попладне, „Нови подготовки за нашиот духовен напредок“.

Програмата в недела претпладне вклучува еден триделен циклус во кој ќе се дискутира за книгата Малахија и ќе биде дадена добра примена во врска со ситуациите во нашево време. По него ќе следи една костимирана драма за побуната на Кореј, Датан и Авирон против Мојсеевиот авторитет што му го доделил Бог. Потоа, еден говор ќе ја истакне пораката што ни ја пренесува драмата. Во попладневната програма ќе го чуеме и јавното предавање со наслов „Кои се тие што ги поучуваат сите народи за вистината?“

Сигурно ќе бидеш духовно збогатен ако присуствуваш сите три дена. За да ја дознаете локацијата што е најблизу до Вашиот дом, стапете во контакт со локалната Сала на Царството на Јеховините сведоци или пишете до издавачите на ова списание. Во изданието на нашето придружно списание Стражарска кула од 15 февруари 2001 има список на некои конгресни локации.