Волчји трн — грмушка со разни намени

◼ Ако во рана есен патуваш низ дивината на Русија, ќе наидеш на волчји трн — мала грмушка начичкана со ситни, светлопортокалови бобинки што личат на мониста. Тие не растат во гроздови, туку дословно го прекриваат секое гранче, красејќи го со својата привлечна боја.

Бобинките не се отровни, но пази да не се набодеш на острите трнови додека ги береш! Мора да ги береш една по една и да внимаваш да не ги згмечиш. Бидејќи му годи студена клима, волчјиот трн може да се најде во планинските предели од северозападна Европа до Алтај (Централна Азија), како и во западна и северна Кина и на северната страна од Хималаите. Народите во Кина, Русија и Тибет со векови ги ценеле неговите бобинки.

Волчјиот трн се спомнува во класичните тибетски медицински записи и во древната грчка литература. Се смета дека неговиот грчки назив, ипофаи́, кој буквално значи „сјаен коњ“, доаѓа од еден обичај на античките Грци кои на некој начин ги користеле бобинките или лисјата од грмушката за да му дадат сјај на влакното на тркачките коњи.

Во Северна Америка волчјиот трн го пренеле руските доселеници на почетокот од 20 век. Тие донеле во Канада и во САД грмушки од Сибир заради одгледување на големи површини. Денес, оваа грмушка се одгледува во многу земји за прехранбени и за медицински цели.

Нејзините бобинки меѓу другото содржат витамин Ц и Е, фолна киселина, каротеноиди, масни киселини и флавини. Неодамна беа направени медицински истражувања за да се потврдат лековитите својства на овие бобинки, за кои се тврди дека помагаат при лекувањето на ракот, кардиоваскуларните болести, желудочно-цревните чиреви и заболувањата на кожата и на црниот дроб. Од бобинките се прави и освежителен пијалак со киселкав вкус, кој се користи како лек за многу болести.

Многу ценет дел од бобинката на волчјиот трн е нејзиното малечко црно семе. Поголемиот дел од хранливите материи во бобинката се наоѓаат во маслото од ова семче. Според некои истражувања, маслото од волчји трн го зајакнува имунитетот, а се користи и во козметиката, како и во производите за нега на кожата бидејќи се смета дека го подмладува нејзиниот изглед.

Ако некогаш престојуваш во Русија, можеби ќе имаш прилика да уживаш во убавината на портокаловите бобинки на волчјиот трн. Но, како што веќе спомнавме, убавината не е единствената јака страна на ова растение. Тоа е едно од многуте  созданија кои покажуваат колку мудар и добар е нашиот Творец!