Книга во која можеш да имаш доверба — седми дел

Седмата светска сила

Ова е последна од седумте статии во „Разбудете се!“ што зборуваат за седумте светски сили од библиската историја. Нивна цел е да покажат дека Библијата е веродостојна и вдахновена од Бог и дека нејзината порака влева надеж дека ќе им дојде крајот на страдањата што се последица на суровото владеење на луѓето.

ЖИВЕЕМЕ во многу посебно и значајно време — времето кога на политичката сцена се појавува седмата светска сила од библиската историја. Освен тоа, оваа сила е единствената што во Библијата се спомнува само пророчки, зашто претходните шест се дел и од библиската историја. Во врска со седумте сили, или „цареви“, во Библијата е проречено: „Тие претставуваат седум цареви: петмина паднаа, еден владее, а другиот уште не дошол, но кога ќе дојде, ќе остане кратко време“a (Откровение 17:10).

Пред нешто повеќе од 1.900 години, кога биле запишани тие зборови, пет од седумте „цареви“, или политички империи, веќе ‚паднале‘. Тоа биле Египет, Асирија, Вавилон, Медо-Персија и Грција. Изразот „еден владее“ се однесувал на Рим. Меѓутоа, Рим не требало да владее засекогаш. Ќе имало уште една империја, или цар, но пророштвото гласело: „[Тој] уште не дошол“. Во склад со библиските пророштва, седмиот ‚цар‘ навистина се појавил на светската сцена! Која била таа империја? Дали ќе владее во недоглед? Ако не, како ќе си замине од светската сцена? Библијата јасно ни го кажува тоа.

Веродостојни пророштва

Можело да се наѕре која ќе биде седмата светска сила кога Англија, во северозападниот дел на Римското Царство, полека почнала да излегува од анонимноста. Во 1760-тите, оваа островска нација прераснала во моќната Британска Империја. Моќта и богатството на Британија продолжиле да растат, па во 19 век таа станала најбогатата и најмоќната нација во светот. Во една книга пишува дека „Британската Империја била најголемата империја што некогаш постоела во светот“. Имала „372 милиони жители и зафаќала површина од над 28 милиони квадратни километри“.

Но, Првата светска војна (1914-1918), ја натерала Британија да влезе во еден посебен однос со Соединетите Држави, нејзина поранешна колонија. Каков бил резултатот од тоа? Британската Империја му го отстапила местото на англо-американскиот сојуз, кој во многу аспекти претставува двојна светска сила која трае до ден-денес. (Види ја рамката „Значаен сојуз“.)

Пророштвото од Откровение 17:10 дополнува едно друго пророштво од книгата Даниел. Даниел пишувал за еден „голем кип“ што вавилонскиот цар Навуходоносор го видел во едно видение што го добил од Бог (Даниел 2:28, 31-43). Даниел му открил на царот дека деловите од телото на кипот ги претставуваат политичките империи што една по друга се менувале на светската сцена, почнувајќи од Вавилон, кој тогаш бил светска сила. (Египет и Асирија веќе поминале.) Историјата го потврдува следново:

Главата од злато го претставувала Вавилонското Царство.

Градите и рацете од сребро биле претслика за Медо-Персија.

Стомакот и колковите од бакар укажувале на античка Грција.

Нозете од железо го претставувале Римското Царство.

Стапалата, мешавина од железо и глина, симболизираат колку разединет е светот во политички и социјален поглед за време на владеењето на англо-американската светска сила.

Според Откровение 17:10, седмата светска сила „ќе остане кратко време“. Колку долго е тоа? Како ќе исчезне од светската сцена? И што ќе се случи потоа? Даниел ни кажува многу во врска со овие прашања.

Сигурна надеж

Откако го опишал големиот кип, Даниел напишал: „Се отцепи камен [од една планина], без да го допрат човечки раце, и го удри кипот во стапалата од железо и глина, и ги здроби“ (Даниел 2:34). Што претскажувала оваа импресивна глетка?

Даниел продолжил: „Во деновите на тие цареви, небесниот Бог ќе подигне царство, кое нема никогаш да пропадне. И тоа царство нема да премине на некој друг народ. Тоа ќе ги сотре и ќе ги уништи сите други [земни] царства, а самото ќе стои довека“b (Даниел 2:44, 45). Обрни внимание на овие важни детали:

1. Победничкото Царство, претставено со големиот камен, ќе биде ‚подигнато‘ од Бог, а не од „човечки раце“. Затоа, со право е наречено Божје Царство.

2. Божјето Царство „ќе ги сотре“ сите човечки влади, вклучувајќи ја и седмата светска сила. Зошто? Затоа што сите тие ќе одбијат да се откажат од својата моќ и ќе застанат против Бог во последната голема војна на симболичното место наречено Ар-Магедон, или Армагедон. Библијата јасно кажува дека во оваа војна се вклучени „царевите од целиот свет“ (Откровение 16:13, 14, 16).

3. За разлика од минливите човечки влади, вклучувајќи ги и седумте светски сили, Божјето Царство „никогаш нема да пропадне“. Освен тоа, ќе владее над целата Земја (Даниел 2:35, 44).

Конечното уништување на Божјите противници ќе биде впечатливо исполнување на пророштвото од 1. Мојсеева 3:15, кое беше спомнато во првата статија од овој циклус. Потомството на жената, Исус Христос, ќе ги смачка симболичната змија, Сатана, и неговото семе (Галатите 3:16). Во потомството на Сатана спаѓаат сите луѓе што тргнале по неговите злобни стапки и кои сметаат дека луѓето сами треба да си владеат, а не Бог или Христос (Псалм 2:7-12).

Ова наметнува едно многу важно прашање: Кога ќе се случи тоа конечно уништување? Да, кога ‚каменот‘ — Божјето Царство — ќе ја отстрани секоја трага од човечкото владеење? Како одговор, во Библијата е даден „знакот“ по кој ќе се препознаат последните денови (Матеј 24:3).

Препознај го „знакот“!

Во знакот за крајот спаѓаат војни по цел свет, „силни земјотреси“, „смртоносни зарази“ и голем „глад“ (Лука 21:10, 11; Матеј 24:7, 8; Марко 13:8). Обележје на „последните денови“ ќе биде и сериозен морален и духовен пад во општеството (2. Тимотеј 3:1-5). Дали „сето ова“ се случува? (Матеј 24:8). Да — и тоа во толкава мера што многу луѓе се плашат од иднината. Во весникот The Globe and Mail пишуваше: „Некои од најпочитуваните стручњаци што ги изучуваат науката и општеството изнесуваат алармантни предвидувања дека човечката раса ќе исчезне“.

Меѓутоа, овие предвидувања не се точни во еден многу важен аспект — човечката раса нема да исчезне. Гаранција за ова е тоа што Божјето Царство ќе се вмеша во работите! Кога го дал знакот за крајот, Исус Христос рекол: „Оваа добра вест за царството ќе биде проповедана по целиот свет, за сведоштво на сите народи, и тогаш ќе дојде крајот“ (Матеј 24:14). Како се исполнува ова пророштво?

Во преку 230 земји, Јеховините сведоци го објавуваат Царството на Бог. Впрочем, насловот на нивното главно списание е Стражарска кула го објавува Јеховиното Царство, а Јехова е името на Бог (Осија 12:5). Со своите напори да ги поучуваат луѓето за Библијата, Сведоците им помагаат на безброј поединци и семејства да го остават лошиот начин на живот и да живеат чисто и мирно во склад со Божјите мерила (1. Коринќаните 6:9-11). Како резултат на тоа, милиони луѓе низ целиот свет се уверени дека Бог ќе ги заштити кога неговото Царство ќе се вмеша во работите на Земјата.

Да, тие со свои очи ќе го видат исполнувањето на молитвата што ја кажал Исус, позната како Оченаш, во која, меѓу другото, рекол: „Да дојде царството твое. Да биде волјата твоја, како на небото така и на земјата“ (Матеј 6:10). Си размислувал ли каков ќе биде животот на Земјата кога сите луѓе ќе го сакаат Бог и ќе му бидат послушни? Следниве библиски стихови може да ти помогнат да сфатиш зошто изразот „добра вест“ е сосема соодветен.

Кога Божјата волја ќе се врши на Земјата...

● Не само што ќе нема војни туку ќе има вистински мир. „Јехова... ги прекинува војните до крајот на земјата. Го крши лакот, го здробува копјето, со оган ја пали колата“ (Псалм 46:8, 9). „Кротките ќе ја поседуваат земјата и ќе уживаат во изобилен мир“ (Псалм 37:11).

● За сите ќе има изобилство храна. „На земјата житото богато ќе роди, по планинските врвови ќе го има во изобилство“ (Псалм 72:16).

● Сите ќе имаат совршено здравје. „Никој од жителите нема да рече: ‚Болен сум‘“ (Исаија 33:24).

● Секој ќе има удобен дом. „Тие ќе градат куќи и ќе живеат во нив, ќе садат лозја и ќе го јадат нивниот род. Нема тие да градат, а некој друг да живее во нив, нема тие да садат, а некој друг да го јаде нивниот род“ (Исаија 65:21, 22).

● Сите страдања ќе завршат. „Божјиот шатор [е] меѓу луѓето... и [Бог] ќе ја избрише секоја солза од нивните очи и смрт нема да има веќе, ни тага, ни пискот, ниту болка. Сѐ што беше порано, помина“ (Откровение 21:3, 4).

Ти се допаѓаат ли овие ветувања? Јеховините сведоци те поттикнуваат уште подобро да ја испиташ Библијата. Така ќе видиш уште докази кои потврдуваат дека ќе заврши суровото владеење на луѓето. Ќе видиш и дека Библијата заслужува да имаш потполна доверба во неа и дека таа навистина е Божја Реч (2. Тимотеј 3:16).c

[Фусноти]

[Рамка/слика на страница 17]

ЗНАЧАЕН СОЈУЗ

На заедничка прес-конференција со британскиот премиер Дејвид Камерон, американскиот претседател Барак Обама, во јули 2010 год., изјави: „Не претеруваме кога велиме дека Соединетите Држави и Обединетото Кралство имаат навистина посебни односи. Нѐ спојува заедничко минато. Имаме исти вредности... Пред сѐ, нашиот сојуз толку успешно опстојува затоа што се темели на заеднички интереси... Кога Соединетите Држави и Обединетото Кралство дејствуваат здружено, нашите народи — а и сите народи во светот — се побезбедни и посреќни. Накратко кажано, Соединетите Држави немаат поблизок сојузник и поцврст партнер од Велика Британија“.

[Графикон на страница 16]

(Види во публикацијата)

Вавилон

Медо-Персија

Грција

Рим

Британија и Соединетите Држави

[Слика на страница 18]

Библијата ветува дека ќе има вистински мир кога ќе владее Божјето Царство

[Извори на слики на страница 15]

Временска линија: Египетски ѕиден релјеф и биста на Нерон: Фотографија направена со љубезна дозвола на British Museum; персиски ѕиден релјеф: Musée du Louvre, Париз