Дали усните ти се „скапоцен украс“?

● „Има злато и многу бисери, но усни на кои има знаење се скапоцен украс“, напишал цар Соломон уште многу одамна (Изреки 20:15). Златото отсекогаш било многу ценето, а во времето на Соломон голема вредност имале и бисерите. Но, нашите усни можат да бидат поскапоцени и од златото и од бисерите. Зошто? Не поради нивниот физички изглед, туку поради зборовите што излегуваат од нив.

Од скапоцените усни излегуваат убави работи, како што се добрина, љубезност и љубов. А бидејќи се „усни на кои има знаење“, тие ја кажуваат и вистината за Бог што е запишана во Библијата. Оваа прастара книга е полна со мудрост и ја содржи вистината за нашиот Творец, а во неа наоѓаме и одлични животни поуки (Јован 17:17).

Но, за жал, многу луѓе ги користат своите усни на погрешен начин со тоа што кажуваат невистини за Бог. На пример, некои го обвинуваат за неправдите и страдањата што се случуваат низ светот, за кои, реално гледано, главно се виновни самите луѓе. Во врска со тоа, во Изреки 19:3 пишува: „Човековото лично безумие животот му го упропастува, а тој Господа го обвинува!“ (Радосна Вест).

Други ја намалуваат вредноста на своите усни така што зборуваат неискрено, озборуваат, па дури и клеветат. Во Изреки 26:23 е дадена следнава силна споредба: „Како сребрена глазура на парче скршен земјен сад, такви се срдечните усни со зло срце“. Како „сребрена глазура“ под која се крие обична глина, зад „срдечните усни“, кои може да изгледа дека изразуваат длабоки чувства, па дури и искреност, може да се крие „зло срце“ (Изреки 26:24-26).

Се разбира, злото што се крие зад ваквите усни не е скриено од Бог. Тој гледа какви сме вистински! Затоа, Исус Христос рекол: „Исчисти ги чашата и чинијата првин однатре, за да бидат чисти и однадвор“ (Матеј 23:26). Колку се точни овие зборови! Освен тоа, ако имаме чисто срце и го полниме со вистините од Божјата Реч, тоа сигурно ќе се одрази на начинот на кој зборуваме. Каков ќе биде резултатот? Нашите усни ќе бидат „скапоцен украс“, особено во очите на Бог.

[Слика на страница 19]

Усните на оној што е мудар се „скапоцен украс“