Прошири го кругот на пријатели

Коренот на проблемот

Ако ги избегнуваме луѓето од групите за кои имаме негативно мислење, нашите предрасуди само уште повеќе ќе се продлабочат. А ако се дружиме само со луѓе кои се како нас, тогаш може да почнеме да си мислиме дека начинот на кој ние размислуваме и се однесуваме, и нашите ставови се најдобри.

Библиско начело

„Широко отворете ги своите срца“ (2. КОРИНЌАНИТЕ 6:13).

Што учиме од ова? Кога зборуваме за нашето срце, честопати мислиме на нашите чувства. Ако ни се мили само луѓето што се слични на нас, во нашето срце ќе нема место за другите. За да не дојде до тоа, мора свесно да се трудиме да се спријателуваме со оние што се поинакви од нас.

Како ќе ни помогне тоа што ќе го прошириме кругот на пријатели

Кога ќе ги запознаеме другите подобро, ќе ни стане појасно зошто ги прават работите поинаку од нас. И тогаш не се концентрираме на разликите, туку стануваме поблиски со нив. Почнуваме повеќе да ги цениме и да имаме поголемо разбирање за нив.

Да го разгледаме примерот на Назаре која порано имала предрасуди кон мигрантите. Таа објаснува што ѝ помогнало: „Кога почнав да се дружам и да работам со нив, видов дека нема ни трошка вистина во она што другите го кажуваа за нив. Кога ќе се спријателиш со луѓе од поинаква култура, сфаќаш дека не можеш да ги ставиш сите во ист кош. Почнуваш да ги гледаш како поединци и да ги сакаш и да ги цениш како поединци“.

Биди претпазлив

Некои луѓе избираат да живеат на начин со кој си штетат и себеси, но и на другите. Затоа да внимаваме кого ќе избереме за свој пријател. Ако не сакаме да се дружиме со луѓе што се нечесни или неморални, тоа не значи дека имаме предрасуди. Мудро е да не избираме пријатели кои не живеат според нашите морални мерила. Но, од друга страна, нема ни да правиме нешто со што би им наштетиле или би им ги ускратиле нивните права (Изреки 13:20).

Што можеш да направиш

Барај прилики да поразговараш со луѓе кои се од друга земја, од друга етничка група или луѓе кои зборуваат друг јазик. Што би можел да направиш? Еве неколку предлози:

Замоли ги да ти раскажат нешто за себе.
Покани ги да јадете заедно.
Слушај додека ти раскажуваат за нив и дознај кои работи им се важни во животот.

Ако се потрудиш да разбереш низ што сѐ поминале и како тоа ги обликувало како личности, можеби ќе почнеш да гледаш позитивно и на другите што припаѓаат на таа група.

Реален пример: Кандасами и Сукама (Канада)

„Пораснавме во Јужноафриканската Република за време на апартхејдот. Луѓето од различни раси беа принудени да живеат одвоено едни од други, а тоа, пак, уште повеќе ги подгреваше предрасудите. Ние не сме белци и воопшто не ги сакавме белците затоа што нѐ гледаа од високо. Во тоа време не сметавме дека имаме предрасуди кон белците. Напротив, сметавме дека ние сме жртви на предрасуди.

За да го смениме својот став, решивме да почнеме да се дружиме со луѓе што се со поинакво потекло. Почнавме да се дружиме и со некои белци и тогаш сфативме дека и не сме многу различни. Сите имаме слични околности и слични проблеми.

Еднаш дури одлучивме во нашиот дом на подолго време да престојува еден брачен пар кои беа белци. Тоа ни овозможи подобро да се запознаеме. За кратко време се спријателивме и не гледавме разлики меѓу нас. Како резултат на тоа, се смени и нашето мислење за белците.“