КАКО ДА СЕ СПРАВИШ СО РАСТЕЧКИТЕ ЦЕНИ

Мудро управувај со парите

Сѐ повисоките цени ни го отежнуваат животот на сите нас. Но, нема потреба да се чувствуваш како беспомошна жртва. Можеби има работи што можеш да ги направиш за да ја подобриш твојата ситуација.

ЗОШТО Е ВАЖНО

Доколку барем не се обидеш мудро да управуваш со парите, тоа може да води до уште поголеми финансиски проблеми и грижи. Дури и ако имаш малку пари, можеш да направиш некои работи кои ќе ти помогнат добро да управуваш со нив.

ШТО МОЖЕШ ДА ПРАВИШ

Пушти си ги нозете колку што ти е долга чергата. Ако живееш во границите на своите можности, веројатно, ќе имаш поголема контрола врз својата финансиска ситуација и нема да бидеш исфрлен од колосек доколку ти се појават непредвидени трошоци.

За да можеш да живееш во границите на своите можности, изготви си буџет — план за твоите приходи и трошоци. Додека го правиш буџетот, добро размисли кои се твоите вистински потреби. Потоа, давај сѐ од себе да се држиш за твојот план за трошење и биди спремен да го менуваш доколку се променат цените или износот на твоите приходи. Се разбира, доколку си во брак, и твојот сопружник треба да биде вклучен во одлуките.

Предлог: Наместо да купуваш работи со кредитна картичка, доколку е можно, плаќај во кеш. Некои сфатиле дека на тој начин може да имаат подобра контрола врз нивниот буџет, па дури и дека тоа им помага да не се задолжуваат. Освен тоа, одвојувај си време за да ги разгледаш извештаите од банката. Помалку ќе бидеш под стрес ако знаеш со колку пари, всушност, располагаш.

Не е секогаш лесно да живееш во границите на своите можности. Но еден практичен и добро промислен буџет може да ти биде од голема помош. Исто така, ќе имаш помалку грижи околу парите.

„[Пресметај го] трошокот“ (Лука 14:28).

Давај сѐ од себе за да ја задржиш работата. Што можеш практично да направиш за да ја зачуваш твојата работа? Еве неколку предлози. Доаѓај навреме на работа. Имај позитивен став кон твојата работа. Покажувај иницијатива и биди трудољубив. Покажувај почит. Држи се за правилата и труди се да ги подобриш твоите вештини.

Немој да се расфрлаш со пари. Прашај се: „Дали често трошам пари на скапи работи или на работи кои не ми се потребни, па дури и се штетни за мене?“ На пример, многу луѓе ги фрлаат своите тешко заработени пари на дрога, коцкање, пушење или на прекумерно пиење алкохол. Овие навики може и да им ги загрозат здравјето и работата.

„Среќен е човекот што ќе најде мудрост... подобро е да стекнеш мудрост отколку да стекнеш сребро“ (Изреки 3:13, 14).

Штеди за итни ситуации. Кога си во можност, ставај по нешто настрана за непланирани или итни трошоци. Таквата заштеда може да ти даде одредена мера сигурност доколку ти или некој член на твоето семејство се соочи со неочекуван здравствен проблем, ја изгуби работата или доколку се случи некој друг непредвиден настан.

„Времето и непредвидените настани го снаоѓаат секого“ (Проповедник 9:11).

Како да заштедиш

Почесто подготвувај си оброци дома.

Ако често јадеш надвор или ако редовно купуваш готови оброци и пијалаци, тоа може многу да те чини. Се разбира, потребно е да одвоиш време и да вложиш труд за да подготвиш оброк дома, но така може многу да заштедиш. А ќе имаш и поголема контрола врз квалитетот на храната што ја консумираш.

Купувај паметно.

Направи си список за пазарување и држи се за него. Избегнувај импулсивно купување.
Купи поголема количина од некои работи кога ќе ги најдеш поевтини, доколку буџетот ти го дозволува тоа. Сепак, имај на ум дека треба да имаш место каде што ќе можеш соодветно да ги складираш работите кои може брзо да се расипат.
Размисли дали може да купуваш производи од поевтини брендови доколку квалитетот е на задоволително ниво.
Купувај онлајн за да најдеш подобри понуди, за да не земеш работи кои не си планирал да ги купиш и за да имаш подобар увид во тоа како ги трошиш парите. Доколку онлајн купувањето е достапно во местото каде што живееш, дали тоа би било добра опција за тебе?
Барај попусти и користи купони доколку има таква можност. Споредувај ги цените и, кога купуваш некој уред, земи во предвид колку електрична енергија троши и колкави ќе бидат трошоците за негово одржување.

Добро размисли дали ти е потребен понов производ.

Производителите на телефони и други производи постојано лансираат на пазарот нови модели за да остварат поголем профит. Затоа прашај се: „Дали навистина ми е потребен понов модел? Ако да, дали морам да го купам токму сега? И, дали навистина ми е потребен најновиот модел?“

Поправај и купувај од втора рака.

Одржувај ги апаратите за домаќинство за да им го продолжиш векот на траење и, доколку е исплатливо, поправи ги кога ќе се расипат. А би можел да заштедиш пари и ако купуваш работи што веќе биле користени од други луѓе.

Сам одгледувај си храна.

Дали би можел да одвоиш малку место за самиот да одгледуваш храна? Така помалку би трошел на храна за тебе и за твоето семејство, а и би можел нешто од она што го одгледуваш да го размениш, продадеш или подариш.

„Плановите на трудољубивиот сигурно донесуваат корист“ (Изреки 21:5, фуснота).

„Постојано сме во тек со цените на работите што секој ден ги користиме, а внимаваме и колку често ги употребуваме нашите кредитни картички“ (Мајлс, Англија).

„Пред да одиме на пазарување, со семејството секогаш правиме список со намирници кои ни се потребни“ (Џереми, САД).

„Редовно правиме промени во семејниот буџет во зависност од тоа како се движат цените, и ставаме пари настрана за непредвидени трошоци“ (Јаел, Израел).

„Ги научивме нашите деца да ги поправаат работите наместо да купуваат нови. Ова се однесува на автомобилот и на апаратите за домаќинство. Исто така, јас и жена ми се трудиме да не ги купуваме најновите модели“ (Џефри, САД).

„Ги намалив трошоците со тоа што сам одгледувам зеленчук и со тоа што чувам кокошки. Дури и можам да подарам од зеленчукот на други луѓе“ (Хоно, Мјанмар).

Еден маж бере разновиден зеленчук во една градина.