КАКО ДА СЕ СПРАВИШ СО РАСТЕЧКИТЕ ЦЕНИ

Не губи надеж

Дали трошоците за живот во твојата земја се поголеми од твоите примања? Загрижен ли си дали ќе можеш да се издржуваш себеси и своето семејство? Ако да, можеби имаш чувство дека твојата иднина е неизвесна. Сепак, дури и во такви тешки околности, важно е да не губиш надеж.

ЗОШТО Е ВАЖНО

Оние што имаат надеж посакуваат да се случат добри работи. Но, нивната надеж не е само пуста желба. Таа ги мотивира да преземат нешто и да го извлечат најдоброто од моменталната ситуација. На пример, истражувањата покажуваат дека луѓето кои имаат надеж...

обично се поиздржливи
се поприспособливи
носат помудри одлуки кои, меѓу другото, им помагаат да бидат поздрави и да имаат подобар живот

ШТО МОЖЕШ ДА ПРАВИШ

Прво, дознај како Библијата може да ти помогне уште денес. Библијата содржи практични предлози кои може да ти помогнат да се справиш со растечките цени. Овие предлози, меѓу другото, може да ти помогнат да имаш поголема контрола врз твојот живот и да бидеш поподготвен да се соочиш со идни тешкотии.

„Способноста за расудување ќе внимава на тебе, проникливоста ќе те чува“ (Изреки 2:11).

Второ, дознај што вели Библијата за иднината. Кога ќе сфатиш колкава вредност има мудроста која се наоѓа во Библијата, можеби ќе бидеш поттикнат да дознаеш нешто повеќе за она што го вели оваа книга за иднината. На пример, ќе откриеш дека Бог не само што сака да имаш „иднина и надеж“ туку и обезбедил цврст темел за таа надеж (Еремија 29:11). Тој темел е Божјето Царство.

ШТО Е БОЖЈЕТО ЦАРСТВО, И ШТО ЌЕ НАПРАВИ?

Божјето Царство е влада која ќе преземе потполна контрола врз целата Земја (Даниел 2:44; Матеј 6:10). Под власта на оваа небесна влада, никој повеќе нема да страда, да биде сиромашен, сите ќе живеат во мир и секој ќе го има сето она што му е потребно за да биде среќен, како што се гледа од следниве библиски стихови.

„Ќе бидеш среќен и ќе ти биде добро“ (Псалм 128:2).

„[Поданиците на Царството] нема да се трудат залудно“ (Исаија 65:23).

„На земјата житото богато ќе роди“ (Псалм 72:16).

Милиони луѓе имаат доверба во овие ветувања бидејќи се уверени дека Бог „не може да лаже“ (Тит 1:2). Зошто и ти да не ја истражиш Библијата? Надежта за која таа зборува може да ти даде внатрешна сила за да се справиш со економските потешкотии и да ти влее доверба дека нѐ очекува подобра иднина.