Поглавје 68

Натамошно поучување на седмиот ден

СЀ УШТЕ е во тек седмиот, последниот ден од празникот Сеници. Исус поучува во делот од храмот кој се вика „ризница“. Тоа е очигледно во делот наречен Дворот на жените, каде има ковчези во кои луѓето ставаат прилози.

Секоја ноќ за време на празникот, во овој дел од храмот има посебно осветлување. Овде се поставени четири огромни свеќници, од кои секој има по четири големи садови полни со масло. Светлината од тие свеќници, во кои гори масло од 16 садови, е доволно силна да ја осветлува околината на големо растојание ноќно време. Она што Исус сега го кажува можеби ги потсетува неговите слушатели на тоа осветлување. „Јас сум светлината на светот“, изјавува Исус. „Кој ме следи мене, никако нема да оди во темнина, туку ќе ја поседува светлината на животот.“

Фарисеите приговараат: „Ти сведочиш сам за себе; твоето сведоштво не е вистинито“.

Исус одговара: „Ако и сведочам сам за себе, моето сведоштво е вистинито, бидејќи знам од каде дојдов и каде одам. Но вие не знаете од каде дојдов и каде одам“. Тој додава: „Јас сум оној кој сведочи за себе, и Таткото кој ме испрати, сведочи за мене“.

„Каде е твојот Татко?“, сакаат да знаат фарисеите.

„Вие не ме познавате ниту мене ниту мојот Татко“, одговара Исус. „Ако ме познававте мене, ќе го познававте и мојот Татко.“ Иако фарисеите сѐ уште сакаат да го уапсат Исус, никој не го допира.

„Јас си заминувам“, повторно вели Исус. „Таму каде што одам јас, вие не можете да дојдете.“

На тоа Евреите почнуваат да се прашуваат: „Зарем ќе се убие? Зашто вели: ‚Таму каде што одам јас, вие не можете да дојдете‘“.

„Вие сте од долните области“, објаснува Исус. „Јас сум од горните области. Вие сте од овој свет; јас не сум од овој свет.“ Потоа додава: „Ако не верувате дека јас сум тоа, ќе умрете во своите гревови“.

Се разбира, Исус укажува на своето претчовечко постоење и на тоа дека тој е ветениот Месија, или Христос. Сепак, тие го прашуваат, несомнено со голем презир: „Кој си ти?“

Соочен со нивното отфрлање, Исус одговара: „Зошто воопшто и зборувам со вас?“ Сепак, тој продолжува: „Оној кој ме испрати е вистинит, и токму она што го чув од него, го зборувам во светот“. Исус продолжува: „Кога еднаш ќе го подигнете Синот човечки, тогаш ќе знаете дека јас сум тоа, и дека ништо не правам на своја иницијатива; туку како што ме научи Таткото, така зборувам. И оној кој ме испрати е со мене; не ме препушти сам на себе, зашто јас секогаш го правам она што му е угодно“.

Кога Исус ги кажува овие работи, многумина положуваат вера во него. На нив им вели: „Ако останете во мојата реч, навистина сте мои ученици, и ќе ја спознаете вистината, и вистината ќе ве ослободи“.

„Ние сме Авраамово потомство“, му упаѓаат во зборот противниците, „и никогаш не сме биле нечии робови. Како тоа ти велиш: ‚Ќе бидете слободни‘?“

Иако Евреите често биле под туѓа доминација, ниеден угнетувач не го признавале како свој господар. Тие одбиваат да бидат наречени робови. Но, Исус истакнува дека се навистина робови. На кој начин? „Вистина, вистина ви велам“, вели Исус, „Секој кој прави грев, роб му е на гревот.“

Одбивањето да го признаат своето ропство на гревот ги става Евреите во опасна положба. „Робот не останува во куќата засекогаш“, објаснува Исус. „Синот останува засекогаш.“ Бидејќи робот нема право на наследство, може да биде во опасност да биде отпуштен кога и да било. Само синот кој е роден или посвоен во домот останува „засекогаш“, т.е. додека е жив.

„Затоа, ако Синот ве ослободи“, продолжува Исус, „навистина ќе бидете слободни.“ Според тоа, вистината што ги ослободува луѓето е вистината во врска со Синот, Исус Христос. Само преку жртвата на неговиот совршен човечки живот може некој да биде ослободен од смртоносниот грев. Јован 8:12—36.

▪ Каде поучува Исус седмиот ден? Што се случува таму ноќе, и како тоа се однесува на Исусовото поучување?

▪ Што вели Исус за своето потекло, и што би требало тоа да открие за неговиот идентитет?

▪ На кој начин Евреите се робови, но која вистина ќе ги ослободи?