Поглавје 108

Не успеваат да го фатат Исус во стапица

ЗАТОА што Исус поучувал во храмот и штотуку на своите религиозни непријатели им кажал три илустрации со кои ја разоткрил нивната злоба, фарисеите се разлутени и се советуваат да го фатат во стапица за да каже нешто заради кое ќе можат да го уапсат. Тие коваат завера и ги праќаат своите ученици, заедно со припадници на Иродовата партија, да се обидат да го фатат во збор.

„Учителе“, велат овие луѓе, „знаеме дека си вистинит и дека во вистина поучуваш за Божјиот пат, и дека не се обѕираш на никого, зашто не гледаш на надворешноста на луѓето. Затоа, кажи ни: Што мислиш? Дозволено ли е на цезарот да му се плаќа данок по глава или не?“

Исус не е измамен од ласкањето. Тој сфаќа дека, ако рече: ‚Не, не е законски или не е исправно да се плаќа тој данок‘, ќе биде виновен за побуна против Рим. А ако каже: ‚Да, треба да го плаќате тој данок‘, Евреите кои ја презираат својата подјарменост под Рим ќе го мразат. Затоа, им одговара: „Зошто ме ставате на испит, лицемери? Покажете ми ја монетата за данок по глава!“

Кога му донесуваат монета, ги прашува: „Чија слика и натпис е ова?“

„На цезарот“, одговараат тие.

„Затоа, плаќајте му го цезаревото на цезарот, а Божјето на Бог.“ Кога овие луѓе го слушаат Исусовиот мајсторски одговор, се зачудуваат. Потоа си заминуваат и го оставаат сам.

Гледајќи дека фарисеите не успеваат да сторат ништо против Исус, му приоѓаат садукеите, кои велат дека нема воскресение, и го прашуваат: „Учителе, Мојсеј рече: ‚Ако некој умре без да има деца, неговиот брат да се ожени со жена му и да му подигне потомство на брата си‘. Така, кај нас си беа седуммина браќа; и првиот се ожени и умре и, бидејќи немаше потомство, му ја остави својата жена на брата си. Така беше и со вториот и со третиот, сѐ до седмиот. Последна од сите умре жената. Според тоа, при воскресението кому од седумтемина ќе му биде жена? Зашто сите ја имаа“.

Како одговор, Исус вели: „Зарем не сте во заблуда затоа што не го познавате ниту Писмото ниту Божјата моќ? Зашто кога ќе станат од мртвите, ниту мажите ќе се женат ниту жените ќе се мажат, туку се како ангели на небесата. А што се однесува до мртвите, дека стануваат, зарем не сте читале во Мојсеевата книга, во извештајот за трновата грмушка, како Бог му рече: ‚Јас сум Богот Авраамов и Богот Исаков и Богот Јаковов‘? Тој не е Бог на мртвите, туку на живите. Вие сте во голема заблуда“.

Мноштвата се повторно вчудовидени од Исусовиот одговор. Дури и некои од книжниците признаваат: „Учителе, добро зборуваше“.

Кога фарисеите увидуваат дека Исус ги замолчува садукеите, му доаѓаат во група. Со цел и понатаму да го испитаат, еден книжник меѓу нив го прашува: „Учителе, која е најголемата заповед во Законот?“

Исус одговара: „Првата е: ‚Чуј, о Израеле, Јехова, нашиот Бог, е еден Јехова, и љуби го Јехова, својот Бог, со сето свое срце и со сета своја душа и со сиот свој ум и со сета своја сила‘. Втората е оваа: ‚Љуби го својот ближен како себеси‘. Нема ниедна друга заповед поголема од овие“. Всушност, додава Исус: „На овие две заповеди висат целиот Закон и Пророците“.

„Учителе, добро рече според вистината“, се согласува книжникот. „,Тој е Еден, и нема друг освен Него‘; и да го љубиш со сето срце, и со сиот разум, и со сета сила, и да го љубиш ближниот како себеси вреди повеќе од сите цели палени приноси и жртви.“

Увидувајќи дека книжникот паметно одговорил, Исус му вели: „Не си далеку од Божјето царство“.

Исус поучува во храмот веќе три дена — недела, понеделник и вторник. Луѓето го слушаат со задоволство, а верските водачи сепак сакаат да го убијат, но досега нивните обиди биле осуетени. Матеј 22:15—40; Марко 12:13—34; Лука 20:20—40.

▪ Каква завера коваат фарисеите за да го фатат Исус во стапица, и каква би била последицата ако одговори со ‚да‘ или со ‚не‘?

▪ Како Исус ги осуетува настојувањата на садукеите да го фатат во стапица?

▪ Каков натамошен обид прават фарисеите за да го испитаат Исус, и каков е исходот?

▪ Колку дена Исус поучува во храмот за време на својата последна служба во Ерусалим, и со каков резултат?